ހދ.ހަނިމާދޫ އިންޓަރނޭޝަނަލް އެއާޕޯޓުން ފައިދާ ނެރުމަށް އެތަނުގައި ސީޕްލޭންގެ ހިދުމަތް ފެށުން ވަރަށްމުހިއްމުކަމަށް އެމްއޭސީއެލުން ބުނެފިއެވެ.

މަޖިލީހުގެ ސްޓޭޓް އޯންޑް އެންޓަރޕްރައިސަސް، އެސްއޯއީ ކޮމިޓީގައި ވާހަކަދައްކަވަމުން އެމްއޭސީއެލްގެ ޑެޕިއުޓީ މެނޭޖިން ޑިރެކްޓަރ މުޖުތަބާ ލަތީފު ވިދާޅުވީ، ހަނިމާދޫ އެއާޕޯޓްގެ އޮޕަރޭޝަން ފަށައި އެ އޮޕަރޭޝަނުން އެންމެރަނގަޅު މަންފާއެއް ނެރުމަށް އެ އެއާޕޯޓްގައި ސީ ޕްލޭންގެ ހިދުމަތް ފެށުމަކީ ވަރަށް މުހިއްމު ކަމެއް ކަމަށެވެ. އެމްއޭސީއެލުން މަސައްކަތްކުރަމުން ދަނީ ހަނިމާދޫ އެއާޕޯޓްގެ މުޅި މަޝްރޫޢު ނިމެންވާއިރަށް އެތަނުގައި ސީޕްލޭންގެ ހިދުމަތް ފަށަންކަމަށް މުޖުތަބާ ވިދާޅުވިއެވެ.

މިހާރު އޮތްގޮތުން އަންނަ ފެބުރުއަރީމަހު އެއާޕޯޓްގެ މަސައްކަތް ނިމޭއިރު، ސީޕްލޭން ޓާމިނަލެއް ނުހެދުނު ނަމަވެސް ކުޑަ ޓާމިނަލެއް ހަދައިގެން ނަމަވެސް އެމްއޭސީއެލްގެ ވިސްނުމަކީ ސީޕްލޭންގެ ހިދުމަތް ފެށުންކަމަމަށް މުޖުތަބާ ފާހަގަކުރެެއްވިއެވެ.

ހަނިމާދޫ އެއާޕޯޓް ތަރައްޤީވެގެންދާނެ ގޮތުގެ ކުރެހުމެއް

މުޖުތަބާ ވިދާޅުވީ ހަނިމާދޫ އެއާޕޯޓަކީ ފައިދާ ނެރެވޭނޭ އެއާޕޯޓެއްކަމަށާއި ހަނިމާދޫ އެއާޕޯޓްގެ އޮޕަރޭޝަނުން ފައިދާ ނެރެވޭނޭ ޕްލޭނެއް އެމްއޭސީއެލްގެ އެބައޮތް ކަމަށެވެ. 

ސަރުކާރުން ވަނީ ރީޖަނަލް އެއާޕޯޓްސް އެމްއޭސީއެލްގެ ދަށަށް ގެނައުމަށް ނިންމާފައެވެ. އެ މަސައްކަތް މިހާރު ކުރެވެމުންދާއިރު، ކުރިއަށްމިއޮތް ދުވަސްތަކުގެ ތެރޭގައި ހިއްސާ ބަދަލުކުރުމުގެ ކަންކަން ނިމިގެންދާނޭކަމަށް އެމްއޭސީއެލުްނ ބުނެއެވެ. ހަނިމާދޫ އެއާޕޯޓަކީ ވީއައިއޭ ފިޔަވައި ވިޔަފާރިއަށް ބަލާއިރު އެންމެ ރަނގަޅު ނަފާއެއް ނެރެވޭނޭ އެއާޕޯޓްކަމަށް އެމްއޭސީއެލުން ދެކެއެވެ.

ހަނިމާދޫ އެއާޕޯޜް މަޝްރޫއު ނިމުމުން އެއާބަސް އޭ320 އާއި ބޮއިން737 މަރުކާގެ ބޯޓުފަހަރަށް އެ އެއާޕޯޓުން ހިދުމަތް ދެވި، ރާއްޖޭގެ ފަތުރުވެރިކަން މިހާރަށްވުރެ ތަރައްގީ ވެގެންދާނެ ކަމަށް ސަރުކާރުން ބުނެއެވެ. ހަނިމާދޫ އެއާޕޯޓް ތަރައްޤީކުރުމުގެ މަޝްރޫޢުގެ ދަށުން އެ އެއާޕޯޓްގައި ތަރައްގީ ކުރި 2،460 މީޓަރުގެ އައު ރަންވޭގެ މަސައްކަތް ވަނީ ނިމިފައެވެ. ހަނިމާދޫ އިންޓަރނޭޝަނަލް އެއާޕޯޓް ތަރައްޤީކުރުމުގެ މަޝްރޫޢު ނިމުމުން އަހަރަކު 1.3 މިލިއަން ފަސިންޖަރުންނަށް އެ އެއާޕޯޓުން ހިދުމަތްދެވޭނޭކަމަށް ސަރުކާރުން ވަނީ ބުނެފައެވެ.