މިހާރުކުރަމުންދާ މޫސުމީ ވިއްސާރާގައި ނ.މާފަރުގައި ފެންބޮޑުވެ ބައެއް ގެތަކަށް ފެންވަދެއްޖެއެވެ.

މިކަމާ ގުޅޭގޮތުން ނެޝަނަލް ޑިޒާސްޓަރ ސެންޓަރުން ބުނީ، މާފަރުގައި ފެން ބޮޑުވެ، 5 ގެއަކަށް ފެންގަނޑު ވަދެފައިވާކަމަށެވެ. މީގެ ތެރެއިން އެއް ގެއްގައި ދިރިއުޅުނު އާއިލާ އެހެން ގެއަކަށް ބަދަލުވެފައިވާކަން ޑިޒާސްޓަރ މެނޭޖްމަންޓުން ބުންޏެވެ. މާފަރުގައި ބޮޑުވި ފެންގަނޑު ހިންދުމަށް މާފަރު ކައުންސިލާއި، ފުލުހުންނާއި އަދި އެމް.އެން.ޑީ.އެފް ގެ އެހީތެރިކަމާއެކު، ޕަންޕް ބޭނުންކޮށްގެން ރަށު ތެރެއިން ފެން ހިންދުމުގެ މަސައްކަތްކޮށްފައިވާކަމަށް ޑިޒާސްޓަރ އޮފީހުން ބުންޏެވެ.

މޫސުމާބެހޭ ގައުމީ އިދާރާ، މޯލްޑިވްސް މީޓިއޮލޮޖިކަލް ސެންޓަރުން މިއަދު ހެނދުނު ވަނީ، ބ އަތޮޅުން ފެށިގެން ށ އަތޮޅާ ހަމަޔަށް ބޯކޮށް ވާރޭވެހޭނޭކަމަށް ލަފާކޮށް ޔެލޯ އެލާޓް ނެރެފައެވެ.

މިފަހުން ކުރަންފެށި ވިއްސާރާގައި މިހާތަނަށް ރާއްޖޭގެ ދެކުނުގެ އިތުރުން މެދުރާއްޖެތެރެ އާއި އުތުރުގެ ބައެއް ރަށްތަކުގައި ފެންބޮޑުވެ، ބައެއް ގެތަކަށް ވަނީ އެކިވަރުގެ ގެއްލުންތައް ލިބިފައެވެ.