ރައްޔިތުންގެ މަޖިލީހުގެ މާމިގިލި ދާއިރާގެ މެމްބަރު އަދި ޖުމްހޫރީ ޕާޓިގެ ލީޑަރު، ޤާސިމް އިބްރާހީމްގެ ނަމުގައި ސްކޭމެއް ހިންގަމުންދާތީ އެކަމަށް ސަމާލުވުމަށް އެދިވަޑައިގެންފިއެވެ.

ޤާސިމް އިބްރާހީމް އެކްސްގައި ކުރެއްވި ޕޯސްޓެއްގައި ވިދާޅުވީ، މި ސްކޭމް ހިންގަމުންދަނީ ސޯޝަލް މީޑިއާގެ އެކިމަންސަތަކުގައި، ޚާއްޞަ ކޮށް ޓިކްޓޮކް، އިންސްޓަރގްރާމް އަދި ފޭސްބުކްގައި އާޓިފިޝަލް އިންޓެލިޖެންސް ގެ އެހީގައި ތައްޔާރުކޮށްފައިވާ އެބޭފުޅާގެ  ފޮޓޯއާއި، ވީޑިއޯ ބޭނުންކޮށްގެންކަމަށެވެ.

މިގޮތުން، އެކިކަހަލަ އޮފްޝޯ ޓްރޭޑް ކުރުމަށާއި، އިންވެސްޓްކޮށް އަވަހަށް ނަފާ ލިބޭނެ ފަދަ މާލީ މުޢާމަލާތްތަކުގެ ފުރުސަތު ހޯދައިދޭކަމަށް ދައްކުވައިދީ، އަދި ރާއްޖޭގެ ޤައުމީ ބޭންކް މެދުވެރިވެ މި ސްކީމުގެ ފައިދާލިބޭނޭ ގޮތް ހަމަޖެހޭނޭމަށް ބަޔާން ކޮށް، ފަތުރަމުންދާ އޯޑިއޯ ވީޑިއޯ ކްލިޕްތަކަކީ ރައްޔިތުންގެ ތެރެއިން ބަޔަކަށް އޮޅުވާލުމަށް ކުރާކަމެއް ކަމަށް ޤާސިމް ވިދާޅުވިއެވެ.

ޤާސިމް ވަނީ، މިއީ ޒަމާނީ ކޮށް ސްކޭމް ކުރުމުގެ ބޭނުމުގައި ހިންގަމުންދާ އޮޅުވާލުމުގެ ދަށުދަރައިޖައިގެ ޢަމަލުތަކެއްކަމަށް ސިފަކުރައްވާފައެވެ.

އެހެންކަމުން ޤާސިމް ވަނީ މިފަދަ އެއްވެސް ބާވަތެއްގެ ސްކޭމެއްގައި، އެއްވެސް ރައްޔިތަކު ނުޖެހުމަށާއި، މިފަދަ  ހަޤީޤަތެއް ނެތް ވީޑިއޯ ކްލިޕް ފަދަ ތަކެތި ސޯޝަލް މީޑިއާ ގެ އެކި މަންސަތަކާއި، އެކި ގްރޫޕްތަކުގައި ޝެއަރކޮށް ހެދުމުން ދުރުވުމަށް ވެސް އިލްތިމާސްކުރައްވާފައެވެ.