މަސްވެރިކަމާއި ބެހޭ 25 އަހަރުގެ މާސްޓަރ ޕްލޭނެއް އެކުލަވާލުމަށް މަސްވެރިކަމާއި ބެހޭ ވުޒާރާއިން ނިންމައިފިއެވެ.
އެ ވުޒާރާއިން ބުނީ، ދިވެހި ރާއްޖޭގެ ތަރައްގީއަށް ކުރެވޭ ކަންކަމަކީ ރޭވިފައިވާ ޕްލޭނެއްގެ ދަށުން ކުރާ ކަންތައްތަކަށް ހެދުމަށްޓަކައި ގާނޫނަކުން ބާރުލިބޭ ގައުމީ ތަރައްގީގެ ވިހި އަހަރުގެ ޕްލޭނެއް އެކުލަވާލުމަކީ ރައީސް ޑރ. މުޙައްމަދު މުޢިއްޒުގެ ވަރަށް މުހިންމު ވައުދު ފުޅެއްކަމަށެވެ.
މިގޮތުން، މަސްވެރި ސިނާއަތް ތަރައްގީކޮށް ސިންދަފާތުކޮށް ކުރިއެރުވުމަށް ކުރާ ކަންތައްތަކަކީ ވެސް ރޭވި ކުރެހިފައިވާ އިސްތިރާޖީ ޕްލޭނެއްގެ ދަށުން ކުރިއަށް ގެންދާ ކަންތައްތަކަށް ހެދުމަށް ޓަކައި މަސްވެރިކަމާއި ކަނޑުތަކުގެ 25 އަހަރުގެ މާސްޓަރ ޕްލޭނެއް އެކުލަވާލުމަށް އެ ނިންމާފައިވާކަމަށް އެވުޒާރާއިން ހާމަކުރެއެވެ.
މި އިސްތިރާޖީ މާސްޓަރ ޕްލޭނުގައި ކުރިއަށް އޮތް 25 އަހަރުގައި މަސްވެރި ސިނާއަތުގެ ވިޝަން އަދި މިޝަންތައް ކަނޑައެޅޭނެކަމަށާއި، ހަމަ އެހެންމެ ކަނޑުތަކުގެ ވަސީލަތް ފުރިހަމައަށް ބޭނުންކޮށް އިގްތިސާދީ ނަފާ އިތުރުކުރުމަށް ލަނޑުދަނޑިތަކެއް ރޭވި އެކަން ހާސިލުކުރުމަށް ކުރާނެ ކަންކަން މި ޕްލޭނުގައި ހިމެނިގެން ދާނެކަމަށް މަސްވެރިކަމާއި ބެހޭ ވުޒާރާއިން މައުލޫމާތުދެއެވެ.
އެ ވުޒާރާއިން ހާމަކުރި ގޮތުގައި، މި ކަމަށް ބޭނުންވާ ފައިސާ، ވޯރލްޑް ބޭންކުގެ އެހީގެ ތެރެއިން ވަނީ ހަމަޖެހިފައެވެ.
Advertisement
This content is created and paid for by advertisers and does not involve Voice Journalists
