ރާއްޖޭގެ ކުރިއަށްގެންދާ އެކިއެކި މަޝްރޫޢުތަކަށް ބޭނުންވާ ފައިސާ ހޯދުމަށްޓަކައި، ސަރުކާރުން ގާއިމްކުރަން ނިންމި "ޑިވެލޮޕްމަންޓް ބޭންކު އޮފް މޯލްޑިވްސް" އިފްތިތާހުކޮށްފިއެވެ.
މިކަމަށްޓަކައި ބޭއްވި ރަސްމިއްޔާތުގައި ބޭންކް އިފްތިތާހުކޮށްދެއްވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒެވެ.
ޑިވެލޮޕްމަންޓް ބޭންކު އޮފް މޯލްޑިވްސް އިފްތިތާހުކުރުމުގެ ރަސްމިއްޔާތުގައި ވާހަކަދައްކަވަމުން އިގްތިސާދީ ވަޒީރު މުހައްމަދު ސައީދު ވިދާޅުވީ، ޑިވެލޮޕްމަންޓް ބޭންކާއެކު ރާއްޖޭގެ އިގްތިސާދުގެ މުޅިން އައު ބާބެއް ފެށިގެންދާނޭ ކަމަށެވެ. މި ބޭންކުގެ ސަބަބުން އިގްތިސާދު ސިންދަފާތުކުރުމަށް ރައީސް ޑރ.މުއިއްޒު ގެންގުޅުއްވާ ސިޔާސަތުތައް ކުރިއަށްގެންދިއުމަށް އިތުރު ބާރެއް ލިބިގެންދާނޭކަމަށް މިިނިސްޓަރު ސައީދު ފާހަގަކުރެއްވިއެވެ.
މި ރަސްމިއްޔާތުގައި ޑީބީއެމްގެ ސީއީއޯ ނޮއެލް ގްރެގަރ ޕެޓަރސަން-ޖޯންސް ވިދާޅުވީ، ޑީބީއެމް ވެގެންދާނީ ހަމައެކަނި ބޭންކަކަށް ނޫންކަމަށާއި، މި ބޭންކު ވެގެންދާނީ ރާއްޖޭގެ އިގްތިސާދުގެ ދުވެލި ކުރިއަށް ޖައްސާލާނޭ ވަރުގަދަ އިންޖީނަކަށް ކަމަށެވެ. އޭނާ ވިދާޅުވީ ޑީބީއެމާއެކު މުޅި ރާއްޖޭގެ އެކި ދާއިރާތަކަށް ކުރިއެރުންތައް ލިބިގެންދާނޭކަމަށެވެ.
ރާއްޖޭގައި އިފްތިތާހުކުރެވުނު ފުރަތަމަ ޑިވެލޮޕްމަންޓް ބޭންކާ ގުޅޭގޮތުން ރައީސް ޑރ.މުއިއްޒު މީގެކުރިން ވިދާޅުވެފައިވަނީ، މި ބޭންކު ވެގެންދާނީ ރާއްޖޭގެ ޓޫރިޒަމް އިންޑަސްޓްރީގެ ރިސޯޓުތައް ހެދުމަށާއި، ހައުސިން މާކެޓާއި އެނޫންވެސް އެހެނިހެން ދާއިރާތަކުން ރާއްޖޭގައި އިންވެސްޓުކުރާ ފަރާތްތަކުގެ ހަބަކަށް ކަމަށެވެ.
މިއަހަރުގެ މެއިމަހުގެ 16 ވަނަ ދުވަހު "ޑިވެލޮޕްމަންޓް ބޭންކު އޮފް މޯލްޑިވްސް" އުފައްދާފައިވާއިރު، ޑީބީއެމް އަށް ބޭންކިން ވިޔަފާރިކުރުމަށް ލައިސަންސް ދީފައިވަނީ، މިދިޔަ އޮކްޓޯބަރުމަހުގެ ތެރޭގައެވެ.
ޑިވެލޮޕްމަންޓް ބޭންކް އޮފް މޯލްޑިވްސް ލިމިޓެޑްގެ ޗެއަރޕަރސަނެއްގެ ގޮތުގައި އައްޔަނުކުރައްވާފައިވަނީ، އަރޫނީ ގޫނަތިލަކަ އެވެ. އަދި ބޭންކުގެ ސީ.އީ.އޯ އަކަށް އައްޔަނުކުރައްވާފައިވަނީ، ނޮއެލް ގްރެގަރ ޕެޓަރސަން-ޖޯންސް އެވެ.
ޑިވެލޮޕްމަންޓް ބޭންކް އޮފް މޯލްޑިވްސްގެ ޗެއާރޕަރސަން އަރޫނީ ގޫނަތިލަކަ އަކީ ބިޒްނަސް އޮރިޖިނޭޝަން، ގަވަރނަންސް، ކްރެޑިޓް އެސެސްމަންޓް އަދި އަލަށް ވުޖޫދުވަމުން އަންނަ މާކެޓްތަކުގެ ރިސްކް މެނޭޖުކުރުމުގެ ދާއިރާއިން ޚާއްސަވެފައިވާ ބައިނަލްއަޤްވާމީ ފައިނޭންސިއަލް މާކެޓްގެ ފައިނޭންސިއަލް ސަރވިސް ތަޖުރިބާކާރެކެވެ. މީގެ އިތުރުން ކޯޕަރޭޓް ބޭންކިންގ، ކްރެޑިޓް، ރިސްކް މެނޭޖްމަންޓް، އަދި ސްރީލަންކާގެ ބޭންކުތަކާ އިންޓަރނޭޝަނަލް ބޭންކުތަކުގެ އިންޓަރނަލް އޯޑިޓިންގައި ވެސް ޗެއަރޕަރސަން އަރޫނީ ގޫނަތިލަކަ މުހިންމު ރޯލެއް އަދާކުރައްވާފައިވެއެވެ. ޑިވެލޮޕްމަންޓް ބޭންކް އޮފް މޯލްޑިވްސްގެ ޗެއާރޕަރސަން އަކީ ހާވަރޑް ޔުނިވަރސިޓީން މާސްޓަރ އޮފް ލޯ ހާސިލުކުރައްވައިގެން ހުންނެވި ބޭފުޅެކެވެ.
ޑިވެލޮޕްމަންޓް ބޭންކް އޮފް މޯލްޑިވްސްގެ ސީ.އީ.އޯއަކީ ޗީފް އިންވެސްޓްމެންޓް އޮފިސަރެއްގެ ހައިސިއްޔަތުން ސަޢޫދީ ޢަރަބިއްޔާގެ ނޭޝަނަލް އިންފްރާސްޓްރަކްޗަރ ފަންޑު ގާއިމު ކުރުމުގައި މުހިންމު ދައުރެއް އަދާކުރައްވާފައިވާ ބޭފުޅެކެވެ. އަދި ޑިވެލޮޕްމަންޓް ބޭންކް އޮފް މޯލްޑިވްސްގެ ސީ.އީއޯއަކީ އިލެކްޓްރިކް ވެހިކަލް އެފްރިކާ ފަންޑުގެ ޗެއާޕަރސަންގެ އިތުރުން އިރުދެކުނު އޭސިއާގައި ކްލީން އެނާޖީ ޕްރޮޖެކްޓްތައް މެނޭޖުކުރައްވައި ގްރީން ފައިނޭންސް އަދި އިންފްރާސްޓްރަކްޗަރ ޑިވެލޮޕްމަންޓުގެ ދާއިރާއިން ތަޖުރިބާ ލިބިވަޑައިގެން ހުންނެވި ހުނަރާ ގާބިލުކަން ދައްކަވާފައިވާ ބޭފުޅެކެވެ. އަދި އޭނާ ވަނީ އިނގިރޭސި ވިލާތުގެ އޮކްސްފޯޑް ޔުނިވަރސިޓީން މެނޭޖުމަންޓް ސްޓަޑީސްގެ ދާއިރާއިން މާސްޓަރ އޮފް ފިލޯސަފީ ހާސިލު ކުރައްވާފައެވެ.
ޑީބީއެމް އުފެއްދުމާ ގުޅޭގޮތުން ރައީސުލްޖުމްހޫރިއްޔާގެ އޮފީހުން ބުނެފައިވަނީ މި ބޭންކު އުފެއްދުމުގެ މައިގަނޑު މަގްސަދަކީ، ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތީން، ދެމެހެއްޓެނިވި އިޤްތިޞާދީ އަދި އިޖުތިމާޢީ ތަރައްޤީއަށް އިންވެސްޓުކުރުމާއި، ޢުމްރާނީ ތަރައްޤީއަށް ބޭނުންވާ ފައިސާ ހޯދުމާއި، ސިންޑިކޭޝަން ފައިނޭންސް މެދުވެރިކޮށް ޕީ.އެސް.އައި.ޕީ މަޝްރޫޢުތަކަށް ފައިސާ ފޯރުކޮށްދިނުމުގައި ދިމާވާ ގޮންޖެހުންތައް ޙައްލުކުރުމާއި، ދިވެހިރާއްޖޭގެ ބޭންކިންގ ނިޒާމުގައި ބޭރު ފައިސާ ބެހެއްޓުމުގެ ޝައުޤުވެރިކަން އިތުރުކުރުން ކަމަށެވެ.
Advertisement
This content is created and paid for by advertisers and does not involve Voice Journalists
