އިކުއެޑޯގައި ހަނަފަސްކަމާއި އަލިފާނުގެ ހާދިސާތައް އިންތިހާއަށް އިތުރުވުމާއި ގުޅިގެން، 60 ދުވަހަށް ކުއްލި ނުރައްކަލުގެ ހާލަތު އިއުލާންކޮށްފިއެވެ.

މިކަން ހާމަކޮށްފައިވަނީ އިކުއެޑޯގެ ސެކްރެޓޭރިއަޓް ފޯ ރިސްކް މެނޭޖްމަންޓް (އެސްއެންޖީއާރު) އިން ހޯމަ ދުވަހު ނެރުނު ބަޔާނެއްގައިއެވެ.

މިގޮތުން، ރިސްކް މެނޭޖްމަންޓް ސެކްރެޓަރީ ޖޯޖް ކެރިލޯ ވިދާޅުވީ، މިހާރު ވެސް ގާތްގަނޑަކަށް 120 ދުވަހަށް ދެމިގެން ގޮސްފައިވާ މި ހަނަފަސްކަމުގެ ގެއްލުން މުޅި ގައުމު ތަހައްމަލު ކުރަމުންދާކަމަށެވެ. 

އެގައުމުގެ ޖަންގަލީގައި ރޯވެފައިހުރި 13 އަލިފާންގަނޑެއް ނިއްވުމުގެ މަސައްކަތް އެގައުމުގެ ކަމާ ބެހޭ ފަރާތްތަކުން ކުރަމުން އަންނައިރު، މިހާތަނަށް ވަނީ އިތުރު 9 އަލިފާންގަނޑެއް ނިއްވާލާފައެވެ.

އެގައުމުގެ ދެ ސަރަހައްދެއްގައި ހިނގި  ހާދިސާތަކުގެ ސަބަބުން ގާތްގަނޑަކަށް 10،200 ހެކްޓަރ (25،204 އަކަފޫޓު) ގެ ބިމަށް ވަނީ އަސަރުކޮށްފައިވާކަމަށް ކަމާބެހޭ ފަރާތްތަކުން މައުލޫމާތުދެއެެވެ.

ފާއިތުވި 60 އަހަރު ތެރޭގައި ތަޖުރިބާ ނުކުރާހާ ބޮޑު ހަނަފަސްކަމެއް އިކުއަޑޯ އަށް ކުރިމަތިވެ، ހައިޑްރޯ އިލެކްޓްރިކް ޕްލާންޓްތަކުގެ އުފެއްދުންތެރިކަމަށް އަސަރުކުރުމާއި ގުޅިގެން މިއަހަރުގެ އޮކްޓޫބަރު މަހުން ފެށިގެން އެގައުމުގެ ސަރުކާރުން، ދުވާލަކު 14 ގަޑިއިރަށް ކަރަންޓު ކަނޑަމުން އަންނަކަން ވެސް ފާހަގަކޮށްލަން ޖެހެއެވެ.