އެއް އަހަރު ތެރޭގައި، ގަވާއިދާއި ޚިލާފަށް ރާއްޖޭގައި ދިރިއުޅެމުންދާ 5000 ބިދޭސީން ޑިޕޯޓްކުރެވިފައިވާ ކަމަށް އިމިގްރޭޝަން ކޮންޓްރޯލަރ މުޙައްމަދު ޝަމްޢާން ވިދާޅުވެއްޖެއެވެ.
އައު ސަރުކާރަށް މިއަދު އަހަރެއް ވެފައިވާއިރު، ވޭތުވެދިޔަ އަހަރު ތެރޭގައި އިމިގްރޭޝަންއަށް ހޯދިފައިވާ ކާމިޔާބީ ހިއްސާކުރައްވައި ޝަމްޢާން ހާމަކުރެއްވި ގޮތުގައި، ވޭތުވެދިޔަ އެއް އަހަރު ދުވަހުގެ ތެރޭގައި ގަވާއިދާ ޚިލާފަށް ރާއްޖޭގައި ދިރިއުޅެމުންދިޔަ 5000 ބިދޭސީން ވަނީ ޑިޕޯޓްކުރެވިފައެވެ. މިއީ އިމިގްރޭޝަންގެ ތާރީޚުގައިވެސް ރެކޯޑު އަދަދެކެވެ.
17 ނޮވެމްބަރ 2023 އިން ފެށިގެން ފާއިތުވެދިޔަ 1 އަހަރު ތެރޭ ޤަވާއިދާ ޚިލާފަށް އުޅޭ 5000 ބިދޭސީން ފުރުވާލާ ޓާރގެޓް ވަނީ ހާސިލް ކުރެވިފަ. މިއީ އިމިގްރޭޝަން ތާރީހުގައި ވެސް ރެކޯރޑް އަދަދެއް.
އިމިގްރޭޝަން ކޮންޓްރޯލަރ ޝަމްޢާން
މި މަސައްކަތުގައި އިމިގްރޭޝަނަށް އެހީތެރިވެދެއްވި އެންމެހައި ފަރާތްތަކަށް، ޚާއްޞަކޮށް ފުލުހުންނާއި ހޯމް މިނިސްޓްރީއަށް ޝަމްޢާން ޝުކުރު އަދާކުރެއްވިއެވެ.
ޝަމްޢާން އިތުރަށް ވިދާޅުވީ، ރައީސް ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، ދިވެހިރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް ވޭތުވެދިޔަ އަހަރަކީ ކާމިޔާބު މަސައްކަތްތަކެއް ކުރެވުނު އަހަރެއް ކަމަށެވެ.
އަދި މި ފުރުޞަތުގައި އިމިގްރޭޝަނުން ދޭން ބޭނުންވާ ޔަގީންކަމަކީ، ރައީސްގެ ވަޢުދުފުޅާ އެއްގޮތަށް ބޮޑުވެފައިވާ ގަވާއިދާ ޚިލާފަށް އުޅޭ ބިދޭސީންގެ މައްސަލައަށް ހައްލު ހޯދުމަށް އިމިގްރޭޝަންގެ އެންމެހައި އޮފިސަރުން އެއް އަޒުމެއްގައި މަސައްކަތްކުރާނެ ކަމުގެ ޔަގީންކަން ކަމަށްވެސް ޝަމްޢާން ވިދާޅުވިއެވެ.
ޝަމްއާން މިހެން ވިދާޅުވެފައި ވާއިރު، މި ސަރުކާރަށް ވީ އެއް އަހަރު ތެރޭގައި، ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލު ކުރުމަށް، ވަރަށް ގިނަ ތަންތަން ބަލައި ފާސްކޮށް، ބިދޭސީން ޑިޕޯޓްކޮށް، އެމީހުން ގަވާއިދާ ޚިލާފަށް ހިންގަމުންއައި ވިޔަފާރިތައް ބަންދުކޮށްފައިވާކަން ފާހަގަކޮށްލަންޖެހެއެވެ.
Advertisement
This content is created and paid for by advertisers and does not involve Voice Journalists
