މޯލްޑިވްސް ބްރޯޑްކާސްޓިން ކޮމިޝަނުގެ މެމްބަރުކަމަށް ކުރިމަތިލުމުގެ ފުރުސަތު ހުޅުވާލައިފިއެވެ.

މިކަމާ ގުޅޭގޮތުން ރައީސް އޮފީހުން ކުރި އިއުލާނެއްގައި ބުނެފައިވަނީ، ކޮމިޝަނުގައި މިހާރު ތިއްބެވި މެންބަރުންގެ ތެރެއިން ދެ މެންބަރެއްގެ މުއްދަތު ހަމަވާތީ، އެ ކޮމިޝަނަށް މެންބަރުން ޢައްޔަންކުރެއްވުމަށްޓަކައި މެންބަރުކަމުގެ މަގާމަށް ކުރިމަތިލުމުގެ ފުރުޞަތު، މިއަދުން ފެށިގެން ހުޅުވާލާފައިވާކަމަށެވެ. 

ކޮމިޝަނުގެ މެމްބަރުކަމަށް ކުރިމަތިލުމަށް ދީފައިވާ އެންމެ ފަހު ތާރީހަކީ މިހިނގާ ނޮވެމްބަރުމަހުގެ 26 ވަނަ ދުވަހުގެ 12:00 އެވެ.

ބްރޯޑްކޮމްގައި މިހާރު ތިއްބެވި މެމްބަރުންގެ ތެރެއިން އެންމެ އަވަހަށް މުއްދަތު ހަމަވާނެ ދެ މެމްބަރުންނަކީ ކޮމިޝަނުގެ ރައީސާ މަރިޔަމް ވަހީދާގެ އިތުރުން، މެމްބަރު އަލީ ޔޫސުފެވެ.

ބްރޯޑްކާސްޓިން ކޮމިޝަނަކީ ޓީވީ އާއި ރޭޑިއޯގެ ރެގިއުލޭޓްކޮށް ބަލަހައްޓާ ފަރާތެވެ. ބްރޯޑްކޮމްގެ ދެ މެމްބަރެއްގެ ދައުރު ހަމަވާން ކައިރިވެފައިވާއިރު، ބްރޯޑްކޮމް އާއި މޯލްޑިވްސް މީޑިއާ ކައުންސިލް އުވާލައި އެއް ކޮމިޝަނުގެ ދަށަށް މީޑިއާތައް ގެނައުމަށް ތުޅާދޫ ދާއިރާގެ މެމްބަރު އަބްދުލް ހަންނާނު ވަނީ ރައްޔިތުންގެ މަޖިލީހަށް ބިލެއް ހުށަހަޅާފައެވެ.