ޗައިނާއިން ރަޝިޔާއާއެކު ކުރާ ވިޔަފާރީގެ ސަބަބުން ވިލާތުގެ ގައުމުތަކުގެ ސަލާމަތާއި ރައްކާތެރިކަމަށް ނުރައްކާވާކަމަށް ނެދަލެންޑްސްގެ ޚާރިޖީ ވަޒީރު ކެސްޕަރ ވެލްޑްކެޕްމް ވިދާޅުވެއްޖެއެވެ.
ނެދަލެންޑްސްވެސް ބައިވެރިވާ އަސްކަރީ ޖަމާޢަތްކަމަށްވާ ނޭޓޯއިން ދެކޭ ގޮތުގައި ޗައިނާއަކީ ރަޝިޔާއިން ޔޫކްރެއިންގައި ކުރަމުންދާ ހަނގުރާމައިގެ ބައިވެރިއެކެވެ. ސަބަބަކީ ޗައިނާގެ އެކި ޓެކްނޮލޮޖީތައް ރަޝިޔާގެ އަސްކަރީ އުޅަނދުފަހަރާއި މިސައިލްތަކުގައި ހުރުމެވެ.
ވެލްޑްކެޕްމް ވިދާޅުވީ މިމައްސަލަ ޗައިނާގެ ޚާރިޖީ ވަޒީރު ވާންގް ޔީ އާއެކު ދެފަހަރަކު ހިއްސާކުރެވިފައިވާ ކަމަށާއި، ވިލާތުގެ އެހެން ގައުމުތަކުންވެސް ޗައިނާއިން ރަޝިޔާއަށް ވާގިވެރިވުމުގެ ސަބަބުން އެގައުމުތަކުގެ ސަލަމާތަށް ނުރައްކާވާކަން ޗައިނާއަށް އަންގަން ޖެހޭކަމަށް ދެކެވަޑައިގަންނަވާކަމަށެވެ. ވެލްޑްކެޕްމް މި މޭރުމުން ވާހަކަފުޅު ދެއްކެވީ ބެލްޖިއަމްގެ ވެރިރަށް ބްރަސަލްސްގައި ވިލާތުގެ އިއްތިހާދުގެ މެމްބަރު ގައުމުތަކުގެ ޚާރިޖީ ވަޒީރުންގެ ބައްދަލުވުމެއްގައެވެ.
ޗައިނާގެ ކުންފުނިތަކަށް ވިލާތުގެ ގައުމުތަކާއި، އެމެރިކާ އަދި ޖަޕާނުގެ ޓެކްނޮލޮޖީތައް ދިޔުން ހުއްޓުވުމަށް އެގައުމުތަކުން ގުޅިގެން ގިނަ މަސައްކަތްތަކެއް ދަނީ ކުރަމުންނެވެ. ޚާއްސަކޮށް ޗިޕް އުފެއްދުމުގެ ދާއިރާގައި ޗައިނާއިން ކުރި ހޯދަން ކުރަމުންދާ މަސައްކަތްތަކަށް އެޅެން އޮތް ހުރަހެއް އެގައުމުތަކުން އަޅަމުން ދިޔަނަމަވެސް، ޗައިނާގެ ސަރުކާރާއި ގުޅިފައިވާ ކުންފުނިތަކުން ހުޅަނގުގެ ޓެކްނޮލޮޖީ ވަގަށް ނަގަމުންދާކަމަށްވެސް ތުހުމަތުކުރެވެއެވެ.
Advertisement
This content is created and paid for by advertisers and does not involve Voice Journalists
