ސަރުކާރަށް ޑޮލަރު ވަންނަ މިންވަރު އިތުރު ކުރުމަށް، ރިސޯޓް ތަކަށް ވަންނަ ޑޮލަރުން ބައެއް ރާއްޖޭގެ ބޭންކަށް މާރުކުރުމަށް އަދުގެ ސަރުކާރުން ނިންމި ނިންމުމަކީ ރަނގަޅު ނިންމުމެއް ކަމަށް ގާނޫނީ ވަކީލު އިބްރާޙީމް އިސްމާޢީލް (އިބްރާ) ވިދާޅުވެއްޖެއެވެ.

ޑޮލަރު މާރުކުރުމަށް އެމްއެމްއޭއިން މިފަހުން އެކުލަވާލި އައު އުސޫލް ބަދަލުކުރުމަށް ރާއްޖޭގެ ފަތުރުވެރިކަމުގެ ސިނާއަތުގެ އިސްސަފުގައި މަސައްކަތްކުރާ ބައެއް ބޭފުޅުން ވަނީ ސަރުކާރަށް ގޮވާލާފައެވެ. މީގެ ތެރޭގައި ޗަމްޕާ މުހައްމަދު މޫސާ އާއި ޔުނިވާސަލްގެ ޗެއާމަން މުހައްމަދު އުމަރު މަނިކު ހިމެނެއެވެ.

މިކަމާއި ގުޅިގެން އިބްރާ އެކްސްގައި ކުރެއްވި ޕޯސްޓެއްގައި ވިދާޅުވީ، އޭނާ އަކީ ރައީސް ޑރ މުހައްމަދު މުޢިއްޒާއި ދެކޮޅު ނުވަތަ އެއްކޮޅު ބޭފުޅެއްވެސް ނޫން ކަމަށެވެ. އަދި އެމަނިކުފާނުގެ ސަރުކާރުން އޭނާ ހިތްހަމަ ނުޖެހޭ ކަންތައްތަކާއި ރަނގަޅު ކަންތައްތައްވެސް ކުރަމުންދާ ކަމަށެވެ.

އިބްރާގެ އެ ވާހަކައާއި ގުޅިގެން، ދައުލަތުން ބުނާވަރަށް ޑޮލަރު މާރުކުރުމުން، ދައުލަތުން ދޭ ދިވެހި ރުފިޔާއިން ރިސޯޓް އޯނަރުން ކުރާނީ ކީއްތޯއާއި، ސަޕްލަޔަރުންނަށް ޓީޓީ ހެދޭނެތޯ އާއި މުވައްޒަފުންނަށް މުސާރަ ދެވޭނެތޯ މީހަކު ކުރި ސުވާލަށް ޖަވާބު ދެމުން އިބުރާ ބުނީ، ބެންކަށް ޑޮލަރު މާރުކުރުމުން ޓީ.ޓީ ހަދަން ބެންކަށް ދައްކާނީ ރުފިޔާ ކަމަށެވެ.

‏އަދި، މުސާރަދިނުމަށް ބެންކުން ޑޮލަރު ގަންނާނީ ކަމަށާ، އޭގެ ސަބަބުން ވޮޔަފާރިއަށްވާނީ ފަސޭހަ ކަމަށް ވިދާޅުވިއެވެ. އެކަމުގެ ސަބަބުން، ޑޮލަރުން އާމްދަނީ ނުލިބޭ މީހުނަށްވެސް ވިޔަފާރި ކުރެވޭނެ ކަމަށާ، ކާޑުން ވިޔަފާރިކުރަން ޑޮލަރު ލިމިޓެއް ނޯންނާނެ ކަމަށް ވިދާޅުވިއެވެ.