އަމާޒަކީ 2026 ގައި ބާއްވާ ލޯކަލް ކައުންސިލް އިންތިހާބުގައި މުޅި ރާއްޖެ ރީނދޫކޮށްލުންކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ޝާހިދު މިފަދައިން ވިދާޅުވީ، ރާއްޖެ ޓީވީގެ ޕްރޮގްރާމެއްގައި ވާހަކަފުޅު ދައްކަވަމުންނެވެ.
މިގޮތުން 2028 ވަނަ އަހަރު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި އެމްޑީޕީގެ ޕްރިމަރީގައި ވާދަކުރައްވާނެތޯ ސުވާލުކުރުމުން ޝާހިދު ވިދާޅުވީ، މިއަދު މިއޮތް ސަރުކާރުގެ ހުދުމުތާރު ކަމާއި ރާއްޖެއަށް މި ސަރުކާރު ސަބަބުން ލިބެމުންދާ ގެއްލުންތަކުގެ ވާހަކަ މަޑުޖައްސާލާފައި، 2028 ގައި ކަމަކާއި ދިމާއަށް އަމާޒު ހިފައިފިނަމަ، ރާއްޖެއަށް ލިބޭ ގެއްލުން އިންތިހާއަށް ބޮޑު ކަމަށެވެ.
އެމްޑީޕީގެ ރައީސްގެ ހައިސިއްޔަތުން މުޅި ފޯކަސްއަކީ މި ސަރުކާރު ޖަވާބު ދާރީކުރުވުންކަން ފާހަގަކުރައްވާ ޝާހިދު ވިދާޅުވީ، 2026 ގައި ލޯކަލް ކައުންސިލް އިންތިޚާބު އޮންނައިރު، މިސްރާބު ހުންނާނީ 2026 ގައި މުޅި ރާއްޖެ ލޯކަލް ކައުންސިލް އިންތިޚާބުގައި ރީނދޫކޮށްލުންކަމަށެވެ.
"މިވަގުތަކީ އަޅުގަނޑުމެންގެ އެތެރޭގެ ދެހާސް އަށާވީސް އޮންނަ ކަމެއްގައި އަޅުގަނޑު ހަމަގައިމު ވެސް އެ ދިމާލަށް އަޅުގަނޑުގެ އަމާޒު ހިފައިގެން ކަމެއް ކުރާނެ ދަނޑިވަޅެއް ނޫން. އަޅުގަނޑުގެ މުޅި މިސްރާބު ހުންނާނީ ދެހާސް އަށްބީހުގައި މުޅި ރާއްޖެ ލޯކަލް ކައުންސިލް އިންތިޚާބުގައި ރީނދޫކޮށްލުން،"
ޝާހިދު ވިދާޅުވިއެވެ.
ރާއްޖޭގެ ލޯކަލް ކައުންސިލް އިންތިޚާބުން، ރައްޔިތުން މިއަދު އެދި އެދި ތިބި ޑިމޮކްރެޓިކް ނިޒާމު ރާއްޖެއަށް ގެނެސްދެވޭނެ ކަމުގެ އުންމީދު ރައްޔިތުންނަށް ލިބިގެންދާނެ ކަމަށްވާތީ 2028 ގައި އޮންނަ ކަމެއްގައި ހުންނަންވީތަން މިއަދު ނިންމަން ބޭނުންފުޅުނުވާކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ، ޕާޓީގެ އަސާސީ ގަވާއިދު އޮތްގޮތުގެ މަތިން ޕްރައިމަރީއަށް އިޢުލާންކުރާ ހިސާބުން ޕްރައިމަރީގެ ވާހަކަ އަންނާނެކަމަށާއި، މީގެ ކުރިން ދެ އިންތިޚާބެއްވެސް ގެއްލުނުއިރު، މާ ދުރުގަ އޮންނަ ކަމަކާ މަސްއޫލުވެގެން ގޮސް ޙަޤީޤަތުގައި އަޅަންވީ ފިޔަވަޅު އޮޅޭކަމަށެވެ.
"ސިޔާސީ ކަންތައްތަކުގައި ސައްވީސް ގަޑިއިރަކީ ވެސް ވަރަށް ދިގު މުއްދަތެއް. އަޅުގަނޑު މި ދަންނަވާ ހާ ވެސް ވާހަކައަކީ މި ވަގުތަކީ އަޅުގަނޑުމެން ޕާޓީގައި ހަމަގައިމު ވެސް އަޅުގަނޑު ދެހާސް އަށާވީސް ހުންނާނެ ތަން ނިންމުމަށް ވުރެ، ދެހާސް ސައްބީހުގައި އަޅުގަނޑުމެންގެ ރަށްރަށުގައި އަޅުގަނޑުމެންގެ އަތޮޅުތަކުގައި އަޅުގަނޑުމެންގެ ސިޓީތަކުގައި އެމްޑީޕީގެ ކާމިޔާބީ އޮންނާނީ ކިހާ ވަރެއްގައިތޯ، ކޮންގޮތަކަށް މަސައްކަތް ކޮށްގެންތޯ، އެ އަމާޒަށް މަސައްކަތް ކުރާ ދަނޑިވަޅެއް. މިހާރު އަޅުގަނޑުމެން އެހެން ދިމާލެއްގައި މާ ފަހުން އޮތް އިންތިޚާބު ގެ ވާހަކަ ދައްކަން ހަދައިގެން އަޅުގަނޑުމެންގެ އަމާޒު ކައްސާލައިގެން ގޮސް ލަނޑު ލިބޭތަން އެބަ ހުރި،"
ޝާހިދު ވިދާޅުވިއެވެ.
މީގެ އިތުރުުންވެސް ޝާހިދު ވިދާޅުވީ، ކަން މިހެންވިޔަ ނުދިނުމަށްޓަކައި، އަމަލު ކުރައްވާނީ މިފަދައިން ކަމަށާއި، މިވަގުތު ފޯކަސް ހުރީ ޕާޓީގެ ކަންކަަމަށާއި، ރާއްޖެ ހަމަ މަގަކަށް އެޅުވުމަށް ކަމަށެވެ.
Advertisement
This content is created and paid for by advertisers and does not involve Voice Journalists
