ތައިލެންޑާއި އެކުވެރި އަރަބި އިމާރާތް (ޔޫއޭއީ) އިން އާސަންދަ ލިބޭނޭ ދުވަހެއް ވަރަށް އަވަހަށް އިއުލާނު ކުރައްވާނޭކަމަށް، އެންސްޕާގެ ސީއީއޯ ހީނާ ވަލީދު ވިދާޅުވެއްޖެއެވެ.
މިއަދު ކުރިއަށްދިޔަ ރައްޔިތުން މަޖިލީހުގެ އިޖުތިމާއީ ކޮމިޓީގައި ވާހަކަދައްކަވަމުން ހީނާ ވިދާޅުވީ، ތައިލެންޑާއި ޔޫއޭއީގެ ހޮސްޕިޓަލްތަކުން އާސަންދަ ލިބޭނޭ އިންތިޒާމު ހަމަޖެއްސުމަށްޓަކައި އެކަމާ ގުޅޭ މުއާމަލާތްތައް ކުރިއަށްގެންދާކަމަށެވެ. އެކަމަކީ ރައީސުލްޖުމްހޫރިއްޔާގެ ވައުދުފުޅެއްކަމަށާއި، ރައީސްގެ އެ ވައުދުފުޅު ފުއްދަވާނޭކަމަށް ހީނާ ވިދާޅުވިއެވެ.
ޔޫއޭއީ އަދި ތައިލެންޑުގެ ހޮސްޕިޓަލްތަކުން އާސަންދަ ހަމަޖެއްސުމަށްޓަކައި މިހާތަނަށް ކުރިއަށްދިޔަ ވާހަކަތަކުގެ ނަތީޖާތައް ވަރަށް ރަނގަޅުކަމަށް ހީނާ ވިދާޅުވިއެވެ. އެގޮތުން އެކަމުގައި ކުރިއަށްދާނެ ގޮތެއް ކަނޑައެޅިފައިވާކަން އޭނާ ވަނީ ފާހަގަކުރައްވާފައެވެ.
ޔޫއޭއީ އާއި ތައިެލންޑުން އާސަންދަ ލިބޭނޭ އިންތިޒާމު ހަމަޖައްސަވާނޭކަމަށް ރައީސް ޑރ.މުއިއްޒު ވިދާޅުވެފައިވަނީ، މިއަހަރުގެ ޖެނުއަރީމަހު ޗައިނާއަށް ކުރެއްވި ފުރަމާނަ ދަތުރުފުޅު ނިންމަވާލެއްވުމަށްފަހު ރާއްޖެ ވަޑައިގެން އެއަރޕޯޓްގައި ނޫސްވެރިންނާ ވާހަކަދައްކަވަމުންނެވެ.
ނޫސްވެރިންނާ ވާހަކަދައްކަވަމުން ރައީސް ވިދާޅުވެފައިވަނީ، މިހާރު އާސަންދަ ލިބޭ ގައުމުތަކަށް ވުރެ މާ ފެންވަރު ރަނގަޅު، މާ މަތީ ފަންތީގެ ގައުމުތަކުން އާސަންދަ ލިބޭގޮތް ހަމަޖައްސަން މަސައްކަތްކުރައްވާނެ ކަމަށެވެ.
ކުރިއަށް އޮތް ތާގައި އަޅުގަނޑުމެންގެ އާސަންދައަކީ ހަމައެކަނި ވަކި ދިމާލަކުން ހުންނަ، ވަކި ގައުމެއްގައި ހުންނަ މެޑިކަލް ފެސިލިޓީތަކުން އެކަނި ގޮސްގެން ބޭނުންކުރެވޭ އެއްޗަކަށް ނުހަދައި އެއަށް ވުރެ ފެންވަރު ރަނގަޅު ގައުމުތަކަށް ޔޫއޭއީއަށާއި ތައިލެންޑަށް އިރާދަކުރެއްވިއްޔާ އަޅުގަނޑުމެންގެ އާސަންދަ ފުޅާކުރާނަން
ރައީސް ޑރ.މުއިއްޒު ވިދާޅުވިއެވެ.
އެދުވަހު ރައީސް ވަނީ، ސަރުކާރުގެ އަމާޒަކީ އެ ތަންތަނަށް ދަތުރުކުރާއިރު ހުރުމަށްދާ ޚަރަދު ވެސް އާސަންދައިގެ ތެރެއިން ކަވަރުވާނެގޮތް ހެއްދެވުން ކަމަށެވެ.
ކުރިއަށްއޮތް ދުވަސްތަކުގެ ތެރޭގައި އާސަންދައަށް ސަލާންޖަހަން ނުޖެހޭ ހަރުދަނާ އެދެވޭފަދަ ބަދަލެއް ގެންނާނޭކަމަށް ސަރުކާރުން ވަނީ ހާމަކޮށްފައެވެ.
Advertisement
This content is created and paid for by advertisers and does not involve Voice Journalists
