ޔުއެފާ ޗެންޕިއަންސް ލީގުގައި ރޭ އަމިއްލަ ދަނޑުގައި 2-0 ގެ ނަތީޖާއަކުން ޗެންޕިއަން ރެއާލް މެޑްރިޑް ބަލިކޮށް ލިވަޕޫލުން ލީގު ތާވަލުގެ އެއްވަނައަށް ކުރިއަށްޖެހިލައިފިއެވެ.

މުބާރާތުގައި ރެއާލް މެޑްރިޑް އެންމެ ފަހުން ކުޅުނު މެޗުގައި އަމިއްލަ ދަނޑުގައި 3-1 ގެ ނަތީޖާއަކުން އޭސީ މިލާން އަތުން ބަލިވެފައިވާއިރު، ލިވަޕޫލް އެންމެ ފަހުން ކުޅުނު މެޗުގައި އެޓީމުން ވަނީ 4-0 ގެ ނަތީޖާއަކުން ބަޔާ ލެވަކޫސަން ބަލިކޮށްފައެވެ. އަދި މިދެޓީމު އެންމެ ފަހުން ކުޅުނު ތިން މެޗުވެސް ކާމިޔާބުކޮށްފައިވަނީ ރެއާލް މެޑްރިޑެެވެ.

މެޗުގެ ފުރަތަމަ ހާފުގައި ގިނަވަގުތު ބޯޅަ ހިފަހައްޓައިގެން ކުޅެ މެޗު ޑޮމިނޭޓްކުރީ ލިވަޕޫލުންނެވެ. އަދި މިހާފުގައި ދެޓީމުންވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބުނުކުރެވި 0-0 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފުވެސް ވަރުގަދަކޮށް ފެށީ ލިވަޕޫލުންނެވެ. ނަތީޖާއެއްގެ ގޮތުން ދެވަނަ ހާފު ފެށިގެން ހަ ވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ މިޑްފީލްޑަރު އެލެކްސިސް މާކް އެލިސްޓާ އެވެ.

ނަމަވެސް އޭގެ ނުވަ މިނެޓްފަހު މެޗުގެ ނަތީޖާ އެއްވަރުކުރުމަށް ރެއާލް މެޑްރިޑަށް ވަނީ ޕެނަލްޓީއެއް ލިބި ބޭނުންކުރެވޭގޮތް ނުވެފައެވެ. އެޓީމު ފޯވާޑް ކިލިއަން އެމްބާޕޭ ކުރިއަށް ފޮނުވާލި ޕެނަލްޓީ ލިވަޕޫލްގެ ކީޕަރު ދިފާއުކުރިއިރު، މެޗުގެ 70 ވަނަ މިނެޓުގައި ލީޑު ފުޅާކުރަން ލިވަޕޫލަށް ވެސް ޕެނަލްޓީއެއް ލިބުނެވެ.

ލިވަޕޫލްގެ ޕެނަލްޓީ ސަލާހު ކުރިއަށް ފޮނުވާލުމުން ގޯލާއި އަމާޒުނުވެ ބޭރަށްދިޔައިރު، އެޓީމުން ލީޑު ފުޅާކުރި ލަނޑު 76 ވަނަ މިނެޓުގައި ކާމިޔާބުކޮށްދިނީ ދެވަނަ ހާފުގައި ބަދަލުކުޅުންތެރިއެއްގެ ގޮތުގައި ކުޅެން ނިކުތް ނެދަލޭންޑްސް ފޯވާޑް ކޯޑީ ގައްޕޯ އެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން ލިވަޕޫލް ކުރީގައި އޮވެގެންނެވެ. އަދި މިއީ 2009 ގެ ފަހުން ލިވަޕޫލް އަތުން ރެއާލް މެޑްރިޑް ބަލިވި ފުރަތަމަ މެޗެވެ.

މިނަތީޖާއެކު ކުޅުނު ފަސް މެޗުން ވެސް މޮޅުވެ 15 ޕޮއިންޓާއެކު ލީގު ޓޭބަލްގެ އެއްވަނައިގައި ލިވަޕޫލް މިވަގުތު އޮތްއިރު، މިމެޗުން ބަލިވި ރެއާލް މެޑްރިޑް ކުޅުނު ފަސް މެޗުން ލިބުނު ހަ ޕޮއިންޓާއެކު އެޓީމު މިވަގުތު އޮތީ ލީގުބުރުގެ 24 ވަނައިގައެވެ.