މަސްވެރިންގެ ހުރި ކަންބޮޑުވުންތައް އަޑުއެއްސެވުމަށް އެމްޑީޕީގެ ޗެއާޕާސަން ފައްޔާޒް އިސްމާއީލް މާލޭ މަސްމާރުކޭޓް ސަރަހައްދަށް މިއަދު ވަޑައިގަންނަވައިފިއެވެ.

ފައްޔާޒުގެ އަރިހުގައި ރައްޔިތުން މަޖިލީހުގައި އެމްޑީޕީ ތަމްސީލް ކުރައްވަމުންގެންދަވާ މެމްބަރުން ބައިވެރިވެ ވަޑައިގެންނެވިއިރު، އެ ބޭފުޅުން ވަނީ މާލޭ މަސްމާރުކޭޓް ސަރަހައްދުގައި އަޅާފައިވާ ދޯނިތަކުގައި ތިބި މަސްވެރިންނާ ބައްދަލުކުރައްވައި އެމީހުންގެ ހުރި ކަންބޮޑުވުންތައް އަޑުއައްސަވާފައެވެ. 

މިކަމާގުޅޭގޮތުން އެމްޑީޕީން ބުނީ، މަސްވެރިންގެ ހުރި ކަންބޮޑުވުންތަކަށް ބަލާއިރު، އަދުގެ ސަރުކާރުން މަސްވެރިންނަށް ކޮށްދޭން ވައުދުވި ކަންކަން ފުރިހަމަކޮށްދެމުން ނުދާތީވެ މަސްވެރިން ވަނީ އެކަމުގެ ޝަކުވާކޮށްފައެވެ. އެމްޑީޕީގެ ޗެއާޕާސަންގެ މި ޒިޔާރަތުގައި ފައްޔާޡް ވަނީ މަސްމާރުކޭޓް ސަރަހައްދުގައި ހަރަކާތްތެރިވާ މަސްކަނޑާ މީހުންނާއިު މަސް ވިއްކާމީހުންނާވެސް ބައްދަލުކޮށް އެމީހުންގެ ހުރި ކަންބޮޑުވުންތައް އަޑުއައްސަވާފައެވެ.

އެމްޑީޕީގެ ލީޑަރޝިޕުން މަސްވެރިންގެ ޝަކުވާތައް އަޑުއެހުމަށް މަސްމާރުކޭޓް ސަރަހައްދަށް މިއަދު ޒިޔާރަތްކޮށްފައިވާއިރު، ސަރުކާރަށް އަހަރު ފުރުމާ ދިމާކޮށް ވަނީ މަސްވެރިކަމުގެ ސިނާއަތް ފުޅާކުރުމަށް އިތުރު އިންވެސްޓްމަންޓްތައް ކުރަމުންދާކަން ހާމަކޮށްފައެވެ. މިގޮތުން އެންމެ އިސްކަމެއް ދެއްވައިގެން ކުރަމުންގެންދާ މަސައްކަތްތަކުގެ ތެރޭގައި ހިމެނެނީ، މަސް ރައްކާކުރުމާއި މަސް ޕްރޮސެސްކުރުމުގެ ގާބިލްކަން އިތުރުކުރުމަށް ކުރަމުންގެންދާ މަސައްކަތްތައްކަމަށް ދައުލަތުގެ މީޑިއާގައި ވާހަކަދައްކަވަމުން މަސްވެރިކަމާ ބެހޭ ވަޒީރު އަޙުމަދު ޝިޔާމު ވަނީ ވިދާޅުވެފައެވެ.

މީގެ އިތުރުން މަސްވެރިންއަތުން މަސްކިރުވުމަށްފަހު އަދުގެ ސަރުކާރުން މަސްވެރިންނަށް ދޫކުރަން ބުނި ފައިސާވެސް ދޫކޮށް ނިންމާފައިވާކަމަށް ވަޒީރު ވަނީ ވިދާޅުވެފައެވެ. އެގޮތުން މި ސަރުކާރު ވެރިކަމާ ހަވާލުވުމަށްފަހު އޮކްޓޯބަރުމަހުގެ 27 ވަނަ ދުވަހުގެ ނިޔަލަށް 1.04 ބިލިއަން ރުފިޔާ މަސްވެރިންނަށް ދޫކޮށްފައިވާކަމަށް ވަޒީރު ވަނީ ވިދާޅުވެފައެވެ.