އޮސްޓްރޭލިއާގައި 16 އަހަރުން ދަށުގެ ކުދިންނަށް ސޯޝަލް މީޑިއާ ބޭނުންކުރުން މަނާކުރާ ބިލެއް ފާސްކޮށްފިއެވެ.
އޮސްޓްރޭލިއާގެ ޕާލިމަންޓުގެ ދަށު މަޖިލީހުން މި ބިލު ފާސްކޮށްފައިމިވަނީ ގޫގުލް އަދި ފޭސްބުކުގެ ވެރިފަރާތް މެޓާ އިން މި ގާނޫނު ފަސްކުރުމަށް އެގައުމުގެ ސަރުކާރަށް ގޮވާލަމުންދަނިކޮށެވެ.
މިއީ މިހާތަނަށް ދުނިޔޭގެ އެންމެ ހަރުކަށި ސޯޝަލް މީޑިއާ ކޮންޓްރޯލްތަކުގެ ތެރެއިން އެއް ކޮންޓްރޯލަށްވާއިރު، އޮސްޓްރޭލިއާގެ ހައުސް އޮފް ރެޕްރެޒެންޓޭޓިވްސް އިން މި ބިލު ފާސްކުރީ 102 ވޯޓު ލިބިގެންނެވެ.
ސެނެޓުގައި މި ބިލާ މެދު ބަހުސްކުރުމަށް ހަމަޖެހިފައިވާއިރު، އެގައުމުގެ ސަރުކާރުން އަންނަނީ ބުރާސްފަތި ދުވަހު ޕާލިމަންޓަރީ އަހަރު ނިމުމުގެ ކުރިން މި ބިލު ފާސްކުރުމަށް މަސައްކަތް ކުރަމުންނެވެ.
މި ބިލު ބުނާގޮތުން، ސޯޝަލް މީޑިއާ ޕްލެޓްފޯމްތަކުން އުމުރު ކަށަވަރުކުރުމުގެ ރައްކާތެރިކަން ގާއިމުކުރުމަށް އެކަށީގެންވާ ފިޔަވަޅުތައް އަޅަންޖެހޭނެއެވެ. ސިސްޓަމެޓިކް ގޮތެއްގައި މި ގަވާއިދުތައް ނުހިފެހެއްޓޭ ކުންފުނިތަކަށް 49.5 މިލިއަން އޮސްޓްރޭލިއަން ޑޮލަރު (32 މިލިއަން އެމެރިކާ ޑޮލަރު) އާ ހަމައަށް ޖޫރިމަނާ ކުރެވޭނެއެވެ.
މި ބިލު ތަންފީޒުކުރުމަށްޓަކައި އޮސްޓްރޭލިއާއިން ވަނީ ބަޔޯމެޓްރިކްސް ނުވަތަ ސަރުކާރުގެ އައިޑެންޓިފިކޭޝަން ހިމެނޭ އުމުރު ކަށަވަރުކުރުމުގެ ނިޒާމެއް ޓެސްޓުކުރުމަށް ރާވާފައެވެ.
Advertisement
This content is created and paid for by advertisers and does not involve Voice Journalists
