"ގެދޮރުވެރިޔާ" ސްކީމްގެ ދަށުން ފްލެޓް ލިބޭ ފަރާތްތަކުގެ ލިސްޓް އާއްމުކުރުމަށްޓަކައި، އެ ލިސްޓްގެ ސައްހަކަން ކަށަވަރުކުރަން ކުރަމުންގެންދާ މަސައްކަތްތަކަށް އެއްވެސް ފަރާތަކުން ނުފޫޒު ނުފޯރުވޭނޭކަމަށް ހައުސިން މިނިސްޓްރީން ބުނެފިއެވެ.

ފްލެޓް ލިސްޓަށް މަޖިލިސް މެމްބަރުންނާއި އެނޫންވެސް ސަރުކާރާ ގުޅުން އޮންނަ ފަރާތްތަކުން ނުފޫޒު ފޯރުވަމުންދާކަމަށް މީސްމީޑިއާގައި ދެކެވެމުންދާ ވާހަކަތަކާ ގުޅިގެން ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވުޒާރާއިން ނެރުނު ބަޔާނެއްގައި ބުނީ، ފްލެޓް ލިސްޓުގެ ރީ އިވެލުއޭޝަން މަސައްކަތްތަކަށް ނުފޫޒެއް ނުފޯރުވާކަމަށް ދެކެވެމުންދާ ވާހަކަތަކަކީ ކަނޑައެޅިގެން ދޮގުވާހަކަތަކެއް ކަމަށެވެ. އެ ވުޒާރާއިން ބުނީ، ރައްޔިތުންގެ ހިތްތަކުގައި ނުތަނަވަސްކަން އުފެދޭގޮތަށް ބައެއް ފަރާތްތަކުން ދޮގު ހަބަރުތައް ފަތުރަމުންދާކަމަށާއި، ސްކީމަށް އެއްވެސް ފަރާތެއްގެ ނުފޫޒެއް ނުފޯރުވޭނޭކަމުގެ ޔަގީންކަން ރައްޔިތުންނަށް ދޭކަމަށެވެ. އަދި ފްލެޓްތައް ލިބިގެންދާނީ އެންމެ ހައްގުވެރި ފަރާތްތަކަށްކަންވެސް ރައްޔިތުންނަށް ޔަގީންކަން އަރުވާކަމަށެވެ.

ހައުސިން މިނިސްޓްރީން ބުނީ މިކަމަކީ ގިނަ އަދަދެއްގެ ރައްޔިތުންގެ ބޯހިޔާވަހިކަމުގެ އުއްމީދުތަކާ ގުޅިފައިވާ ވަރށް ހައްސާސް މައްސަލައެއްކަމަށް ވާތީވެ، ވުޒާރާގެ ރަސްމީބަހެއް ހޯދުމެއްނެތި ސިޔާސީ ބޭނުމަށް ހަގީގަތާ ހިލާފް ހަބަރުތައް ނުފެތުރުމަށް އިލްތިމާސްކުރާ ކަމަށެވެ.

ގެދޮރުވެރިކަމާ ބިމާއި އުމްރާނީ ތަރައްޤީއާ ބެހޭ ވުޒާރާއިން މިހިނގާ ނޮވެމްބަރުމަހުގެ 16 ވަނަ ދުވަހު ނެރުނު ބަޔާނެއްގައި ބުނީ، ގެދޮރުވެރިޔާ ސްކީމްގެ 4،000 ފްލެޓް ދާއިމީ ލިސްޓް އެކުލަވާލުމުގައި ކޮރަޕްޝަނަށް މަގުފަހިކާ ކަންކަން ހުރިކަމަށް އާއްމު ފަރާތްތަކަކުން ތުހުމަތުކޮށްފައިވާތީވެ، އެ ލިސްޓް މުރާޖައާކުރުމަށް އަދިވެސް ވަގުތު ބޭނުންވާކަމަށެވެ.
ގެދޮރުވެރިޔާ ފްލެޓް ލިސްޓްގައި ބޮޑެތި މައްސަލަތަކެއް ހުރިކަމަށް ސަރުކާރުން ބުނާއިރު، ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ، ކުރީ ސަރުކާރުން ހިންގި ގެދޮރުވެރިޔާ ސްކީމްގެ ދަށުން 4000 ފްލެޓް ލިބޭ މީހުންގެ ލިސްޓް، ކުރީ ސަރުކާރުން އާންމުކުުރި އިރު، ހަމައެކަނި އައިޑީކާޑެއް ހުށަހަޅައިގެން ފުލެޓް ލިބުނު މީހުންވެސް ހުރި ކަމަށް ވިދާޅުވެފައެވެ.

ސަރުކާރަށް އަހަރު ފުރުން ފާހަގަކުރުމަށް ސޯޝަލް ސެންޓަރުގައި ބޭއްވި ޖަލްސާގައި ރައީސް މުޢިއްޒު ވަނީ، މިހާތަނަށް ބެލިބެލުމުން ފުލެޓް ދިނުމުގައި ފާހަގަކުރެވިފައި ހުރި އުސޫލާއި ހިލާފު ބައެއް ކަންކަމުގެ ތަފްސީލު ދެއްވާފައެވެ.

އެގޮތުން ވިދާޅުވީ ކުރީ ސަރުކާރުން އެކުލަވާލި ގެދޮރުވެރިޔާ ކޮމިޓީގައި ހިމެނޭ ސިޔާސީ ފަރާތްތަކަށް ލިބޭ ގޮތަށް މާކްސް ބަދަލުކޮށްފައިވާކަމަށާ، އުސޫލާ ހިލާފަށް ކުރީ ސަރުކާރުގެ ސިޔާސީ ވެރީންގެ އާއިލަތަކަށް ފްލެޓް ދީފައިވާ ކަމަށެވެ.