ދިވެހި ރައްޔިތެއްކަން އަންގައިދޭ ކާޑް ޕްރިންޓްކޮށް ދޫކުރުމުގެ ޚިދުމަތް ވިލިމާލެ އާއި ހުޅުމާލޭގައި ފަށައިފިއެވެ.

މާލެއިން އެކަނި ލިބޭ އައިޑީކާޑުގެ ޚިދުމަތް ލާމަރުކަޒީ ނިޒާމުގެ ތެރެއިން ރައްޔިތުންނާއި ގާތުން ދެއްވުމަކީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ވައުދުފުޅަކަށްވާއިރު، އައިޑީ ކާޑް ޕްރިންޓްކޮށް ދޫކުރުމާއި، ޕާސްޕޯޓު ދޫކުރުމުގެ ޚިދުމަތް ރައްޔިތުންނާ ގާތުން އަވަހަށް ފޯރުކޮށްދިނުމުގެ ކަންކަން މުޅި ރާއްޖެއަށް ފުޅާކުރުމުގެ މަޝްރޫއު އެމަނިކުފާނު އިފްތިތާހުކޮށްދެއްވީ މިމަހުގެ 16 ވަނަ ދުވަހުއެވެ.

އެއާއިއެކު، ޑިޕާޓްމަންޓް އޮފް ނެޝަނަލް ރެޖިސްޓްރޭޝަނުން މިހާރު ވަނީ ވިލިމާލެ އީ-ބްލޮކް އަދި އުމަރު ޒާހިރު ބިލްޑިނގްގެ އިތުރުން ހުޅުމާލެ ވިނަރެސް ޓަވަރ 02ގެ ފުރަތަމަ ފަންގިފިލާއިން އައިޑީ ކާޑުގެ ޚިދުމަތް މިއަދު ދޭން ފަށާފައެވެ.

Advertisement

ކުރިން ބޭނުން ކުރަމުން އައި އޮންލައިން ޕޯޓަލްގެ ބަދަލުގައި ޑީއެންއާރު އޮންލައިން ޕޯޓަލްއެއް ޤާއިމުކޮށް އަމިއްލައަށް ކާޑަށް ހުށަހެޅޭގޮތް މިދިޔަ އަހަރުގެ މާރިޗު މަހުގެ ތެރޭގައި ހަމަޖެހިގެން ދިޔައިރު، ކާޑު ޕްރިންޓުކުރުމަށް ފަހު، ޑީއެންއާރުން އެ މީހަކު ހުރި ރަށެއްގެ ކައުންސިލަށް ކާޑު ފޮނުވޭނެ ޚިދުމަތްވެސް މިއަހަރު ތަޢާރަފްކޮށްފައިވާކަން ފާހަގަކޮށްލަން ޖެހެއެވެ.