ޕީއެންސީން މިއަދު ބޭއްވި އިންތިހާބަކީ ރާއްޖޭގައި ސިޔާސީޕާޓީއަކުން މިހާތަނަށް ބޭއްވި އެންމެބޮޑު، އަދި ކާމިޔާބު އިންތިހާބުކަމަށް އެ ޕާޓީގެ ޗެއަރޕާސަން ޢަބްދުއްރަޙީމް ޢަބްދުﷲ ވިދާޅުވެއްޖެއެވެ.

ވެރިކަން ކުރާ މައި ޕާޓީ، ޕީޕަލްސް ނެޝަނަލް ކޮންގްރެސް (ޕީއެންސީ) އިން މިއަދު ވަނީ އެޕާޓީގެ އެތެރޭގެ މަގާމްތަކަށް މެމްބަރުން ހޮވުމަށް އިންތިހާބު ކުރިއަށްގެންގޮސްފައެވެ. މި އިންތިހާބާ ބެހޭގޮތުން ނޫސްވެރިންނާ ވާހަކަދައްކަވަމުން ޢަބްދުއްރަޙީމް ވިދާޅުވީ، ޕީއެންސީން މިއަދު ބޭއްވި އިންތިހާބު ކުރިއަށްދިޔައީ އުއްމީދުކުރިގޮތަށް ހުރިހާ ކަމެއްވެސް ވަރަށް ރަނގަޅަށް ކަމަށެވެ. ޢަބްދުއްރަޙީމް ވިދާޅުވީ އިންތިހާބު ނިމުނީ ވަރަށް އަމާންކޮށް ކަމަށާއި، މިވަރުގެ އިންތިހާބެއްގައި ހިނގާފާނޭކަމަށް ލަފާކުރި ކަންކަން ހިނގާފައި ނުވާކަމަށެވެ. ކޮންމެވެސް ވަރެއްގެ ކަންކަން ހިނގިނަމަވެސް އެއީ އިންތިހާބަށްއޮތް ޝައުގުވެރިކަމެއްގެ ސަބަބުން ހިނގާދިޔަ ކަންކަން ކަމަށް ޢަބްދުއްރަޙީމް ފާހަގަކުރެއްވިއެވެ.

ޢަބްދުއްރަޙީމް ވިދާޅުވީ ޕީއެންސީ އަމިއްލަ ފައިމައްޗަށް ތެދުވުމަށް ކުރަމުންދާ މަސައްކަތުގައި މިއަދަކީ ފާހަގަކޮށްލެވޭ މުހިއްމު ފިޔަވަޅެއް އެޅުނު ދުވަހެއް ކަމަށެވެ. ޢަބްދުއްރަޙީމް ވިދާޅުވީ އިންތިހާބާ ގުޅޭގޮތުން ހުށަހެޅުނު ޝަކުވާތަށް ބަލަމުންދާކަމަށާއި އިންތިހާބާ ބެހޭ ކޮމިޓީން އެކަންކަން ނިންމަވާނޭކަމަށެވެ. 

އިންތިހާބުގައި ވާދަކުރަން ބޭނުންވި ކެނޑިޑޭޓުންނަށް އެފުރުސަތު ލިބިގެންދިޔަކަން ފާހަގަކުރައްވަމުން ޢަބްދުއްރަޙީމް ވިދާޅުވީ، ޕީއެންސީގެ ލީޑަރޝިޕުން ވަކި މީހަކު ހޮވުމަށް މަސައްކަތްކޮށްފައި ނުވާނޭކަމަށެވެ. 

ޕީއެންސީން މިއަދު ބޭއްވި އެޕާޓީގެ އެތެރޭގެ އިންތިހާބުގައި ރާއްޖޭގެ އެކި ސަރަހައްދުތަކުން ޖުމްލަ 1984 މަގާމަށް 648 ކެނޑިޑޭޓުން ވަނީ ވާދަކޮށްފައެވެ. އިންތިހާބުގައި ޖުމްލަ 144 ވޯޓުފޮށި ބަހައްޓާފައިވާއިރު، ވޯޓުލުމުގެ ހައްގު ލިބިގެންވާ މީހުންގެ އަދަދު 33،500 އަރާކަމަށް ޕީއެންސީން ވަނީ ބުނެފައެވެ.