ޕާކިސްތާނުގެ ކުރީގެ ބޮޑުވަޒީރު، އިމްރާން ޚާންގެ ސަޕޯޓަރުން ކުރަމުންދާ މުޒާހަރާގެ ތެރެއިން މުޒާހަރާގެ ބައިވެރިން ކުރިމަތިލުމުގެ ސަބަބުން ގިނަ ބަޔަކު ޒަހަމްވެއްޖެއެވެ.
މިކަން ހިނގާފައިވަނީ ޕާކިސްތާނުގެ ވެރިރަށް، އިސްލާމާބާދުގެ ބޭރުގައި އިމްރާން ޚާނުގެ ތާއީދުކުރާ ފަރާތްތަކާއި ސަލާމަތީ ބާރުތަކާ ދެމެދު ހިނގި ގަދަބަދަވުމެއްގައެވެ.
މިގޮތުން އިސްލާމާބާދުގެ ބޭރުގައާއި ޕަންޖާބު ޕްރޮވިންސްގެ އެހެނިހެން ސަރަހައްދުތަކުގައި ހިނގަމުންދާ މި މުޒާހަރާގައި، އެއް ފުލުހަކު މަރުވެފައިވާއިރު، 119 ފުލުހުންނަށް އަނިޔާވެ، އަދި 22 ފުލުހުންގެ އުޅަނދު އަންދާލާފައިވާކަމަށް ޕަންޖާބު ޕްރޮވިންސްގެ ފުލުސް އިސްވެރިޔާ އުސްމާން އަންވަރު ވިދާޅުވިއެވެ.
އިމްރާން ޚާންގެ ޕާޓީ، ޕީޓީއައި އިން ބުނެފައިވާ ގޮތުގައި މިހާތަނަށް އެ ޕާޓީގެ ގިނަ އަދަދެއްގެ މަސައްކަތްތެރިންނަށްވެސް މި އިހުތިޖާޖުގައި އަނިޔާވެފައިވެއެވެ.
މި އިހުތިޖާޖާއި ގުޅިގެން އެގައުމުގެ ސަރުކާރުން ވަނީ އިސްލާމާބާދުވެސް ލޮކްޑައުނަކަށް ގެނެސްފައެވެ.
މިގޮތުން ސެކިއުރިޓީ ކަންބޮޑުވުންތައް ހުރި ސަރަހައްދުގައި މޮބައިލާއި އިންޓަނެޓްގެ ހިދުމަތްތައް ވެސް މެދުކަނޑާލާފައިވާއިރު، ހައިވޭތައް ވެސް ވަނީ މި އިހުތިޖާޖުގެ ކުރިއަށް ބަންދުކޮށްފައެވެ.
މިގޮތުން އެގައުމުގެ ސަރުކާރުން، އިސްލާމާބާދުގެ ބޮޑެތި މަގުތައް ޝިޕިން ކޮންޓެއިނަރުތަކާއި އެނޫންވެސް ފުލުހުންގެ ކޮންޓިޖެންޓްތައް ބޭނުންކޮށްގެން ބަންދުކޮށްފައިވާއިރު، އެ ގައުމުގެ މަޖިލިސް ކައިރީގައި އެގައުމުގެ ފުލުހުން އަންނަނީ ފޯރިމަރަމުންނެވެ.
އެއްވެސް ބާވަތެއްގެ އެއްވުމެއް ބޭއްވުން އެގައުމުގެ ފުލުހުން މަނާކޮށްފައިވާއިރު، އިމްރާން ޚާން ގެ ޕާޓީ، ޕީޓީއައިގެ ސަޕޯޓަރުން އަންނަނީ އިމްރާން ޚާން ހިމެނޭހެން އެ ޕާޓީގެ ލީޑަރުންނާއި ބޮޑުވަޒީރު ޝެހްބާޒް ޝަރީފްގެ ސަރުކާރު އިސްތިއުފާ ދިނުމަށް ގޮވާލަމުންނެވެ.
Advertisement
This content is created and paid for by advertisers and does not involve Voice Journalists
