ގޮނޑިގެއްލޭ މާއްދާ ބާތިލްކުރަން ސްޕްރީމްކޯޓަށް ހުށަހެޅި މައްސަލައަށް ތަދައްޚުލުވާން އެންމެބޮޑު އިދިކޮޅުޕާޓީ އެމްޑީޕީން ނިންމައިފިއެވެ.

އެމްޑީޕީން ނެރުނު ބަޔާނެއްގައި ބުނީ، ގާނޫނުއަސާސީއަށް ގެނައި ބަދަލު ސައްހަ ނޫންކަމަށް ބުނެ ރައްޔިތުން މަޖިލީހުގެ ކެންދޫ ދާއިރާގެ ކުރީގެ މެމްބަރު އަލީ ހުސައިން ސްޕްރީމްކޯޓަށް ހުށަހަޅާފައިވާ ދުސްތޫރީ މައްސަލައަށް އެ ޕާޓީން ތަދައްޚުލުވާން ނިންމާފައިވާކަމަށެވެ. 

ސަރުކާރުން ވަނީ ޕާޓީގެ ފަރާތުން މަޖިލީހަށް ހޮވޭ މެމްބަރުން ގޮނޑި ބަދަލުކޮށްފިނަމަ، މެމްބަރުކަމުން ވަކިވާގޮތަށް އިސްލާހުކޮށްފައެވެ. ރައީސުލްޖުމްހޫރިއްޔާ ވަނީ މަޖިލީހުން ފާސްކުރި އެ ބިލް ތަސްދީގުވެސް ކުރައްވާފައެވެ.

އެކަމާއި ގުޅިގެން ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެމްބަރު އަލީ ހުސެއިން ވަނީ ގޮނޑިގެއްލޭ މާއްދާ ބާތިލްކުރަން ސްޕްރީމްކޯޓަށް މައްސަލަ ހުށަހަޅާފައެވެ. އެކްސްގައި ކުރި ޕޯސްޓެއްގައި އަލީ ހުސައިން ވިދާޅުވީ ރާއްޖޭގެ ޖުމްހޫރިއްޔާގެ ގާނޫނުއަސާސީއަށް 6 ވަނަ އިސްލާހު ގެނެސްފައިވަނީ ގާނޫނުއަސާސީގެ 4، 8، 26، 75 އަދި 90 ވަނަ މާއްދާއާހިލާފަށް އަދި ގާނޫނުއަސާސީގެ އަސާސީ އޮނިގަނޑާވެސް ހިލާފަށް ކަމަށެވެ.

އަލީ ހުސައިން ސްޕްރީމްކޯޓަށް ހުށަހެޅި އެ މައްސަލައަށް ތަދައްޚުލުވާން ނިންމައި އެމްޑީޕީން ބުނެފައިވަނީ، ގާނޫނު އަސާސީގެ 73 ވަނަ މާއްދާއަށް ގެނެސްފައިވާ އިސްލާހް ގާނޫނުއަސާސީއާ ހިލާފުކަމަށް ކަނޑައަޅައިދިނުމަށް އެދެި ސްޕްރީމްކޯޓަށް މައްސަލަ ހުށަހެޅުމަށް ނިންމާފައިވާ ނިންމުމަށް އެޕާޓީން މަރުހަބާ ކިޔާކަމަށެވެ. 

އެމްޑީޕީން ބުނީ މަޖިލީހުން ފާސްކުރި އެ އިސްލާހަކީ ދިވެހިދައުލަތް އެ މައްޗަށް ބިނާވެފައިވާ ޑިމޮކްރަސީގެ އަސާސީ ހަމަތަކާއި، ރައްޔިތުންގެ މަޖިލީހުން ގާނޫނުތައް ފާސްކުރުމުގައި މީގެކުރިން އަމަލުކުރަމުން ގޮސްފައިވާ އުސޫލުތަކާ ހިލާފަށް ގާނޫނު އަސާސީއަށް ގެނެސްފައިވާ އިސްލާހެއް ކަމަށެވެ.