ކުށްކުރާ ކުޑަކުދިން އިސްލާހުކޮށް މުޖުތަމައުއަށް އަނބުރާ ގެނައުމަށް ސަރުކާރުން ގާއިމުކުރަން ނިންމާފައިވާ "ހޯޕް އައިލެންޑް" ގެ މަސައްކަތް މިއަހަރު ނިމުމުގެ ކުރިން ފަށަން މަސައްކަތް ކުރައްވަމުންދާކަމަށް ދާޚިލީ ސަލާމަތާއި ފަންނިއްޔާތާއި ބެހޭ ވަޒީރު، އަލީ އިހުސާން ވިދާޅުވެއްޖެއެވެ.

ވަޒީރު އިހުސާން މިފަދައިން ވިދާޅުވީ، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ސަރުކާރަށް 1 އަހަރު ފުރުމާއި ގުޅިގެން ސަންގު ޓީވީ އަށް ދެއްވި އިންޓަވިއުއެއްގައެވެ.

މިގޮތުން ވަޒީރު އިހުސާން ވިދާޅުވީ، ހޯޕް އައިލެންޑަކީ ކުށުގެ މައްސަލަތަކަށް ވަރަށް ބޮޑު ހައްލެއް ގެންނާނެ ޕްރޮޖެކްޓެއް ކަމަށާއި، މި ކަމަށްޓަކައި، ދ.ވާނީ ހަމަޖައްސައި، ޑިޒައިންގެ މަސައްކަތް ނިންމާފައިވާކަމަށެވެ.

ކުރިއަށް އޮތް ތަނުގައި، މިއަހަރު ނިމުމުގެ ކުރިން އެތަން ކްރޮސް ސަބްސިޑީގެ އުސޫލުން އިންވެސްޓް ކުރާ ފަރާތެއް ހޯދާ، އެ ފަރާތަކަށް ޕްރޮޖެކްޓް އެވޯޑްކޮށް މި މަސައްކަތް ފަށަން އަމާޒުކުރައްވާކަން ވަޒީރު އިހުސާން ވަނީ ހާމަކުރައްވާފައެވެ.

އެކި ކުށްތަކަށް އަރައިގަންނަ ކުދިން ދައުލަތުގެ ބެލުމުގެދަށަށް ގެނެސް، އެކުދިން ރިހިބިލިޓޭޓް ކުރުމަށް ޚާއްސަ ފެސިލިޓީއެއް ވަކި ރަށެއްގައި ހެދުމަށް ނިންމާފައިވާކަން ވަޒީރު އިހުސާން ހާމަކުރެއްވީ މިއަހަރުގެ އޭޕްރީލް މަހުގެ 6 ވަނަ ދުވަހުގައެވެ.

މިގޮތުން، އިހްސާން ވިދާޅުވީ، ދިގު މުއްދަތަށް ދައުލަތު ބެލުމުގެ ދަށަށް ކުދިން ނެގޭނީ، ގާނޫނުގެ ދަށުން، ކޯޓު ހުކުމެއްގެ ތެރެއިން ކަމަށެވެ.

ހޯޕް އައިލެންޑުގެ ގޮތުގައި ދ. ވާނީ ހަމަޖައްސާފައިވާއިރު، އެއްފަހަރާ 400 ކުދިން މިތަނުގައި ބައިތިއްބައިގެން ރިހެބިލިޓޭޓް ކުރެވޭނެކަމަށާއި، ކޮންމެ ދުވަހެއްގެ ފަތިސް ނަމާދުން ފެށިގެން، ދީނުގައި މަޖުބޫރުކުރާ ހުރިހާ ކަމެއް އެ ކުދިން ލައްވައި ކުރުވައި، ރަސްމީ ތައުލީމާއި ކަސްރަތު ކުރުން އަދި އެކި ހުނަރުތައް ދަސްކޮށްދިނުމުގެ ޕްރޮގްރާމްތައް ހިންގުމަށް ނިންމާފައިވާ ކަމަށްވެސް ވިދާޅުވެފައިވެއެވެ.

މީގެ އިތުރުން މިތަނުގައި ދިރިއުޅޭ ކުދިން 18 އަހަރު ވަންދެން އެތަނުގައިއުޅޭނެ ކަމަށާއި އެއަށްފަހު ދިވެހި ފުލުހުން ނުވަތަ ދިވެހި ސަފައިންގެ ޚިދުމަތުންކުރެ ތަނެއްގައި ވަކި މުއްދަތެއް ވަންދެން އެކުދިން ޚިދުމަތް ކުރަންޖެހޭ ގޮތަށް ސަރުކާރުން ނިންމާފައިވާކަމަށް ވަޒީރު އިހުސާން ވިދާޅުވިއެވެ.