ކާޑުގެ ބާވަތްތައް ބޭރުކުރުމުގައި އަވައްޓެރި އިންޑިއާއިން ރާއްޖެއަށް ދީފައިވާ ކޯޓާގައި އުސޫލުން ބޭރުން ލަންކާއަށް ހަކުރު އެތެރެކުރާ މައްސަލައެއް ފެންމަތިވެ، އިންޑިއާގެ ކަމާބެހޭ އިދާރާއިން އެކަން ބަލަމުންދިޔަ ނަމަވެސް ރާއްޖެއަށް ކާޑުގެ ބާވަތްތައް އެތެރެކުރުން ހުއްޓުމަކަށް އައިސްފައިނުވާކަމަށް އެސްޓިއޯއިން ބުނެފިއެވެ.
ރާއްޖެއަށް ކާޑުގެ ބާވަތްތައް އެތެރެކުރުމަށް ދީފައިވާ ކޯޓާއިން ލަންކާއަށް ހަކުރު ބޭރުކުރާ މައްސަލައެއް ފެންމަތިވެ، ކާޑުގެ ބާވަތްތަކުގެ ތެރެއިން އިންޑިއާއިން ރާއްޖެއަށް ހަކުރު ބޭރުކުރުން މަޑުޖެހިފައިވާކަމަށް އިންޑިއާގެ ބައެއް ނޫސްތަކުން ވަނީ ރިޕޯޓްކޮށްފައެވެ. އިންޑިއާގެ ބައެއް މީޑިއާތަކުން ބުނެފައިވަނީ، މި މައްސަލަ މިހާރު އިންޑިއާގެ ޑައިރެކްޓަރޭޓް ޖެނެރަލް އޮފް ފޮރިން ޑްރޭޑުގެ ސަމާލުކަމަށް އައިސް އެކަން ސީރިއަސް ކަމާއެކު ބަލަމުންދާކަމަށެވެ.
މިކަމާ ގުޅޭގޮތުން ވޮއިސްއަށް މައުލޫމާތު ހިއްސާކުރަމުން އެސްޓިއޯގެ މީޑިއާ އޮފިޝަލް ވިދާޅުވީ، ރާއްޖެއަށް ކާޑުގެ ބާވަތްތައް އެތެރެކުރުމަށް ދީފައިވާ ކޯޓާގައި އެހެން ގައުމަކަށް ކާޑު އެތެރެކުރަމުން އައި މައްސަލައެއް ފެންމަތިވެފައިވާކަމުގެ މައުލޫމާތު ލިބިފައިވާކަމަށެވެ. ނަމަވެސް މިކަމުގެ ސަބަބުން އިންޑިއާއިން ކާޑު އެތެރެކުރުމަށް ދަތިނުވާކަމަށާއި، އަދި އެސްޓީއޯއަށް މެނޭޖް ނުކުރެވޭވަރަށް ރައްޔިތުންނަށް ކާޑު ލިބުމުގައި ދަތިއުނދަގޫކަން ތަހައްމަލުކުރަން ޖެހުނަ ނުދޭނޭކަމުގެ ޔަގީންކަން ދޭކަމަށްވެސް އޮފިޝަލް ވިދާޅުވިއެވެ.
މީގެ ކުރިން އިންޑިއާއިން ފިޔާ އެކްސްޕޯޓްކުރުން ހުއްޓާލިއިރުވެސް، އެސްޓީއޯއިން ވަނީ ރާއްޖެއަށް ފިޔާ އެތެރެކޮށް ރާއްޖޭގެ ބާޒާރުގައި އޭރު އޮތް ފިޔާ ލިބުމުގެ ދަތިކަމަށް ހައްލެއް ހޯދައިދީފައެވެ.
އިންޑިއާއިން ރާއްޖެއަށް ހަކުރު އެކްސްޕޯޓްކުރުމުގައި ދީފައިވާ 64,494 މެޓްރިކްޓަނުގެ ކޯޓާ އުސޫލުން ބޭރުން ބޭނުންކޮށް ލަންކާއަށް ހަކުރު އެތެރެކުރަމުންދާކަމުގެ މައްސަލަ ފެންމަތިވެފައިވާއިރު، މިކަމާ ގުޅޭގޮތުން އިންޑިއާގައި ހުންނަ ރާއްޖޭގެ އެމްބަސީއަކުން މިހާތަނަށް އަދި ވަކި އެއްޗެއް ބުނެފައެއް ނުވެއެވެ.
އަވައްޓެރި އިންޑިއާއިން ދޭ ހާއްސަ ކޯޓާގެ ދަށުން ކާޑުގެ ބާވަތްތަކުގެ އިތުރުން ރާއްޖެއަށް ފިޔާ، ބިސް އަލުވި އަދި ހިލަ އާއި ހިލަވެލިވެސް އެތެރެކުރެއެވެ.
Advertisement
This content is created and paid for by advertisers and does not involve Voice Journalists
