ކޮޕް-29 ސަމިޓްގައި މޫސުމަށް އަންނަ ބަދަލުތަކަށް ހޭދަ ކުރުމަށް ކަނޑައެޅި 300 ބިލިޔަން ޑޮލަރަކީ އެކަށީގެންވާ އަދަދެއްނޫން ކަމަށް މޫސުމީ ބަދަލުތަކާއި ތިމާވެށްޓާއި ހަކަތައާބެހޭ ވަޒީރު ޠާރިގް އިބްރާހީމް ވިދާޅުވެއްޖެއެވެ.
ބީބީސީ އަށް ދެއްވި އިންޓަވިއުއެއްގައި ވަޒީރު ޠާރިގު ވިދާޅުވީ، މޫސުމީ ބަދަލުތަކުން އަރައިގަތުމަށް ޤައުމުތަކަށް އެހީގެ ގޮތުގައި ދިނުމަށް އެ ސަމިޓުގައި ފާސްކުރި 300 ބިލިޔަން ޑޮލަރަކީ އެކަށިގެންވާ އަދަދަކަށް ނުވިނަމަވެސް، އެއަދަދު ފާސްކުރުމަށް ރާއްޖެއިން ތާއިދުކުރީ ޤައުމުތަކާއި އެކު އޮންނަ ގުޅުމަށް ބިނާކޮށްކަމަށެވެ.
ވަޒީރު ޠާރިގު ވިދާޅުވީ، ރާއްޖެއާއި އެނޫންވެސް ދުނިޔޭގެ ކުދި ޖަޒީރާ ގައުމުތަކުން މޫސުމީ ބަދަލުތަކާއި ދެކޮޅަށް މަސައްކަތްކުރުމުގައި ގޮންޖެހުންތަކާއި ކުރިމަތިލާން ޖެހިފައިވާކަމަށެވެ.
މީގެއިތުރުންވެސް ތިމާވެއްޓާއި ބެހޭ ދާއިރާގައި ރާއްޖެއިން ގިނަ މަސައްކަތްތަކެއް ކުރުމަށް ރާވާފައިވާކަން ވަޒީރު ވިދާޅުވީ، ރާއްޖޭގައި ބޭނުން ކުރާ ހަކަތައިގެ 33 އިންސައްތަ އިޔާދަކުރަނިވި ހަކަތައަށް ބަދަލުކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ސިޔާސަތެއްކަމަށާއި، މިއީ ކުރިމަގުގެ ތަރައްޤީގެ މަސައްކަތްތަކަށް ބޭނުންވާ ހަކަތަ އުފެއްދުމަށް ކުރުން މުހިންމު ކަމަކަށްވާއިރު، މިކަމަށް މާލީ އެހީތެރިކަން ބޭނުންވާކަމަށެވެ.
"ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ސިޔާސަތެއް ރާއްޖޭގައި ބޭނުން ކުރާ ހަކައިތައިގެ ނިސްބަތް 33 އިންސައްތަ އިޔާދަ ކުރަނިވި ހަކަތައަށް ބަދަލުކުރުމަކީ. މިއީ އަޅުގަނޑުމެންނަށް އެކަނި ކުރެވޭނެ ކަމެއް ނޫން. މިކަމަށް މާލީ އެހީތެރިކަން އެބަބޭނުންވޭ. އެކަމަކު އަޅުގަނޑުމެންގެ ކުރިމަގުގެ ތަރައްޤީގެ މަސައްކަތްތަކަށް ބޭނުންވާ ހަކަތަ އުފެއްދުމަށް ކުރުން މުހިންމު ކަމެއް."
ވަޒީރު ޠާރިގު ވިދާޅުވިއެވެ.
މީގެ އިތުރުންވެސް، ވަޒީރު ޠާރިގު ވިދާޅުވީ، މޫސުން ލަފާ ކުރަން ދަތިވާވަރަށް މޫސުމަށް ބަދަލުތައް އައިސްފައިވާކަމަށާއި، މިއަހަރަކީ ރާއްޖޭގެ ތާރީޚުގައިވެސް އެންމެ ބޮޑަށް ވާރޭވެހުނު އަހަރުކަމަށެވެ. މިއާއިއެކު، ރާއްޖޭގެ ރަށްތައް ގިރުމާއި ފެން ލޮނުވުމުގެ މައްސަލަތަކަށް ބޭރުގެ މާލީ އެހީތެރިކަން ބޭނުންވާކަމަށް ވެސް ވަޒީރު ވިދާޅުވިއެވެ.
2035 ވަނަ އަހަރު އަންނަ އިރު، އަހަރެއްގެ މައްޗަށް 1.3 ޓްރިލިޔަން ޑޮލަރު ބޭނުންވާކަން ފާހަގަކުރައްވަމުން ވަޒީރު ޠާރިގު ވިދާޅުވީ، 300 ބިލިޔަން ޑޮލަރަކީ ލޯނު އެހީގެ ބަދަލުގައި ހިލޭ އެހީގެ ގޮތުގައި ބޭނުންވާ އަދަދެއްކަމަށެވެ.
ބޮޑެތި ޤައުމުތަކުން މިފަދަ ކަންކަމަށް މާލީ އެހީތެރިކަން ފޯރުކޮށްދޭން ފަސްޖެހޭކަމަށާއި، އެފަދަ ޤައުމުތަކަކީ އެންމެ ބޮޑަށް ތިމާވެށްޓަށް ގެއްލުންވާ މާއްދާތައް ދޫކުރާ ޤައުމުތައްކަމަށް ވަޒީރު ޠާރިގު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
