ފުވައްމުލަކު ސިޓީގައި މިހާރު ކުރިއަށްދާ "މައި ފުވައްމުލައް ބާބާ ގާޑިޔާ ފުޓްސަލް ޓޯނަމަންޓް 2024" ގެ ފައިނަލް މެޗު މިރެއަށް އަވަސްކޮށްފިއެވެ.

ވޮއިސް ސްޕޯޓްސްއަށް މައުލޫމާތު ދެމުން ހަސަން އަތީޤް (ބާބާ) ބުނީ ކުރިން މިމަހުގެ 20 ވަނަ ދުވަހުގެ ރޭ ކުޅެން ޝެޑިއުލްކޮށްފައިވާ މިސްކިތްމަގު އެންމެންގެ ގުޅުމާއި ދަޑިމަގު ސްޕޯޓްސް އެންޑް ރެކްރިއޭޝަން (ޑީއެސްއާރުސީ) ވާދަކުރާ ފައިނަލް މެޗު މިރޭ 20:30 އަށް އަވަސްކޮށްފައިވާ ކަމަށެވެ.   

މުބާރާތުގެ ފައިނަލަ މެޗު އަވަސްކުރަންޖެހުނީ މިމަހު 20 ގައި މާލޭ ސިޓީގައި ފެށުމަށް ހަމަޖެހިފައިވާ ގޯލްޑް ކަޕް ފުޓްބޯޅަ މުބާރާތުގައި ވާދަކުރާ ފުވައްމުލައް ސިޓީގެ ޓީމާއެކު މިމުބާރާތުގެ ފައިނަލުގައި ވާދަކުރާ ދެޓީމުގެ 14 ކުޅުންތެރިންއަކު މިރޭ މާލެ ފުރާތީއެވެ.

އިތުރަށް ވާހަކަ ދައްކަމުން ބާބާ ބުނީ މިރޭގެ ފައިނަލް މެޗަކީ ފުޓްސަލްގައި ފުވައްމުލައް ސިޓީގެ އެންމެ ވާދަވެރި ދެއަވަށް ކަމަށްވާ މިސްކިތްމަގާއި ދަޑިމަގުގެ ކުރިމަތިލުމެއްކަމަށެވެ. އަދި މުބާރާތުގައި މިދެޓީމުގެ ފަރާތުން މިހާތަނަށް ފެނިގެންދިޔަ ކުޅުމަށް ބަލާއިރު، ދަނޑު މަތިންނާއި ދަނޑު ބޭރުންވެސް މިމެޗުގެ ފޯރި ވަރަށް ގަދަވެގެން ދާނެކަމަށެވެ.

މިމުބާރާތުގައި މިއަހަރު 12 ޓީމަކުން ވާދަކުރަމުންއަންނައިރު، މުބާރާތް ކުރިއަށްދަނީ ބައިވެރިވި 12 ޓީމު ތިން ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ދެޓީމުގެ އިތުރުން ތިން ގުރޫޕުން ދެވަނަ ހޯދާ ތިން ޓީމުގެ ތެރެއިން އެންމެ ނަތީޖާ ރަނގަޅު ދެޓީމަށް ވެސް މުބާރާތުގެ ކުއާޓާ ފައިނަލުން ވަނީ ފުރުސަތު ލިބިފައެވެ.
11 ނޮވެމްބަރު 2024 އިން 19 ނޮވެމްބަރު 2024 ގެ ނިޔަލަށް ފުވައްމުލަކު ސިޓީގައި ކުރިއަށްދާ މިމުބާރާތުގެ ޗެންޕިއަން ޓީމަށް 30،000 އަދި ރަނަރަޕް ޓީމަށް 15،000 ރުފިޔާގެ ފައިސާގެ އިނާމެއް ހުށަހަޅާފައިވާއިރު، މިއަހަރުގެ މުބާރާތުގެ މީޑިއާ ޕާޓްނަރަކީ ވޮއިސް ސްޕޯޓްސް އެވެ.