ކުރިން އައި ސަރުކާރުތަކުންވެސް ދައުލަތުގެ މާލީ ނިޒާމު ހަރުދަނާކޮށް ރިފޯމް ކުރުމުގެ ވާހަކަ ދެއްކި ނަމަވެސް، އެކަންކުރުމަށްޓަކައި އެއްވެސް ފިޔަވަޅެއް އަޅާފައިނުވާކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ.

މާލީ ވަޒީރު މިފަދައިން ވިދާޅުވީ، ދައުލަތުގެ މީޑިއާއިން ގެނެސްދިން "ހަފްތާ 52" އަށް ދެއްވި ޚާއްސަ އިންޓަވިއުއެއްގައެވެ.

މިގޮތުން ވަޒީރު ޒަމީރު ވިދާޅުވީ، ފައިސާ ޗާޕުކުރުން ހުއްޓާލަން ނިންމުމަކީ ރައީސް ޑރ.މުޢިއްޒު ނިންމެވި އެންމެ މުހިންމު ނިންމުންކަމަށާއި، އުނދަގޫ ނިންމުމެއް ނަމަވެސް، ރާއްޖޭގެ އިޤްތިޞާދު ހަމަޔަކަށް އެޅުވުމަށް ކޮންމެހެން ނަގަންޖެހުނު ފިޔަވަޅެއްކަމަށެވެ.

ޓެކްސްއާ އެކި ގޮތްގޮތުން ދައުލަތަށް ފައިސާ ވައްދާނެ ގޮތްތައް ހޯދިނަމަވެސް، އިޤްތިޞާދު ކުރަން ނޭގޭނަމަ އޭގެ އެއްވެސް ބޭނުމެއް ނެތްކަން ފާހަގަކުރައްވާ ވަޒީރު ޒަމީރު ވިދާޅުވީ، ރައީސް ޑރ.މުޢިއްޒުގެ ކޮންމެ ނިންމެވުމަކީ ފައިސާ އިޤްތިޞާދުކޮށް، މާލީ ނިޒާމަށް ހެޔޮބަދަލުތަކެއް ގެނުވާނެ ކަންކަން ކަމަށެވެ.

ވަޒީރު ޒަމީރު ވިދާޅުވީ، 2022 އަދި 2023 ގައިވެސް ރިފޯމްގެ ވާހަކަ ދެއްކި ނަމަވެސް، މިއިން އެއްވެސް ކަމެއް ކުރަން ފިޔަވަޅެއް އަޅާފައިނުވާކަމަށެވެ. އެހެންނަމަވެސް، މި ސަރުކާރުން ވަރަށް ގިނަ ރިފޯމްތަކެއް ތަންފީޒުކުރަން ފަށަން ތައްޔާރުވާ މަރުހަލާގައި އޮތް ކަމަށާއި، ބައެއް މުހިންމު ރިފޯމްތައް ގެނައުމަށް ނިންމާ އޭގެ ފިޔަވަޅު ވެސް އަޅާފައިވާކަމަށެވެ.

މީގެ އިތުރުންވެސް، ދަރަނީގެ މައްސަލަ ހައްލުކުރުމަށް އަޅުއްވަމުންދާ އިތުރު ފިޔަވަޅުތަކާއި ދައުލަތަށް ލިބެންހުރި ފައިސާ ހޯދުމަށް ކުރަންޖެހޭ މަސައްކަތްތަކަށް އަލިއަޅުވާލައްވަމުން ވަޒީރު ޒަމީރު ވިދާޅުވީ، ދައުލަތުގެ ޚަރަދުތައް ބެލެހެއްޓޭނެ ހަރުދަނާ ނިޒާމެއްވެސް މިހާރު އެކުލަވާލާފައިވާކަމަށެވެ.