2022ގައި އެމްޑީޕީގެ އެތެރޭގެ އިންތިޙާބުގެ ތެރޭގައި ފެނަކަ ކޯޕްރޭޝަނަށް 2،483 މުވައްޒަފުން އިތުރުކުރި ކަމަށް ޓެންޑަރ ބޯޑުގެ ކުރީގެ ޗެއަރމަން އިސްމާއިލް ޒަރިޔަންދު ވިދާޅުވެއްޖެއެވެ.

2018 ވަނަ އަހަރުން ފެށިގެން 2023 ވަނަ އަހަރުގެ ނިޔަލަށް، ފެނަކައަށް މުވައްޒަފުން އިތުރުވެފައިވާ ގޮތުގެ ތަފާސް ހިސާބުތައް މީސްމީޑިއާގައި ޙިއްސާ ކުރަށްވަމުން ޒަރިޔަންދު ވިދާޅުވީ ކުރީގެ ރައީސް ޔާމީންގެ ވެރިކަން ނިމުނު އަހަރު، 2018 ވަނަ އަހަރު، ފެނަކަ ކޯޕަރޭޝަންގައި ތިބީ 2756 މުވައްޒަފުން ކަމަށެވެ.

އެހެން ނަމަވެސް، 2023 ވަނަ އަހަރުގެ ނިޔަލަށް އެ ކުންފުނީގައި 7132 މުވައްޒަފުން ތިބި ކަމަށެވެ.

Advertisement

"2022 ވަނަ އަހަރު އެމްޑީޕީގެ އެތެރޭގެ އިންތިޙާބާއިދިމާކޮށް ފެނަކައަށް 2،483 މުވައްޒަފުން އިތުރުކުރި!" ޒަރިޔަންދު ވިދާޅުވެފައިވެއެވެ.

ޒަރިޔަންދު ޢާއްމު ކުރެއްވި ތަފާސް ހިސާބަށް ބަލާއިރު އެމްޑީޕީގެ ވެރިކަމުގައި 2019 ވަނަ އަހަރު ފެނަކައަށް 254 މުވައްޒަފުން އަލަށް ވައްދާފައިވެއެވެ. އަދި 2020 ގައި 520 އައު މުވައްޒަފުން ނެގިއިރު، 2021 ގައި 437 ވަޒީފާ، 2023 ވަނަ އަހަރު 682 ވަޒީފާ ފެނަކައިގެ ވަޒީފާގެ އޮނިގަނޑަށް ވަނީ އިތުރުކޮށްފައެވެ.

ޒަރިޔަންދު މިހެން ވިދާޅުވެފައިވާއިރު ކުރީގެ ރައީސް އިބްރާހީމް މުޙައްމަދު ޞާލިޙްގެ ވެރިކަމުގައި ފެނަކައިން ކުރިއަށް ގެންދިޔަ އެކި މަޝްރޫޢުތަކަށް ކޮންޓްރެކްޓް އުސޫލުން އެކަނިވެސް 2000 އަށްވުރެ ގިނަ ވަގުތީ މުވައްޒަފުން ނަގާފައި ކަމަށް ފެނަކައިގެ މިހާރުގެ މެނޭޖުމަންޓުން ވަނީ ބުނެފައެވެ.

އަދި ފެނަކައިގެ މުވައްޒަފުންގެ މުސާރައިގެ ގޮތުގައި މަހަކު 79 މިލިއަން ރުފިޔާ ހޭދަކުރަންޖެހޭ ކަމުގައި ފެނަކައިގެ މެނޭޖިންގ ޑިރެކްޓަރ މުއާޒް މުހައްމަދު ރަޝީދުވެސް ވަނީ ވިދާޅުވެފައިވެއެވެ.