ޑޮލަރު މާރުކުރުމާ ގުޅޭގޮތުން އެންމެފަހުން އެކުލަވާލި އުސޫލަށް ބަދަލު ގެނެސްފައި ނުވާނޭކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފިއެވެ.

މަރުކަޒީ ބޭންކުން ވަނީ، ރާއްޖޭގައި ހިންގާ ވިޔަފާރިތަކުގެ ތެރެއިން ޓޫރިޒަމް ވިޔަފާރިކުރާ ފަރާތްތަކުން ރާއްޖޭގެ ބޭންކްތަކަށް ޑޮލަރު މާރުކުރުން ލާޒިމްވާގޮތަށް މިހިނގާ އޮކްޓޯބަރުމަހުގެ އެއްވަނަ ދުވަހު، އައު އުސޫލެއް އެކުލަވާލާފައެވެ. މިކަމާ ގުޅިގެން ޓޫރިޒަމް ދާއިރާގެ ބައެއްވިޔަފާރިވެރިން ވަނީ އެ އުސޫލު މުރާޖައާކުރުމަށް ގޮވާލާފައެވެ.

ޑޮލަރު މާރުކުރުމުގެ އައު އުސޫލުގެ މައްސަލަ ބޮޑުވެފައިވާ މި ދަނޑިވަޅުގައި ސޯޝަލް މީޑިއާގައި ބައެއް ފަރާތްތަކުން ދަނީ އެމްއެމްއޭއިން އެ އުސޫލު މުރާޖައާކޮށް ބަދަލު ގެނެސްފައިވާކަމަށް ބުނެފައެވެ.

Advertisement

މިކަމާ ގުޅިގެން މަރުކަޒީ ބޭންކުން މިރޭ ބުނެފައިވަނީ، ބޭންކްތަކަށް ޑޮލަރު މާރުކުރުން ލާޒިމްވާގޮތަށް މިހިނގާ އޮކްޓޯބަރުމަހުގެ އެއްވަނަ ދުވަހު، އާއްމުކުރި އުސޫލު އަދިވެސް އޮތީ އެގޮތުގައި ކަމަށެވެ. އެ އުސޫލަށް އެއްވެސް ބަދަލެއް އަދި މިހާތަނަށް ގެނެސްފައި ނުވާނޭކަމަށް އެމްއެމްއޭއިން ބުންޏެވެ.

ޑޮލަރު މާރުކުރުމުގެ އުސޫލަށް ތަބާނުވާނޭކަމަށް ޓޫރިޒަމްގެ ބޮޑެތި ބައެއް ވިޔަފާރިވެރިން ހާމަކޮށްފައިވަނިކޮށް މިކަމާ ގުޅޭގޮތުން ރައީސް ޑރ މުއިއްޒު ރޭ ވިދާޅުވެފައިވަނީ، އެމްއެމްއޭގެ އައު އުސޫލާ އެއްގޮތަށް ޑޮލަރު މާރުކުރުން ނޫންގޮތެއް ނެތްކަމަށެވެ. 

ރައީސް ޑރ.މުއިއްޒު ވަނީ އަންނަ ޖެނުއަރީމަހުން ފެށިގެން ޑޮލަރު މާރުކުރުމުގެ ގަވާއިދަށް އަމަލުކުރަން ފައްޓަވާނޭ ކަމަށާއި، އެއުސޫލަށް ބަދަލު ގެނެވެން ނެތްކަމަށް ވިދާޅުވެފައެވެ.