ކުރިއަށްއޮތް 2028 ވަނަ އަހަރުގެ ރިޔާސީ ޕްރައިމަރީގައި ވާދަކުރައްވާނޭކަން، އެމްޑީޕީގެ ޗެއާޕާސަން ފައްޔާޒް އިސްމާއީލް މިއަދު ވިދާޅުވެއްޖެއެވެ.
ފައްޔާޒް ވަނީ މިއަދު އެމްޑީޕީގެ ގައުމީ މަޖިލީހުގެ ވަޓްސްއަޕް ގްރޫޕައް ކުރެއްވި މެސެޖެއްގައި އެކަން އިއުލާނުކުރައްވާފައެވެ. އެ ގްރޫއްޕަށް ފައްޔާޒް ކުރެއްވި މެސެޖެއްގައި ވިދާޅުވެފައިވަނީ، 2028 ވަނަ އަހަރުގެ ރިޔާސީ ޕްރައިމަރީގައި ވާދަކުރައްވަން ނިންމަވާފައިވާކަމަށެވެ. އަދި ތާއީދުކޮށްދެއްވުމަށްވެސް ފައްޔާޒު ވަނީ މެމްބަރުންގެ ކިބައިން އެދިވަޑައިގަންނަވާފައެވެ.
ކުރިއަށްއޮތް ރިޔާސީ ރޭހަށް ނިކުންނެވުމަށް އެމްޑީޕީގެ ޕްރައިމަރީގައި ވާދަކުރައްވާނޭކަމަށް ފައްޔާޒު ވިދާޅުވިއިރު، އެޕާޓީން އަދި މިހާތަނަށް އެއްވެސް ބޭފުޅަކު މިކަން ހާމަކޮށްފައެއް ނުވެއެވެ. އެންމެފަހުން ރައީސް ސޯލިހުވެސް ވިދާޅުވެފައިވަނީ، ކުރިއަށްއޮތް ރިޔާސީ އިންތިހާބަށް ނިކުންނަވާނޭކަން އަދި ހާމަކުރެވެން ނެތްކަމަށެވެ.
އެމްޑީޕީ ފަޅިން ކުރިއަށްއޮތް ރިޔާސީ ރޭހަށް ނިކުންނަވާނޭކަމަށް ބެލެވޭ ބޭފުޅުންގެ ތެރޭގައި ޢަބްދުﷲ ޝާހިދު އާއި މޭޔަރު އާދަމް އާޒިމު ހިމެނިވަޑައިގަންނަވާކަމަށް އެޕާޓީއަށް ނިސްބަތްވެ ވަޑައިގަންވާ ބައެއް ފަރާތްތަކުން ލަފާކުރެއެވެ.
2028 ވަނަ އަހަރު ބާއްވާ ރިޔާސީ އިންތިހާބަށް ނިކުންނަވާނޭކަމަށް އަދި މިހާތަނަށް ވިދާޅުވެފައިވަނީ ކުރީގެ ރައީސް ޔާމީނު އެކަންޏެވެ.
Advertisement
This content is created and paid for by advertisers and does not involve Voice Journalists
