ގާނޫނު އަސާސީއަށް ސަރުކާރުގެ ފަރާތުން ހުށަހެޅި އިސްލާހުތަކާ ދެކޮޅަށް އިދިކޮޅު އެމްޑީޕީން ސީދާ ހަރަކާތަށް ނިކުމެއްޖެއެވެ.

އެމްޑީޕީން މުޒާހަރާ ފަށާފައިވަނީ ރައްޔިތުން މަޖިލީސް ކުރާ ގޭ ދޮށުގައި ތިބެގެންނެވެ. މި މުޒާހިރާގައި އެމްޑީޕީ ގައުމީ މަޖިލީހުގެ މެމްބަރުންގެ އިތުރުން ބައެއް އާއްމު މެމްބަރުން ބައިވެރިވެއެވެ.

އެމްޑީޕީން އެތަނުގައި އަޑުއުފުލަމުން ދަނިކޮށް ސަރުކާރަށް ތާއީދުކުރާ ބަޔަކު ދިއުމުން އެންމެފަހުން ވަނީ މަޝްރަހު ހަލަބޮލިވެފައެވެ. އެތަން ހަލަބޮލިވުމުން ފުލުހުން އެންމެފަހުން ވަނީ މަޖިލީސް ހިމެނޭ ސަރަހައްދުން އެއްވެފައިުތިބި މީހުން މަޖީދިއްޔާ ކައިރި ސޯސަންމަގާ ދިމާލަށް ދުރައް ޖައްސާފައެވެ.

މުޒާހިރާއަށް އެމްޑީޕީން ނިކުމެފައިވަނީ ރައްޔިތުންގެ މަޖިލީހުގެ މެންބަރުން ޕާޓީ ބަދަލުކުރުމުން ގޮނޑިގެއްލޭގޮތަށް ޤާނޫނުއަސާސީއަށް ސަރުކާރުން ގެނައުމަށް ނިންމާފައިވާ އިސްލާހާ ގުޅޭ ގޮތުންނާއި ބޭރުސިފައިން ރާއްޖޭގައި ގާއިމްވެ ތިބެވޭނީ މަޖިލީހުން ފާސްކޮށްގެންކަމަށް ސަރުކާރުން ހުށަހެޅި އިސްލާހާ ގުޅިގެންނެވެ.

މި އިސްލާހުތައް އަވަސް އަރުވާލައިގެން ފާސްކުރާތީ އެމްޑީޕީން ވަނީ ކަންބޮޑުވުން ފާޅުކޮށްފައެވެ. މުޒާހަރާގައި އެމްޑީޕީއަށް ތާއީދުކުރާ ފަރާތްތަކުން ގޮވަމުން ދަނީ ސަރުކާރުން މަޖިލީސް ހިސޯރުކޮށްފައިވާކަމަށާއި، ސަރުކާރުގެ އިހުލާސްތެރިކަން މިއަދު ގެއްލިފައިވާކަމަށެވެ.

މުޒާހަރާގެ ތެރެއިން ސަރުކާރަށް ތާއީދުކުރާ ސަޕޯޓަރަކު ޝުއޫރުފާޅުކުރުމުގެ ގޮތުން ޕޯސްޓަރެއް ހިފައިގެން..

މަޖިލީސް ދޮށަށް އެއްވި މީހުންގެ ތެރެއިން ސަރުކާރަށް ތާއީދުކުރި ފަރާތްތަކުން ގޮވަމުންދިޔައީ، އެމްޑީޕީގެ އިހުލާސްތެރިކަމެއް ނެތްކަމަށާއި އެކަން ނިމިގެންދިޔަ ދައުރުގައި އެމްޑީޕީން މަޖިލީހުގެ ސުޕަ މެޖޯރިޓީގައި އޮތްއިރު ފެނިގެންދިޔަ ކަމަށެވެ.

އެމްޑީޕީން ކުރަމުންގެންދާ މުޒާހަރާއާ ގުޅޭގޮތުން އެ ސަރަހައްދުގައި ހުންނަވައި މީޑިއާ އާ ވާހަކަދައްކަވަމުން އެމްޑީޕީގެ ކުރީގެ ޕީޖީ ލީޑަރު އަދި މިހާރު އެ ޕާޓީގެ ގައުމީ މަޖިލީސް މެންބަރު މުޙައްމަދު ރަޝީދު ޙުސައިން (ބިގޭ) ވިދާޅުވީ، މިއަދު ފެނިގެން މިދަނީ ސަރުކާރުގެ އިހުލާސްތެރިކަން ނެތް މަންޒަރު ކަމަށެވެ. ސަރުކާރުގެ ނިޔަތް ގޯސްކަން ފާހަގަކުރައްވަމުން ބިގޭ ވިދާޅުވީ، މިއީ ރައްޔިތުން ނިކުމެ، ސަރުކާރު ޒިންމާދާރުކުރުވަން މަގުމައްޗަށް ނިކުންނަން ޖެހޭ ވަގުތު ކަމަށެވެ.

އެމްޑީޕީ ސަރުކާރުގެ ތިމާވެއްޓާބެހޭ ވަޒީރު ވިދާޅުވީ، މިއަދަކީ ދުސްތޫރީ ހަޔާތުގައި ކަޅު ދުވަހެއް ކަމަށެވެ. އެންމެ ފަސްގަޑިއިރުގެ ތެރޭގައި ގާނޫނު ބަދަލުކުރުން މިއަދު ސިފަކުރެވިގެން މިދަނީ، ހުދުމުހުތާރު ވެރިކަމަކާ ދިމާލަށް ވެރިކަން މިސްރާބު ޖަހައިފިކަމުގެ ހެތްކެއްކަމަށް ޝައުނާ ވިދާޅުވިއެވެ.

ޝައުނާ ވިދާޅުވީ ރާއްޖޭގެ ހާލަތު މިއަދު މިދަނީ ވަރަށް ކަންބޮޑުވާ މަގަކުން ކަމަށާއި، ރައީސުލްޖުމްހޫރިއްޔާ ޑރ.މުއިއްޒުގެ އަމަލުފުޅުތައް މިއަދު ހުރީ ޑިމޮކްރަޓިކް ހަމަތަކާ މުޅިން ހިލާފަށްކަމަށެވެ.