ރާއްޖެއަށް ޒިޔާރަތްކުރާ ފަތުރުވެރިންނަށް މޫދުކުޅިވަރުގެ ހިދުމަތްތައް ދޭއިރު، ފަތުރުވެރިންގެ ސަލާމަތާ ރައްކާތެރިކަން ކަށަވަރުކުރުމަށް ޓޫރިޒަމް މިނިސްޓްރީން ސަލާމަތީ އައު މިންގަނޑެއް އެކުލަވާލައިފިއެވެ.
ފަތުރުވެރިންނަށް މޫދުކުޅިވަރު އަދި މޫދުކުޅިވަރާ ގުޅުންހުރި އެކްސްކަރޝަން ޚިދުމަތްދިނުމާއި ބެހޭ އައު މިންގަނޑާ ގުޅޭގޮތުން ޓޫރިޒަމް މިނިސްޓްރީން ބުނީ އައު މިންގަނޑު އެކުލަވާލުމުގެ މަގްސަދަކީ ރާއްޖެއަށް ޒިޔާރަތްކުރާ ފަތުރުވެރިން މޫދުކުޅިވަރުގެ އަދި މޫދާ ގުޅުންހުރި ހިދުމަތްތައް ހޯދާއިރު ރައްކާތެރިގޮތުގައި އެކަންކުރުމަށާއި، އެފަދަ ހިދުމަތްދޭ ތަންތަން ކަނޑައެޅުމާއި އެފަރާތްތަކުގެ ޒިންމާތައް ކަނޑައެޅުންކަމަށެވެ.
އައު މިންގަނޑުގައި ހިމެނޭ ކަންކަމުގެ ތެރޭގައި މޫދުކުޅިވަރުގެ ހަރަކާތެއް ފެށުމުގެ ކުރިން އެހަރަކާތަކާ ގުޅޭގޮތުން ސަލާމަތީ ކަންކަމުގެ މައުލޫމާތު ދިނުމާއި، މޫދުކުޅިވަރުތަކުގައި ބޭނުންކުރާ އާލާތްތަކަކީ ސަލާމަތީ މިންގަނޑުތަކަށް ފެތޭ ތަކެއްޗަށް ވާންޖެހެއެވެ. އަދި ފަތަން ނުދަންނަ ފަތުރުވެރިއަކުނަމަ ލައިފްޖެކެޓް އެޅުވުމާއި، މޫދުކުޅިވަރުތަކުގެ ތެރެއިން އެ ކުޅިވަރެއް ބޭއްވުމަށް ކަނޑައަޅާފއިވާ ސަރަހައްދުގައި އެ ކުޅިވަރެއް ބޭއްވުމުގެ އިތުރުން މޫސުމަށް އަންނަ ބަދަލުތަކާއި ގުޅޭގޮތުން ކަމާބެހޭ އިދާރާތަކުން ދޭ ސަމާލްތަކަށް ތަބާވުން ހިމެނެއެވެ.
އަދި މީގެ އިތުރުން މޫދުކުޅިވަރުގެ ހަރަކާތުގައި އުޅޭއިރުޔ މުއާސަލާތީ ގުޅުންތައް ހުރީ ރަނގަޅަށްކަން ކަށަވަރުކުރުމާއި، ކަމެއް ދިމާާއިރު ތައްޔާރީ ހާލަތުގައި ތިބެންޖެހޭކަމަށް ވަނީ ލާޒިމްކޮށްފައެވެ. އަދި 16 އަހަރު ނުފުރޭ ކުއްޖަކު މޫދުކުޅިވަރުތަކުގައި ބައިވެރިވާނަމަ، އޭނާގެ ބެލެނިވެރިޔާގެ ފަރާތުން ކުރަންޖެހޭ ކަންކަން ފުރިހަމަ ކުރަންޖެހޭނޭކަމަށްވެސް ވަނީ ކަނޑައަޅާފައެވެ.
Advertisement
This content is created and paid for by advertisers and does not involve Voice Journalists
