ކ.ތިލަފުށީގައި ގަވާއިދާ ޚިލާފަށް އުޅެމުންދިޔަ 33 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.

އިމިގްރޭޝަނުން އެކްސްގައި ކުރި ޕޯސްޓެއްގައި ބުނީ، ތިލަފުށީގައި ގަވާއިދާ ހިލާފަށް އުޅޭ ބިދޭސީންނަށް އަމާޒުކޮށް ޓާސްކުފޯހުން ހިންގި ހާއްސަ ރެއިޑް އޮޕަރޭޝަންގެ ތެރެއިން 33 ބިދޭސީން އިމިގްރޭޝަނުގެ ބެލުމުގެ ދަށަށް ގެނެސްފައިވާކަމަށެވެ.

އޭގެ ތެރޭގައި ފުޅާ ދާއިރާއެއްގައި ވިޔަފާރިކުރަމުންދިޔަ ބަޔަކުވެސް ހިމެނޭކަމަށް އެ އިދާރާއިން މައުލޫމާތުދެއެވެ.

މީގެ އިތުރުންވެސް އިމިގްރޭޝަނުން ބުނީ، މިގްރޭޝަނުގެ 28 އޮފިސަރުންނާއި ފުލުހުންގެ 35 އޮފިސަރުން ބައިވެރިވި މި ރެއިޑުގައި 257 ބިދޭސީއަކު ޗެކްކޮށްފައިވާކަމަށާއި، މީގެތެރެއިން ސައްހަ ވިސާއެއް ނެތި އުޅެމުންދިޔަ 33 ބިދޭސީއަކު އިމިގްރޭޝަންގެ ބެލުމުގެ ދަށަށް ގެނެވި، 22 ފަރާތަކަށް ލިޔުމުން ނޯޓިސް ދީފައިވާކަމަށެވެ.

މި ސަރުކާރަށް ވީ އެއް އަހަރު ތެރޭގައި، ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލު ކުރުމަށް، ވަރަށް ގިނަ ތަންތަން ބަލައި ފާސްކޮށް، ބިދޭސީން ޑިޕޯޓްކޮށް، އެމީހުން ގަވާއިދާ ޚިލާފަށް ހިންގަމުންއައި ވިޔަފާރިތައް ވަނީ ބަންދުކޮށްފައެވެ.

މިގޮތުން، މި މަސައްކަތުގެ ތެރެއިން މިހާތަނަށް ގަވާއިދާއި ޚިލާފަށް ރާއްޖޭގައި ދިރިއުޅެމުންދާ 5000 ބިދޭސީން ޑިޕޯޓްކުރެވިފައިވާ ކަމަށް ޝައްމާން ވަނީ މީގެ ކުރިން ވިދާޅުވެފައެވެ.