ދިވެހިރާއްޖޭގެ މަސްވެރިންގެ ދުވަސް ފާހަގަ ކުރުމަށް ކޮންމެ އަހަރެއްގެ ޑިސެންބަރު މަހު ބާއްވާ ޙަފްލާގައި ދެވޭ އެވޯޑު ފަރުމާކޮށް، ޑިޒައިން ހުށަހެޅުމުގެ ފުރުޞަތު މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާއިން ހުޅުވާލައިފިއެވެ.

މިކަމާއި ގުޅޭގޮތުން މަސްވެރިކަމާއި ބެހޭ ވުޒާރާއިން ބުނީ، ހުށަހަޅާ ޑިޒައިނަކީ މަސްވެރިންގެ ދުވަހުގެ ޝިއާރު ކަމަށްވާ "މަސްވެރިކަމުގެ ސިނާއަތު ސިންދަފާތުކުރުމުގައި ޒުވާނުންގެ ބައިވެރިވުން"، އަދި މަސްވެރިކަމުގެ ސިނާއަތް އެކަށީގެންވާ ގޮތެއްގައި ރަމްޒު ކޮށްދޭ ޑިޒައިނަކަށް ވާންޖެހޭނެކަމަށާއި، ޑިޒައިން އިޚްތިޔާރު ކުރުމުގައި ޒަމާނުއްސުރު ދެމެހެއްޓެނިވި ގޮތުއްގައި ދިވެހިން ކުރަމުން އައިސްފައިވާ ދޮށީގެ މަސްވެރިކަމާއި، މަސްވެރިކަމުގެ ސިނާއަތް ސިންދަފާތު ކުރުމުގެ މުހިންމުކަން ދައްކުވައިދޭ ޒަމާނީ އަދި އިޖާދީ ހުށަހެޅުންތަކަށް އިސްކަންދެވޭނެކަމަށެވެ.

ހުށަހަޅާ ޑިޒައިނަކީ ޑިޒައިން ހުށަހަޅާ ފަރާތުގެ އަމިއްލަ މަސައްކަތަކަށް ވާންވާނެކަމަށާއި، ކޮންމެ ފަރާތަކަށް ވެސް ހުށަހެޅޭނީ 1  ޕްރޮޕޯސަލްކަމަށްވާއިރު، އެއްފަރާތަކަށް ވުރެ ގިނަ ފަރާތްތަކުން ގުޅިގެން އެއް ޕްރޮޕޯސަލެއް ހުށަހެޅިދާނެކަމަށް އެ ވުޒާރާއިން ބުނެއެވެ.

އެހެންކަމުން، ޑިޒައިން ހުށަހަޅަން ބޭނުންވާ ފަރާތްތަކުން 20 ނޮވެމްބަރު 2024 ވާ ބުދަ ދުވަހުގެ 12:00 ގެ ކުރިން  [email protected] އަށްޑިޒައިން ފޮނުވުމަށް އެ ވުޒާރާއިން އެދެއެވެ.

ޕްރޮޕޯސަލްތަކަށް އިންސާފުކުރާނީ އެކަމަށް އައްޔަންކުރާ ޕެނަލަކުން ކަމަށާއި، މަސްވެރިންގެ ދުވަހުގެ ރަސްމީ ޖަލްސާގައި ދޭ އެވޯޑުގެ ގޮތުގައި ބޭނުން ކުރުމަށް ހޮވޭ ޑިޒައިން ފަރުމާކުރި ފަރާތަށް 15,000 ރުފިޔާގެ ފައިސާގެ އިނާމެއް ދިނުމަށް ހަމަޖެހިފައިވާކަމަށް އެ ވުޒާރާއިން މައުލޫމާތުދެއެވެ.