ބޭންކް އޮފް މޯލްޑިވްސް (ބީއެމްއެލް) ގެ ވޭސްޓް މެނޭޖްމަންޓް ގްރާންޓް ޕްރޮޖެކްޓް ކާމިޔާބުކުރި ޖަމިއްޔާތައް އިއުލާނުކޮށްފިއެވެ.
މި ޕްރޮޖެކްޓަކީ ދިވެހިރާއްޖޭގައި ދެމެހެއްޓެނިވި ގޮތެއްގައި ކުނި މެނޭޖްކުރުމުގެ އާދަތައް ކުރިއެރުވުމަށް އަމާޒުކޮށްގެން ބީއެމްއެލުން ކުރިއަށް ދިޔަ ޕްރޮޖެކްޓެކެވެ.
މި ޕްރޮޖެކްޓް ކާމިޔާބު ކުރި 2 ޖަމިއްޔާއަކީ ލިވް އެންޑް ލާރން އެންވަޔަރަންމަންޓަލް އެޑިޔުކޭޝަން މޯލްޑިވްސް އަދި މޯލްޑިވްސް އޯޝަން ޕްލާސްޓިކް އެލަޔަންސް (މޯޕާ) އެވެ.
މީގެ ތެރެއިން ލިވް އެންޑް ލާރން އެންވަޔަރަންމަންޓަލް އެޑިޔުކޭޝަން މޯލްޑިވްސް އަށް ތިން ގްލާސް ކްރަޝާ މެޝިން ބޭންކުން ފޯރުކޮށްދިނުމަށް ހަމަޖެހިފައިވާއިރު، އާލާތްތައް ލިބޭ ރަށްތަކަކީ ކ. ގާފަރު، އއ. އުކުޅަސް އަދި އދ. ދިގުރަށެވެ.
ހަމައެއާއިއެކު، ބީއެމްއެލްގެ ފަރާތުން މޯލްޑިވްސް އޯޝަން ޕްލާސްޓިކް އެލަޔަންސް (މޯޕާ) އަށް އެއް ގްލާސް ކްރަޝަރ މެޝިން އަދި އެއް ބޭލަރ ފޯރުކޮށްދޭއިރު، މި އާލާތްތައް ލިބިގެންދާނީ ހުޅުމާލެއަށެވެ.
މިކަމާއި ގުޅިގެން ބީއެމްއެލުން ބުނީ، މި މަސައްކަތުން ކުނިގޮނޑުތަކަށް އުކާލެވޭ ކުނީގެ މިންވަރު މަދުކޮށް، ކުނި ނައްތާލުމުގެ ޚަރަދު ކުޑަކޮށް، އަދި ހަރުދަނާ ގޮތެއްގައި ރީސައިކަލްކުރުމުގެ މަސައްކަތް ކުރިއެރުވޭނެކަމަށާއި، މި ޕްރޮޖެކްޓަކީ ދެމެހެއްޓެނިވި މުޖުތަމަޢުތަކެއް ބިނާކުރުމަށާއި ތިމާވެށި ރައްކާތެރިކުރުމަށް ބޭންކުން ކުރަމުންދާ މަސައްކަތްތަކުގެ ތެރެއިން ހިންގުނު މަޝްރޫއެއް ކަމަށެވެ.
Advertisement
This content is created and paid for by advertisers and does not involve Voice Journalists
