މޫސުން ގޯސްވާނޭކަމަށް ލަފާކޮށް މޯލްޑިވްސް މީޓިއޮލޮޖިކަލް ސެންޓަރުން، ށ އަތޮޅުން ފެށިގެން ބ އަތޮޅަށް ޔެލޯ އެލާޓް ނެރެފިއެވެ.

މޫސުމާ ބެހޭ ގައުމީ އިދާރާއިން އެ ސަރަހައްދަށް ރީނދޫ ސަމާލް ނެރެފައިވަނީ، މިއަދު ހެނދުނު 11 ޖެހުމާ ހަމަޔަށެވެ. މެޓް އޮފީހުން ނެރެފައިވާ ރީނދޫ ސަމާލްގައި ބުނެފައިވަނީ، އެ ސަރަހައްދަށް ބޯކޮށް ވާރޭވެހުމާއެކު، ގުގުރައި އަދި ވިލާގަނޑުގައި 40 މޭލަށް ވައިގަދަވާނޭ ކަމަށެވެ. މީގެ އިތުރުން ކަނޑުތައްވެސް ގަދަވާނޭކަމަށް ލަފާކުރެވޭކަމަށް މެޓް އޮފީހުން ބުންޏެވެ.

ރާއްޖޭގެ ބައެއް ސަރަހައްދުތަކަށް ކުރަމުންދާ ވިއްސާރާގައި މިދިޔަ ދުަވަސްތަކުގައި ބައެއް ރަށްރަށުގައި ފެންބޮޑުވެ ގެތަކަށް ފެންވަދެ ބައެއް ގެއްލުންތައް ދަނީ ލިބެމުންނެވެ. 

ހިނގަމުން މިދަނީ ހުޅަނގުމޫސުމުގެ "ނޮރަ" ނަކަތެވެ. އިހުގެ މީހުން ބުނާގޮތުން މި ނަކަތުގައި ޢާންމުގޮތެއްގައި މޫސުން ރަނގަޅުވާނެއެވެ. ނަމަވެސް ދޭތެރެދޭތެރެއިން ކޮންމެވެސް ވަރަކަށް ވިއްސާރަކުރާނޭކަމަށް ބުނެ އުޅެއެވެ.