ކާކުކަން ނޭނގޭ ގޮތަށް އިންޓަނެޓް ބޭނުންކުރުމަށާއި، ބްލޮކް ކޮށްފައިވާ ވެބްސައިޓްތަކަށް ވަނުމަށް ބޭނުންކުރާ ވަރޗުއަލް ޕްރައިވެޓް ނެޓްވޯކް (ވީ.ޕީ.އެން) ބޭނުންކުރުމަކީ އިސްލާމް ދީނުގައި ހުއްދަކަމެއް ނޫންކަމަށް ޕާކިސްތާނުގެ ކައުންސިލް އޮފް އިސްލާމިކް އައިޑިއޮލޮޖީ އިން ފަތުވާ ދީފިއެވެ.
މި ކައުންސިލަކީ ޕާކިސްތާނުގެ ގާނޫނު އަސާސީގެ ދަށުން އުފައްދާފައިވާ، ސަރުކާރަށާއި ޤާނޫނު ހަދާ މަޖިލީހަށް ދީނީ އަދި ޝަރުޢީ ކަންކަމުގައި ލަފާދޭ ކައުންސިލެކެވެ. ޕާކިސްތާނުގެ ސަރުކާރުން އިންޓަނެޓް ސެންސަރކުރުމަށް ކުރަމުންދާ މަސައްކަތަށް އެއްބާރުލުން ދިނުމަށް އެކައުންސިލުން މިފަދަ ފަތުވާއެއް ނެރުމުން، ސިޔާސީ ހަތިޔާރާކަށް ދީން ނެހެދުމަށް ގިނަ ބަޔަކު ދަނީ ގޮވާލަމުންނެވެ.
ސައިބަރ ސެކިއުރިޓީ ވަރުގަދަކުރުމަށް ކަމަށް ބުނެ ޕާކިސްތާން ސަރުކާރުން ވަނީ އިންޓަނެޓް ފަޔަރވޯލްއެއް މުޅި ޕާކިސްތާނުގައި އަޅާފައެވެ. އަދި ވީ.ޕީ.އެން ބޭނުންކުރާ ފަރާތްތަކުން ޕާކިސްތާނުގެ ޓެލެކޮމް އޮތޯރިޓީގައި ރަޖިސްޓްރީކުރުމަށްވެސް ސަރުކާރުން ވަނީ އަންގާފައެވެ.
ވީޕީއެން ބޭނުންކުރުން ދީނުގައި ހުއްދަ ނޫންކަމަށް ކައުންސިލް އޮފް އިސްލާމިކް އައިޑިއޮލޮޖީއިން ބުނިއިރު، ފަޔަރވޯލްގެ ސަބަބުން ނުވަދެވޭ ސައިޓްތަކަށް ވަނުމަށް ޕާކިސްތާނުގެ ސަރުކާރު އޮފިޝަލުން މިހާރުވެސް ގެންދަނީ ވީޕީއެން ބޭނުންކުރަމުންނެވެ. އެގޮތުން ގިނަ އިދާރާތަކެއްގެ އެކްސް (ކުރީގެ ޓްވިޓަރ) އެކައުންޓްތައް އޮޕަރޭޓްކުރުމަށްވެސް ވީޕީއެން ދަނީ ބޭނުންކުރަމުންނެވެ.
Advertisement
This content is created and paid for by advertisers and does not involve Voice Journalists
