ކުރީ ސަރުކާރުން ހިންގި ގެދޮރުވެރިޔާ ސްކީމްގެ ދަށުން 4000 ފްލެޓް ލިބޭ މީހުންގެ ލިސްޓް، ކުރީ ސަރުކާރުން އާންމުކުުރި އިރު، ހަމައެކަނި އައިޑީކާޑެއް ހުށަހަޅައިގެން ފުލެޓް ލިބުނު މީހުންވެސް ހުރި ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.
ސަރުކާރަށް އަހަރު ފުރުން ފާހަގަކުރުމަށް ރޭ ސޯޝަލް ސެންޓަރުގައި ބޭއްވި ޖަލްސާގައި ރައީސް މުޢިއްޒު ވަނީ، މިހާތަނަށް ބެލިބެލުމުން ފުލެޓް ދިނުމުގައި ފާހަގަކުރެވިފައި ހުރި އުސޫލާއި ހިލާފު ބައެއް ކަންކަމުގެ ތަފްސީލު ދެއްވާފައެވެ.
އެގޮތުން ވިދާޅުވީ ކުރީ ސަރުކާރުން އެކުލަވާލި ގެދޮރުވެރިޔާ ކޮމިޓީގައި ހިމެނޭ ސިޔާސީ ފަރާތްތަކަށް ލިބޭ ގޮތަށް މާކްސް ބަދަލުކޮށްފައިވާކަމަށާ، އުސޫލާ ހިލާފަށް ކުރީ ސަރުކާރުގެ ސިޔާސީ ވެރީންގެ އާއިލަތަކަށް ފްލެޓް ދީފައިވާ ކަމަށެވެ.
އުސޫލާއި ހިލާފަށް، ސިޔާސީ ފަރާތްތަކުގެ އާއިލީ މީހުންނަށް ފްލެޓު ދީފައިއެބަހުރި. އުސޫލާއި ހިލާފަށް މި ދެންނެވި ނުފޫޒު ގަދަ އައިލާތަކުގެ، އެއް އާއިލާއެއްގެ އެތައް މެމްބަރުންނަށް ފްލެޓު ދީފައި އެބަހުރި، ޕޯޓަލްއަށް ހުށަހެޅި ފޯމުތަކުގެ އިތުރަށް ފްލެޓުދީފައި އެބަހުރި. މިއީކޮށްފައި ހުރި ކަންތައް. ފޯމު ހުށަނާޅައި، ހަމައެކަނި އައިޑީކާޑަށް ވެސް ފްލެޓުދީފައި އެބަހުރި. އަދި އައިޑީކާޑުގެ އެއްފަޅި. ދެން އެބޭފުޅުން ކޮން ވާހަކައެއްތޯ މި ދައްކަނީ. ޕޯޓަލްގެ ބެކްއެންޑުން މާކްޝީޓު ބަދަލުކޮށްފައި އެބަހުރި.
ރައީސް ޑރ މުޙައްމަދު މުޢިއްޒު
ރައީސް މުޢިއްޒު އިތުރަށް ވިދާޅުވިގޮތުގައި، މި ސަރުކާރުން ފުލެޓް ލިސްޓް ނެރޭއިރު، އެމީހަކަށް ފުލެޓް ނުލިބޭ ސަބަބުވެސް ވަރަށް ސާފުކޮށް ލިސްޓުގައި ފެންނަން އޮންނާނެއެވެ.
"ގެދޮރުވެރީން ކޮމެޓީގައި ހިމެނޭ ސިޔާސީ ފަރާތްތަކަށް ފްލެޓް ލިބޭ ގޮތަށް މާކުސް ބަދަލުކޮށްފައި އެބަހުރި. އެނގޭތޯ، މިއީ ކޮށްފައި ހުރި ކަންކަން. އަދަދުތަކާއެކު އަޅުގަނޑުމެން ލިސްޓް ނެރޭއިރުގައި ކޮންމެ މީހެއްގެ ނަން ކައިރީގައި އޮންނާނެ ތަފްސީލު. ވަރަށް ދެފުށްފެންނަ ލިސްޓެއް ނެރޭނީ،"
ރައީސް ޑރ މުޙައްމަދު މުޢިއްޒު
މިއާއެކު ރައީސް މުޢިއްޒު ވަނީ ފްލެޓް ދިނުމުގައި ނާއިންސާފު ވެވަޑައިނުގަންނަވާނެ ކަމުގެ ޔަގީންކަން ދެއްވާފައެވެ.
ގެދޮރުވެރިޔާ ސްކީމުގެ ދަށުން 4000 ފުލެޓް ލިބުނު މީހުންގެ ލިސްޓް ކުރީ ސަރުކާރުން ނެރުނީ ސަރުކާރު ނިމެން މަދު ދުވަސްކޮޅަކަށް ވެފައިވަނިކޮށެވެ. އެ ލިސްޓާއި ގުޅިގެން 200 އެއްހާ ޝަކުވާ އޭސީސީއަށް ހުށަހެޅުމުން، އޭސީސީން ވަނީ އެ މައްސަލަތަކުގެ ތަހްގީގެއް ކޮށްފައެވެ.
އެ ތަހުގީގުން އެނގުނު ގޮތުން، ފުލެޓް ދިން މީހުންގެ %60 އެއްހާ މީހުންގެ ޝަރުތު ހަމައެއް ނުވެއެވެ.
އެހެންކަމުން، ފުލެޓަށް އެދި ހުށަހެޅި ހުރިހާ ފޯމެއް ރިއިވެލުއޭޓު ކުރުމުގެ މަސައްކަތް "ހައުސިން އެޑްވައިޒަރީ ކޮމިޓީ" އާއި މާލެ ސިޓީ ކައުންސިލުން އެކުލަވާލި "ހައުސިން ކޮންސަލްޓެޓިވް ކޮމިޓީ"އިން ކުރަމުންދާއިރު، ކުރީ ސަރުކާރުން އެކުލަވައިލި ލިސްޓަކީ ރަނގަޅަށް އެކުލަވައިލި ލިސްޓެއް ކަމުގައި ގަބޫލުނުކުރެވޭ ކަމަށް އެ ދެކޮމިޓީން ވެސް ވަނީ ބުނެފަ އެވެ.
އެ ލިސްޓް އާންމު ކުރާނެ ކަމަށް ބުނެ ކުރީން އެތަައް ތާރީހެއް ދީފައިވާއިރު، މިދިޔަ ހޮނިހިރު ދުވަހުވެސް އިއުލާން ކުރައްވާނެ ކަމަށް ހައުސިން މިނިސްޓަރު ޑރ. އަލީ ހައިދަރު ވަނީ ވިދާޅުވެފައެވެ.
އެހެން ނަމަވެސް، އެދުވަހުވެސް ލިސްޓް ނުނެރެވި، މިނިސްޓްރީން ނެރުނު ބަޔާނެއް ވަނީ ފްލެޓަށް ހުށައަޅާފައިވާ 20،000 ވުރެ ގިނަ ފޯމް ބެލުމުގައި ކަށަވަރު ކުރަން ޖެހޭ ގިނަ ކަންތައްތަކެއް ހުރުމުން އިތުރު ވަގުތު ބޭނުންވާ ކަމަށް ބުނެ ވަކި ތާރީޚެއް ނެތި ލިސްޓް ނެރުން ފަސްކޮށްފައެވެ.
Advertisement
This content is created and paid for by advertisers and does not involve Voice Journalists
