ވެރިކަން ކުރާ މައި ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އެތެރޭގެ އިންތިޚާބުގެ ވަގުތީ ނަތީޖާ އިއުލާނުކޮށްފިއެވެ.

ޕީއެންސީގެ އެތެރޭގެ އިންތިހާބުގެ ނަތީޖާ އިއުލާނުކުރުމާއި ގުޅިގެން އެޕާޓީން ކުރި އިއުލާނެއްގައި ބުނީ، 2024 ނޮވެންބަރު 24 ގައި ބޭއްވި އެ ޕާތީގެ ދާއިރާތަކުގެ ވަގުތީ ނަތީޖާތައް އިއުލާނުކޮށްފައިވާކަމަށާއި، ވަގުތީ ނަތިޖާތައް އިއުލާނުކުރެވިފައިވަނީ ވޯޓުލާ މަރކަޒުތަކުގައި ވޮތް ގުނައި، އެ މަރުކަޒު ތަކުގައި އިއުލާނުކުރި ގޮތަށްކަން ކަށަވަރުވުމާއިއެކު އެގޮތަށް ކަމަށެވެ.

މި ނަތީޖާއާއި މެދު އެއްވެސް ޝަކުވާއެއް ވާނަމަ ޝަކުވާ ފޯމް މެދުވެރިކޮށް ހެކިތަކާއިއެކު ޝަކުވާ ހުށަހެޅުމަށް އެޕާޓީން ވަނީ އެދިފައެވެ.

މީގެ އިތުރުންވެސް ޕީއެންސީން ބުނީ، ވަގުތީ ނަތީޖާއަށްފަހު، މުޅި ރާއްޖޭގައި ބެހެއްޓި 143 ވޯޓް ފޮށީގެ ވޯޓު ކަރުދާސްތަކާއި، ނަތީޖާ ޝީޓުތަކުގެ އަސްލު، ޕާޓީގެ ރަސްމީ އޮފީހަށް ލިބުމުން، ހުށަހެޅިފައިވާ ޝަކުވާތަކަށް ރިއާޔަތްކުރުމަށްފަހު، ދާއިމީ ނަތީޖާ އިއުލާނު ކުރެވޭނެ ކަމަށެވެ.

ހަމައެއާއިއެކު،  ވޯޓުން ހޮވުނު މަގާމުތަކާއި ވޯޓަކާއި ނުލައި އިންތިޚާބުވި މަގާމުތައް އަދި މަގާމުގެ ހައިސިއްޔަތުން ކޮމިޓީގައި ހިމެނޭ މެންބަރުގެ މައްޗަށް އެކުލެވޭ ޕާޓީގެ ސްޓިއަރިން ކޮމިޓީތަކުން 72 ގަޑިއިރު ތެރޭގައި ވޯޓަކުން ކަނޑައަޅަންޖެހޭ އިތުރު މަގާމުތައް ކަނޑައެޅުމުގެ މަސައްކަތް ކުރިއަށްދާނީ ދާއިމީ ނަތީޖާ އިއުލާނުކުރުމަށްފަހު ޕާޓީ އިން ކަނޑައަޅާ އިންތިޒާމެއްގެ ތެރެއިން ކަމަށް ވެސް ޕީއެންސީން މައުލޫމާތުދެއެވެ.

ޖުމްލަ 667 ކެންޑިޑޭޓުން ވާދަކުރި ޕީއެންސީގެ އެތެރޭގެ އިންތިޚާބު ގެ ވޯޓުލުން ކުރިއަށްގެންދިޔައީ 4 ގަޑިއިރަށް ކުރިއަށްދިޔައިރު، އެ އިންތިޚާބުގައި 34،904 މީހަކަށް ވޯޓުދިނުމުގެ ހައްގުވަނީ ލިބިފައެވެ.