އިޒްރޭލު ޕާސްޕޯޓް މަނާކުރުމުގެ ބިލު ފާސްކުރިޔަސް ނުކުރިޔަސް ސަރުކާރުގެ މުނާފިގުކަން މުޅި ދުނިޔެއަށް ހާމަވެއްޖެކަމަށް އެމްޑީޕީގެ ޗެއާޕާސަން ފައްޔާޒް އިސްމާއީލް ވިދާޅުވެއްޖެއެވެ.

މިގޮތުން ފައްޔާޒް "އެކްސް" ގައި ކުރެއްވި ޕޯސްޓެއްގައި ވަނީ، ރައީސް ޑރ.މުޢިއްޒުގެ ސަރުކާރަށް އަހަރުދުވަސް ވާއިރު ދޮގު ހަދައި އޮޅުވައިލުން ހުއްޓާލައި ބިލާ މެދު ގޮތެއް ނިންމެވުމަށް ގޮވާލައްވާފައެވެ.

ފައްޔާޒް ވިދާޅުވީ، އޮކްޓޫބަރު 16 ގައި މަޖިލީހަށް ހުށަހަޅައި 20 ދުވަސް ތެރޭ ޓެކްސް ބޮޑުކުރިކަމަށާއި،  ދުންފަތް އަގުބޮޑުކޮށް 21 ދުވަހުގެ ތެރޭގައި ތަންފީޒު ކުރަން ފެށިއިރު، ވޭޕް މަނާކުރަން ބޭނުންވުމުން މަޖިލިސް ތެރެއިން ނިންމައި އެކަން ތަންފީޒު ކުރަން ހޭދަވީ 30 ދުވަސް ކަމަށެވެ.

އެހެންނަމަވެސް، ޖޫން 2 ގައި ސަރުކާރުން އިއުލާނުކުރި ގޮތަށް އިޒްރޭލު ޕާސްޕޯޓު އަދިވެސް މަނާ ނުކުރެވޭ ކަމަށާއި، ސަރުކާރުގެ ނިންމުމަށް ފަހު 166 ދުވަސް ހޭދަވެފައިވާކަން ފާހަގަކުރައްވަމުން ފައްޔާޒް ވިދާޅުވީ، ޖޫން 10 ގައި މަޖިލީހަށް ބިލު ބަލައިގަނެ 241 ކޮމިޓީގައި "ތަޅު އަޅުވާފައި" އޮންނަތާ 158 ދުވަސް ހޭދަވެއްޖެކަމަށާއި، ސަރުކާރަށް އަހަރެއް ފުރުން ފާހަގަކުރާއިރު، ބިލަށް ގޮތެއް ނުނިންމައި ބާއްވާފައި އޮންނަތާ ފަސް މަސް ފާއިތުވެއްޖެކަމަށެވެ.

ފެންނަމުންދަނީ ސަރުކާރު އަދި މަޖިލީހުގެ ސުޕަމެޖޯރިޓީ އޮވެ، އެކަމަށް ގޮތެއް ނުނިންމައި ތިބެ އަވަސް ކުރަން ގޮވާލައި ބަޔާން ނެރެ، ރައްޔިތުންނަށް ޕީއެންސީން އޮޅުވައިލާތަންކަމަށާއި، ދިވެހި ދިދަޔަށް ނޫނީ ބޯނުލަބާން ވިދާޅުވެ އެމެރިކާގެ ދިދަޔަށް ބޯލަބަންޖެހުނީތޯ ސުވާލު އުފެދޭ ކަމަށް ފައްޔާޒް ވިދާޅުވިއެވެ.