ކުރިއަށް އޮތް ރޯދަމަހު، ސަރުކާރުގެ ފަރާތުން ކޮންމެ ގޭބިސީ އަކަށް މަސްދަޅު ކޭހެއް ދޭން ނިންމަވާފައިވާކަން ރައީސް ޑރ މުޙައްމަދު މުޢިއްޒު އިއުލާން ކުރައްވައިފިއެވެ.
އެމަނިކުފާނު މިކަން އިއުލާން ކުރެއްވީ ސަރުކާރަށް އަހަރުވުމުގެ މުނާސަބާ ފާހަގަކުރުމަށް މިހާރު ކުރިއަށްދާ ޖަލްސާގައި ވާހަކަދައްކަވަމުންނެވެ.
މި ޖަލްސާގައި ރައީސް މުޢިއްޒު ވަނީ އެ ޖަލްސާގައި ނިމިދިޔަ އެއް އަހަރު ދުވަހުގެ ތެރޭގައި ދައުލަތުގެ ޚަރަދުގައި، ދައުލަތުގެ ހިލޭ އެހީގެ ދަށުން ރައްޔިތުންނަށް ދެވިފައިވާ ބައެއް އެހީތަކާއި، އަދި ދެވުނު ބައެއް ލުއި ތަކުގެ މައްޗަށް އަލިއަޅުވާލައްވާފައެވެ.
އެގޮތުން ނިމިދިޔަ މިދިޔަ ރަމަޟާން މަހު ރާއްޖޭގެ ރައްޔިތުންނަށް ރޯދަ ހަދިޔާގެ ގޮތުގައި ކާޑުގެ ބާވަތްތައް ދިންކަން ފާހަގަކުރައްވައި، ކުރިއަށް އޮތް ރޯދަ މަހު ކާޑުގެ ބަދަލުގައި ކޮންމެ ގެއަކަށް ހިލޭ މަސް ކޭހެއް ދިނުމަށް އެސްޓީއޯއަށް އަންގަވާފައިވާ ކަމަށް ރައީސް ވިދާޅުވިއެވެ.
82،000 ގޭބިސީ އަކަށް، 1.6 މިލިއަން ކިލޯގެ ކާޑުގެ ބާވަތްތައް ހިލޭ ދިނިން (މިދިޔަ ރޯދަމަހު). ކުރިއަށް އޮތް ރަމަޟާންމަހު އަޅުގަނޑުމެން ގަސްތުކުރަނީ، އެސްޓީއޯގެ އެމްޑީއަށް އަޅުގަނޑު ދަންނަވައިފިން، ކާޑުގެ ބަދަލުގައި، ކޮންމެ ގެއަކަށް މަސްދަޅުކޭސް ހިލޭ ދޭނެ
ރައީސް ޑރ މުޙައްމަދު މުޢިއްޒު
މީގެ އިތުރުން ރައީސް މުޢިއްޒު ވަނީ، ނިމިދިޔަ ރަަމަޟާން މަހުގެ ތެރޭގައި ކަރަންޓް ބިލާއި ފެން ބިލުން ޑިސްކައުންޓް ދެވުނުކަންވެސް ފާހަގަކުރައްވާފައެވެ. އެގޮތުން 142 މިލިޔަން ރުފިޔާގެ ޑިސްކައުންޓް ދެވުނުކަން އެމަނިކުފާނު ފާހަގަކުރެއްވިއެވެ.
ހަމައެހެންމެ، ފާއިތުވެދިޔަ ސަރުކާރުގެ ފަސްއަހަރުގައި ދައުލަތުގެ ޚަރަދުގައި ބޯންމެރޯ ޓްރާންސްޕްލާންޓް ހެދުމުގެ ފުރުސަތު ދިނީ އެންމެ ކުއްޖަކަށް ކަމަށާ އެހެން ނަމަވެސް މި ސަރުކާރުގައި އެ ފުރުސަތު 14 ކުއްޖަކަށް ފަހިކޮށްދެއްވާފައިވާކަން ރައީސް މުޢިއްޒު ފާހަގަކުރެއްވިއެވެ.
މިކަންކަމުގެ އިތުރުން މީގެ ކުރިން، އިޖުތިމާޢީ ބޯހިޔާވަހިކަމުގެ ދަށުން އަޅާފައިވާ ގެދޮރުގެ ކުއްޔަށް ލުއިދެއްވައި ޖޫރިމަނާތަކަށް މައާފްދެއްވާފައިވާކަންވެސް އެމަނިކުފާނު ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
