ޑޮލަރު މާރުކުރުން ގަވައިދާ އެއްގޮތަށް ކުރިއަށްދާނަމަ، އެކި ބޭނުންތަކުގައި ރައްޔިތުންނަށް ދޫކުރާ ޑޮލަރުގެ އަދަދު އިތުރުކުރުމަށް ނިންމަވާފައިވާކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައްޔިތުންނާއެކު ކުރިއަށް، ހަފްތާ 52 ފާހަގަކުރުމަށް ބޭއްވި ހަފްލާގައި ވާހަކަދައްކަވަމުން ރައީސް ޑރ.މުއިއްޒު ވިދާޅުވީ، ހަމަޖެހިފައިވާ ގަވާއިދުގެ ތެރެއިން ޑޮލަރު މާރުކުރުމުގެ ކަންކަން ކުރިއަށްދާނަމަ، 2026 ވަނަ އަހަރުގެ ފުރަތަމަ ކުއާޓަރުގެ ތެރޭގައި ބޭރަށްފުރާ ދިވެހިންނަށް ދޫކުރާ ޑޮލަރުގެ އަދަދު އިތުރުކުރާނޭ ކަމަށެވެ. މިގޮތުން ސަރުކާރުން ނިންމާފައިވަނީ މިހާރު ދޫކުރަމުން އަންނަ 500 ޑޮލަރު 1،000 ޑޮލަރަށް އިތުރުކުރަންކަމަށް ރައީސް ވިދާޅުވިއެވެ.

ރައީސް ވިދާޅުވީ، ބޭރަށްފުރާ މީހުންގެ އިތުރުން ކްރެޑިޓްކާޑަށް ދޫކޮށްފައިވާ ޑޮލަރު ލިމިޓްވެސްަ 1،400 ޑޮލަރަށް އިތުރުކުރުމަކީ ސަރުކާރުގެ ވިސްނުމެއް ކަމަށެވެ. 

Advertisement

ހަފްތާ 52 ފާހަގަކުރުމަށް ބޭއްވި ހަފްލާގެ ތެރެއިން..

ރައީސް ވިދާޅުވީ ޓޫރިޒަމް ސިނާއަތަށް މިދިޔަ އަހަރު ޑޮލަރުން އާމްދަނީގެ ގޮތުގައި 4.5 ބިލިއަން ޑޮލަރު ލިބުނުއިރު، ބޭންކަށް މާރުވީ އޭގެ 1.5 އިންސައްތަ ކަމަށެވެ. ޑޮލަރު މާރުކުރުމުގެ އައު އުސޫލުގެ ދަށުން މާރުކުރަމުންދާނަމަ، ޑޮލަރުން ލިބޭ އާމްދަނީގެ 15 ނުވަތަ 20 އިންސައްތަ ބޭންކަށް ވަންނާނޭކަމަށް ރައީސް ވިދާޅުވިއެވެ.

ރައީސް ވިދާޅުވީ ޑޮލަރު މާރުކުރުމުގެ އައު ގަވާއިދާ އެއްގޮތަށް އަމަލުކުރަން ފެށުމުން ޑޮލަރު ލިބުމުގެ މައްސަލައަށް ހައްލެއް ލިބި، ދައުލަތުގެ ކުންފުނިތަކަށްވެސް އޭގެ މަންފާ އެންމެ ރަނގަޅަށް ކުރަމުންދާނޭކަމަށެވެ. 

ދައުލަތުެގ ބައިތުލްމާލަށް މިދިޔަ އަހަރު ޑޮލަރުން އާމްދަނީގެ ގޮތުގައި 950 މިލިއަނެއްހާ ޑޮލަރު ލިބުނުއިރު، އެއަށްވުރެ މާބޮޑަށް ޑޮލަރުން ހޭދަކުރަންޖެހޭކަމަށް ރައީސް ވަނީ ފާހަގަކުރައްވާފައެވެ. އެގޮތުން ހަމައެކަނި ހަކަތައިގެ ގޮތުގައި ރާއްޖެއަށް ތެލުގެ ބާވަތްތައް އެތެރެކުރުމަށް އެކަނިވެސް 753 މިލިއަން ޑޮލަރު ބޭނުންވާކަމަށެވެ.

މީގެ އިތުރުން ކާބޯތަކެތީގެ ބާވަތްތައް ގަތުމަށް 675 މިލިއަން ޑޮލަރު ބޭނުންވާއިރު، ކިޔަވާކުދިންނަށް އެކަނިވެސް 37 މިލިއަން ޑޮލަރު ބޭނުންވެއެވެ. އަދި އާއްމު ބޭނުންތަކަށް ބޭނުންކުރާ ކާޑުތަކަށްވެސް އަހަރަކު 200 މިލިއަން ޑޮލަރު ބޭނުންވެއެވެ.