އިންޑިއާގެ ބޮޑުވަޒީރު ނަރެންދްރަ މޯދީ 3 ޤައުމަކަށް ކުރެއްވި ދަތުރުފުޅުގައި 31 ވެރިންނާއި ބައްދަލުކުރައްވައިފިއެވެ.

މޯދީގެ 3 ޤައުމުގެ ދަތުރުފުޅުގައި ނިމުނު ހަފްތާގައި ފުރަތަމަ ވަޑައިގަތީ ނައިޖީރިއާ އަށެވެ. ނައިޖީރިއާއަށް ކުރެއްވި ދަތުރުފުޅުގައި އެގައުމުގެ ރައީސް ބޮލާ އަހްމަދު އަޑެކުންލޭ ޓިނޫބޫ އާއި ބައްދަލުކުރެއްވިއެވެ.

ނައިޖީރިއާއަށްފަހު މޯދީ ވަޑައިގަތީ ޖީ-20 ސަމިޓްގައި ބައިވެރިވެވަޑައިގަތުމަށް ބްރެޒިލްއަށެވެ. ބްރެޒިލްގައި މޯދީ ވަނީ އިންޑޮނީޝީއާ، ޕޯޗުގަލް، އިޓަލީ، ނޯވޭ، އިނގިރޭސިވިލާތް، ފަރަންސޭސީވިލާތް، ޗިލޭ، އާޖެންޓީނާ އަދި އޮސްޓްރޭލިއާގެ ވެރިންނާއި ބައްދަލުކުރައްވާފައެވެ. އިންޑޮނީޝިއާގެ އައު ރައީސް ޕްރަބޯވޯ ސުބިއަންޓޯއާއި، ޕޯޗުގަލްގެ ލުއީޒް މޮންޓެނީގްރޯއާއި، އިނގިރޭސިވިލާތުގެ ކެއަރ ސްޓާމާ އަދި ޗިލޭގެ ގެބްރިއެލް ބޮރިސްގެ އިތުރުން އާޖެންޓީނާގެ ހާވިއޭ މިލޭ އާއެކު މޯދީ ބޭއްވި ބައްދަލުވުންތަކަކީ އެބޭފުޅުން އެގައުމުތަކުގެ ވެރިކަމާއި ހަވާލުވިފަހުން މޯދީ އެބޭފުޅުންނާއެކު ބޭއްވި ފުރަތަމަ ބައްދަލުވުންތަކެވެ.

މޮދީ ބްރެޒިލްއަށް ކުރެއްވި ދަތުރުފުޅުގައި އެޤައުމުގެ ރައީސް ލޫލާ ޑަސިލްވާ އާ ބައްދަލުކުރައްވަނީ

މީގެ އިތުރުން ސިންގަޕޫރު، ދެކުނު ކޮރެއާ، މިސްރު، ސްޕެއިން އަދި އެމެރިކާގެ ވެރިންނާއެކު ނުރަސްމީކޮށް ކުރު ބައްދަލުވުންތަކެއް ބާއްވަވާފައިވާއިރު، އީޔޫ، އދ އަދި އައި.އެމް.އފް ފަދަ ޖަމްއިއްޔާތަކުގެ ވެރިންނާއިވެސް މޯދީ ބްރެޒިލްގައި ބައްދަލުކުރެއްވިއެވެ.

ބްރެޒިލްއަށްފަހު މި ދަތުރުފުޅުގެ ފަހު މަންޒިލަކަށް މޯދީ ވަޑައިގަތީ ދެވަނަ އިންޑިއާ-ކެރިކޮމް ސަމިޓަށް ގަޔާނާއަށެވެ. ކެރީބިއަން އަދި ދެކުނު އެމެރިކާ ސަރަހައްދުގެ ގައުމުތަކާއެކު އިންޑިއާއިން ބާއްވާ ގުޅުން އިތުރަށް ހަރުދަނާކުރުމަށް މި ސަމިޓްގައި މަޝްވަރާކުރެވުނެވެ.

ގަޔާނާގައި މޯދީ ވަނީ ގަޔާނާގެ ރައީސްގެ އިތުރުން ސުރިނާމް، ގްރެނާޑާ، އެންޓީގާ އެންޑް ބާބިއުޑާ، ޓްރިނިޑާޑް އެންޑް ޓޮބޭގޯ އަދި ސެންޓް ލޫޝިއާގެ ވެރިންނާއި ބައްދަލުކުރައްވާފައެވެ.

3 ގައުމުގެ ދަތުރުފުޅަށްފަހު މިދިޔަ ބުރާސްފަތި ދުވަހު މޯދީ ވަނީ އެނބުރި ދިއްލީއަށް ވަޑައިގެންފައެވެ.