އަންނަ އަހަރުގެ މާރިޗު މަހުގެތެރޭގައި ރާއްޖޭގައި ހެލިކޮޕްޓަރު އޮޕަރޭޓް ކުރަން ފަށާނެކަމަށް ދަތުރުފަތުރާއި މަދަނީ އުދުހުންތަކާއި ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.

ދައުލަތުގެ މީޑިއާ، ޕީއެސްއެމް ނިއުސްގެ "ހަފްތާ 52" ގައި ވާހަަކަފުޅު ދައްކަވަމުން ވަޒީރު އަމީން ވިދާޅުވީ، ކުރިއަތް އޮތް 10 ނޫނީ 15 ދުވަސް ތެރޭގައި ހެލިކޮޕްޓަރު އޮޕަރޭޓުކުރާ ފަރާތަކާއެކު ސޮއިކުރުމުގެ މަސައްކަތްތައް ކުރިއަށްދާނެކަމަށާއި، ރާއްޖޭގައި އެ ޚިދުމަތް ފެށިގެންދާނީ ސިވިލް އޭވިއޭޝަންގެ ހުރިހާ މިންގަނޑަކަށް ފެތޭގޮތަށް ކަމަށެވެ.

ވަޒީރު އަމީން ވިދާޅުވީ، މި ބަދަލާއިއެކު ރާއްޖޭގައި އޮޕަރޭޓް ކުރާނީ އިނގިރޭސިވިލާތުގެ ސީއޭ ރިކޮމަންޑޭޝަންތަކާއެކު ސަލާމަތީ ގޮތުން ރާއްޖެއަށް އޮޕަރޭޓްކުރުމަށް އެންމެ ރަނގަޅު ފެންވަރުގެ ހެލިކޮޕްޓަރުތައްކަމަށާއި، މިއާއިއެކު، އެއްރަށުން އަނެއް ރަށަށް ނުވަތަ މާލެއަށް ގެންނަންޖެހޭ ބަލިމީހުން ގެނެވޭނެކަމަށާއި، ރޭގަނޑު ޓޫރިސްޓުން އޮޕަރޭޓް ކުރުމުގައި ހުރި ދަތިތަކަށްވެސް ބަދަލު އަންނާނެކަމަށެވެ.

ވަޒީރު އަމީން މިފަދައިން ވިދާޅުވިއިރު، ރާއްޖޭގައި ހެލިކޮޕްޓަރުގެ ޚިދުމަތް ދިނުމަށް ޝައުގުވެރިވާ ފަރާތްތަކުން އެކަމަށް އެދި ހުށައެޅުމަށް ދަތުރުފަތުރާއި މަދަނީ އުދުހުންތަކާބެހޭ ވުޒާރާއިން މިދިޔަ އޮގަސްޓް މަހު ހުޅުވާލިއިރު، އެކަމަށްޓަކައި، ބައިނަލްއަޤްވާމީ 36 ކުންފުންޏަކުން ޝައުގުވެރިކަން ފާޅުކޮށްފައިވާކަން ފާހަގަކޮށްލަން ޖެހެއެވެ.