ފުވައްމުލަކު ސިޓީގައި މިހާރު ކުރިއަށްދާ "މައި ފުވައްމުލައް ބާބާ ގާޑިޔާ ފުޓްސަލް ޓޯނަމަންޓް 2024" ގެ ފައިނަލުގައި މިސްކިތްމަގު އެންމެންގެ ގުޅުމާއި ދަޑިމަގު ސްޕޯޓްސް އެންޑް ރެކްރިއޭޝަން (ޑީއެސްއާރުސީ) ވާދަކުރި މެޗު 1-1 ގެ ނަތީޖާއަކުން އެއްވަރުވެ ނަތީޖާ ނެރުމަށްޓަކައި ޖެހި ޕެނަލްޓީގައި 4-3 ގެ ނަތީޖާއަކުން މޮޅުވެ މިސްކިތްމަގުން މުބާރާތުގެ ޗެންޕިއަންކަން ހޯދައިފިއެވެ.

ދަޑިމަގު މުބާރާތުގެ ފައިނަލުން ޖާގަހޯދީ ސެމީފައިނަލުގެ ފުރަތަމަ މެޗުގައި ވާދަވެރި ކުޅުމަކަށްފަހު 2-1 ގެ ނަތީޖާއަކުން ޔުނައިޓެޑް ދިގުވާނޑު ބަލިކުރުމަށްފަހުއެވެ. އަދި ޑީއެސްއާރުސީ ފައިނަލުން ޖާގަހޯދީ ސެމީފައިނަލުގެ ދެވަނަ މެޗުގައި ފަސޭހަކަމާއެކު 7-1 ގެ ތަފާތުބޮޑު ނަތީޖާއަކުން ފުވައްމުލައް ސިޓީ ޕޮލިސް ބަލިކުރުމަށްފަހު އެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިމެޗުގައި ފުރަތަމަ ލަނޑުޖަހައި ކުރިހޯދީ ޑީއެސްއާރުސީ އިންނެވެ. މިލަނޑު ފުރަތަމަ ހާފުގެ 16 ވަނަ މިނެޓުގައި އެޓީމަށް ކާމިޔާބުކޮށްދިނީ އިނާން މުހައްމަދު އެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ޑީއެސްއާރުސީ ކުރީގައި އޮވެގެންނެވެ.

Advertisement

މެޗުގެ ދެވަނަ ހާފުގައި މިސްކިތްމަގުން އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކުރިއިރު، މިހާފުގައި އެޓީމުން ވަނީ ލަނޑުޖަހާނެ ގިނަ ފުރުސަތުތަކެއް ތަނަވަސްކޮށްފައެވެ. އަދި އެޓީމުން މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ އެންމެ ފަހު ވަގުތުކޮޅުގެ ތެރޭގައި ކާމިޔާބުކޮށްދިނީ އަބްދުﷲ ރަޝީދު އެވެ.

މިއާއެކު މެޗުގެ ނަތީޖާނެރުމަށްޓަކައި ޖެހި ޕެނަލްޓީގައި މިސްކިތްމަގުން ޖެހި ހަ ޕެނަލްޓީގެ ތެރެއިން ހަތަރު ޕެނަލްޓީ އެޓީމުން ކާމިޔާބުކުރިއިރު، ޑީއެސްއާރުސީގެ ހަ ޕެނަލްޓީގެ ތެރެއިން އެޓީމަށް ކާމިޔާބުކުރެވުނީ ތިން ޕެނަލްޓީއެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ މިސްކިތްމަގުގެ ކީޕަރު ތޮލާލް ހަސަން އެވެ.

މުބާރާތުގެ އެންމެ މޮޅު ފަސް ކުޅުންތެރިންނަކީ ސާދު ނިޒާރު (ޔުނައިޓެޑް ދިގުވާނޑު)، ތޮލާލް ހަސަން (މިސްކިތްމަގު)، އަލީ ޝަމާލް (މިސްކިތްމަގު)، އަހުމަދު ސިނާހް (ޑީއެސްއާރުސީ) އަދި އަހުމަދު ހަމީދު (ޑީއެސްއާރުސީ) އެވެ. އަދި އެންމެ އުންމީދީ ހަތަރު ކުޅުންތެރިންނަކީ އަޔާދު ނަސީރު، މުހައްމަދު އިޔާޝް، އާލިފް އަހުމަދު އަދި އިޔާޝް އަހުމަދު އެވެ.

މުބާރާތުގެ ފެއާޕްލޭ ޓީމަކީ ޔުނައިޓެޑް ދިގުވާނޑު އެވެ. އެންމެ މޮޅު ކޯޗަކަށް ހޮވުނީ މުއާޒް އަހުމަދު (މިސްކިތްމަގު) އެވެ. އަދި އެންމެ ގިނަ ލަނޑުޖެހި ކުޅުންތެރިއަކީ އަހުމަދު ސިނާހް (ޑީއެސްއާރުސީ) އެވެ. އަދި އެންމެ ފާހަގަކުރެވުނު ސަޕޯޓަރުންނަކީ ޝަރާން ޒާހިރު، އަދި ޝަމްލާ އިބްރާހިމް އެވެ.

މީގެ އިތުރުން މުބާރާތުގެ އެންމެ ޝަރަފްވެރި މަޤާމް ކިންގް އޮފް ދަ ޓޯނަމަންޓަކަށް ހޮވުނީ އަލީ ޝަމާލް (މިސްކިތްމަގު) އެވެ.

މިމުބާރާތުގައި މިއަހަރު 12 ޓީމަކުން ވާދަކުރަމުންއަންނައިރު، މުބާރާތް ކުރިއަށް ގެންގޮސްފައިވަނީ ބައިވެރިވި 12 ޓީމު ތިން ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ދެޓީމުގެ އިތުރުން ތިން ގުރޫޕުން ދެވަނަ ހޯދާ ތިން ޓީމުގެ ތެރެއިން އެންމެ ނަތީޖާ ރަނގަޅު ދެޓީމަށް ވެސް މުބާރާތުގެ ކުއާޓާ ފައިނަލުން ވަނީ ފުރުސަތު ލިބިފައެވެ.

11 ނޮވެމްބަރު 2024 އިން 19 ނޮވެމްބަރު 2024 ގެ ނިޔަލަށް ފުވައްމުލަކު ސިޓީގައި ކުރިއަށް ގެންދިޔަ މިމުބާރާތުގެ ޗެންޕިއަން ޓީމަށް 30،000 އަދި ރަނަރަޕް ޓީމަށް 15،000 ރުފިޔާގެ ފައިސާގެ އިނާމެއް ހުށަހަޅާފައިވާއިރު، މިއަހަރުގެ މުބާރާތުގެ މީޑިއާ ޕާޓްނަރަކީ ވޮއިސް ސްޕޯޓްސް އެވެ.