ސަރުކާރާ ގުޅޭގޮތުން އެމްޑީޕީން ދޮގު ހަބަރުތައް ފަތުރާތީވެ، ވެރިކަންކުރާ މައި ޕާޓީ، ޕީއެންސީން އެކަން ކުށްވެރިކޮށްފިއެވެ.

ސަރުކާރަށް އަހަރުފުރުމާ ގުޅިގެން އެމްޑީޕީން މީޑިއާގެ ވަސީލަތްތަކުގައި ސަރުކާރާ ގުޅޭގޮތުން ދައްކަމުންދާ ވާހަކަތަކަށް ރައްދުދެމުން ޕީއެންސީން ނެރެފައިވާ ބަޔާނެއްގައި ބުނެފައިވަނީ، ރައްޔިތުންނަށް ހެކިތައް ފެންނަން ހުރިއިރުވެސް ހަގީގަތް އޮޅޭގޮތަށް އެމްޑީޕީން ސަރުކާރާ ގުޅުވައިގެން ހަގީގަތާ ހިލާފް ވާހަކަތައް ފަތުރަކުންދާކަމަށެވެ.

އިދިކޮޅު ސިޔާސީޕާޓީއެއްގެ މަގާމު އަދާކުރަންޖެހޭ އަދި ދައުލަތުން ފައިސާދީގެން ހިންގާ އެމްޑީޕީން މައުލޫމާތު ފަތުރަމުންދަނީ ރައްޔިތުންނަށް ވަރަށްބޮޑަށް އޮޅޭގޮތަށްކަން ފާހަގަކުރަމުން ޕީއެންސީން ބުނީ މިކަމަކީ ބަލައި ގަނެވޭނެ ކަމެއް ނޫންކަމަށެވެ.

ޕީއެންސީން ބުނީ ފާއިތުވެދިޔަ އެއް އަހަރުދުވަހުގެ ތެރޭގައި ރައީސުލްޖުމްހޫރިއްޔާ ޑރ.މުއިއްޒުގެ ޒައާމަތުގައި ސަރުކާރު ހިންގާފައިވަނީ ޒިންމާދާރު ކަމާއެކު ރައްޔިތުންގެ މާލިއްޔަތަށް އަމާނާތްތެރިވުމާއެކު ހާމަކަން ބޮޑު ގޮތެއްގައި ރައްޔިތުންނަށް މައުލޫމާތުތައް ފޯރުކޮށްދީގެން ކަމަށެވެ. މިގޮތުން މިއަހަރު ހަރަދުތައް ކުޑަކުރުމަށް ކުރެވުނު މަސައްކަތްތަކާއެކު، ޖުމްލަ ގޮތެއްގައި ކޮންމެ އަހަރަކު 15 އިންސައްތައަށް ދައުލަތުގެ ހަރަދުތައް އިތުރުވި މިންވަރު 2.5 އިންސައްތައަށް ދަށްކޮށްފައިވާކަމަށެވެ.

ދައުލަތުގެ ހަރަދުތައް ކުޑަކުރުމާއެކު، ބަޖެޓް ޑެފިސިޓް ހިފެހެއްޓިފައިވާކަމަށާއި މިގޮތުން މިއަހަރުގެ ޖުމްލަ ބަޖެޓް ޑެފިސިޓް 378 މިލިއަން ރުފިޔާއަށް ދަށްކޮށްފައިވާކަމަށް ޕީއެންސީން ބުންޏެވެ.

ޕީއެންސީގެ ބަޔާނުގައި ބުނީ މި ސަރުކާރުން ހާމަކަން ބޮޑު ގޮތެއްގައި ރައްޔިތުންނަށް ހުރިހާ މައުލޫމާތެއް ފޯރުކޮށްދެމުން ދާކަމަށެވެ. މިގޮތުން ހުށަހަޅާ އާރުޓީއައި ތަކަށާއި، މިދިޔަ އަހަރެއްހާ ދުވަހުގެ ތެރޭގައި 70 އަށްވުރެ ގިނަ ނޫސްވެރިންނާ ބައްދަލުކޮށް، 700 އަށްވުރެ ގިނަ ފަހަރު ސަރުކާރުގެ ވަޒީރުން އެކި މީޑިއާތަކަށް މައުލޫމާތު ފޯރުކޮށްދީފައި ވާނޭ ކަމަށެވެ.