މަކުނުދޫ ބޭރުގައި އުޅެނިކޮށް އެމްއެންޑިއެފްގެ ބެލުމުގެ ދަށަށް ރޭގެ ވަގުތެއްގައި ގެނެވުނު ސްރީލަންކާގެ މަސްބޯޓުން، 468.6 ކިލޯގެ މަސްތުވާތަކެތި ފެނިފައިވާކަމަށް މޯލްޑިވްސް ޕޮލިސް ސާވިސްއިން ބުނެފިއެވެ.

މިކަމާ ގުޅޭގޮތުން ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިންނަށް މަޢުލޫމާތު ހިއްސާކުރައްވަމުން ކޮމިޝަނަރ އޮފް ޕޮލިސް އަލީ ޝުޖާޢު ވިދާޅުވީ، އެ އުޅަނދު ރާއްޖެ ސަރަހައްދުގައި މަކުނުދޫ ބޭރުގައި ހަރަކާތްތެރިވާކަން އެމްއެންޑީއެފަށް އެނގުނީ ރޭ ދަންވަރު 12:45 ހާއިރުކަމަށެވެ. ސްރީލަންކާގެ އަށެންފުތަ ނަމަކަށް ކިޔާ އެ މަސް ބޯޓުގައި އެ ޤައުމަށް ނިސްބަތްވާ 5 މީހުން ތިބިކަމަށް އޭނާ ވިދާޅުވިއެވެ. އެއީ ހުސް ފިރިހެނުންނެވެ.

އެބޯޓް ޓްރެކްކޮށް އަތުލައިގަނެފައިވަނީ ކޯސްޓްގާޑަށް ލިބުނު މައުލޫމާތަކާ ގުޅިގެންނެވެ. 

Advertisement

އެ ބޯޓު ކުޅުދުއްފުށީ ބަނދަރަށް ފުލުހުންގެ ބެލުމުގެ ދަށަށް ގެނެސް ފާސްކޮށް ބެލިބެލުމުން އެ ބޯޓުގައި 468.6 ކިލޯގެ މަސްތުވާތަކެތި ހުރިކަމަށް އަލީ ޝުޖާޢު ވިދާޅުވިއެވެ. އޭގެ ތެރޭގައި ހިމެނެނީ 344 ކިލޯގެ ކްރިސްޓަލް މެތްގެ އިތުރުން 124.7 ކިލޯގެ ހެރޮއިން ހިމެނެއެވެ. މިތަކެތީގެ މަގުމަތީގެ އަގު 1 ބިލިއަން ރުފިޔާއަށް އަރާނޭކަމަށް ފުލުހުން ބުނެއެވެ.

މަކުނުދޫ ބޭރުން އަތުލައިގަތް ލަންކާގެ ބޯޓު

މިކަމުގައި ދިވެއްސެއްގެ އަތެއްވޭތޯ ނުވަތަ ނޫންތޯ އަދި ކަނޑައެޅިގެން ބުނަން ދަތިކަމަށާއި މިކަމުގެ ތަހުގީގު ފުލުހުން މިހާރު ކުރަމުންދާކަމަށް ޝުޖާޢު ވިދާޅުވިއެވެ.

ޝުޖާއު ވިދާޅުވީ މިއީ މަސްތުވާތަކެތި އެތެރެކުރުމުގެ މައްސަލަ ހުއްޓުވުމަށް އެކިއެކި އިދާރާތަކާ ގުޅިގެން ކުރަމުންގެންދާ މަސައްކަތްތަކުގެ ތެރެއިން ކުރެވުނު ކާމިޔާބު މަސައްކަތެއް ކަމަށެވެ.