ފުރުޤާން މިސްކިތަށް ގެއްލުންދިން މައްސަލަބަލަން ހުށަހެޅުމަށް އިސްލާމީ ކަންތައްތަކާއި ބެހޭ ވުޒާރާއިން ނިންމައިފިއެވެ.
މިކަން ހާމަކުރައްވައި، އިސްލާމީ ކަންތައްތަކާއި ބެހޭ ވަޒީރު ޑރ.މުޙައްމަދު ޝަހީމް އަލީ ސައީދު އެކްސްގައި ކުރެއްވި ޕޯސްޓެއްގައި ވިދާޅުވީ، ފުރުޤާން މިސްކިތަށް ގެއްލުންދިން މައްސަލަ ބަލައި ފިޔަވަޅު އެޅުމަށް ކަމާ ބެހޭ ފަރާތްތަކަށް ހުށަހަޅަން އިސްލާމިކް މިނިސްޓްރީން ނިންމާފައިވާކަމަށެވެ.
މިސްކިތްތަކަށް ގެއްލުންދިނުން ބަލައި ނުގަނެވޭކަމަށް ވަޒީރު ޝަހީމް ވިދާޅުވިއެވެ.
މިއަދުގެ ފަތިސް ނަމާދު ކުރިން، މީހަކު ފުރްޤާން މިސްކިތަށް ވަދެ، އެ މިސްކިތުގެ ފަހަތުގައި ހުރި މުސްޙަފްތައް މުޅިތަނަށް އުކާލައި، އިމާމް ހުންނަ ދިމާލުގެ ކަރަންޓް ބޯޑުތަކާއި އެޔަށް ޖަހާފައިހުރި އެޑެޕްޓަރުތައް ތަޅާލައި އަދި ވުޟޫ ކުރާ ބައިގެ ބައެއް އިސްކުރުތައް ބިންދާލައި މިސްކިތުގެ ބައެއް އެއްޗެހި އެތަނަށް ވަނީ އުކާލާފައެވެ.
މިއާއިއެކު، މި މައްސަލަ ފުލުހުން ބަލަން ފަށާފައިވާއިރު، މި މިސްކިތަށް ދާމީހުން ބުނި ގޮތުގައި، އޭނާ ވަނީ، މީގެ ކުރިންވެސް އެތައް ފަހަރަކު މުސްޙަފްތައް އުކާލުމާއި މިސްކިތަށް އެކިއެކި ގެއްލުންދީފައެވެ.
ވޮއިސް އަށް މައުލޫމާތު ލިބުން ގޮތުގައި މީނާ އަކީ ނަފްސާނީ ބައްޔެއްގެ ސަބަބުން ގުރައިދޫގައި ހުންނަ ޚާއްސަ އެހީއަށް ބޭނުންވާ މަރުކަޒުގައި ފަރުވާދިން މީހެކެވެ.
ފުރުގާން މިސްކިތަކީ ސީސީޓީވީ ހަރުކޮށްގެން 24 ގަޑި އިރު މާލެ ސިޓީ ކައުންސިލްގެ ފާރަވެރިކަމުގެ ދަށުގައި ހުންނަ މިސްކިތަކަށްވާއިރު، މީނާގެ މި މައްސަލަ، އިޖުތިމާޢީ ތަރައްގީއާއި ބެހޭ ވުޒާރާއާއި، މާލެ ސިޓީ ކައުންސިލްގެ އިތުރުން ފުލުހުންނަށްވެސް ތަކުރާރުކޮށް ހުށަހަޅާފައިވާކަމަށް ވެސް ވޮއިސް އަށް ވަނީ މައުލޫމާތު ލިބިފައެވެ.
Advertisement
This content is created and paid for by advertisers and does not involve Voice Journalists
