ކުޑަކުދިންގެ ކަރާމާތަށް އުނިކަން އަންނާނެހެން މައުލޫމާތު އާއްމުކުރާނަމަ ފިޔަވަޅު އެޅޭނެ ކަމަށް ޗިލްޑްރެންސް އޮމްބަޑްސްޕާސަން އޮފީސް އިން ބުނެފިއެވެ.
ޗިލްޑްރެންސް އޮމްބަޑްސްޕާސަން އޮފީސްއިން މިފަދައިން ބުނީ، ބައެއް މީޑިއާ ވަސީލަތްތަކުގައި ކުޑަކުދިންގެ މައުލޫމާތު އާއްމުކުރާއިރު، ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނު ގައި ބަޔާންކޮށްފައިވާ މިންވަރާ ހިލާފަށް ރާއްޖޭގައި ރަޖިސްޓަރީކޮށްގެން ހިންގާ، މީޑިޔާތަކާއި އެ ނޫންވެސް އެހެނިހެން މީޑިޔާގެ ވަސީލަތްތައް ނުވަތަ މަންސަތަކުގައި ކުއްޖާގެ ކަރާމަތަށް އުނިކަން އަންނާނެ ފަދަ މައުލޫމާތާއި ތަސްވީރުތައް އާއްމުކުރަމުންދާތީ ނެރުނު ނޫސްބަޔާނެއްގައި އެވެ.
އެ އޮފީހުން ބުނީ، ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގެ ދެވަނަ ބާބުގައި، ކުޑަކުދިންނަކީ ހާއްސަ ރައްކާތެރިކަން ލިބެންޖެހޭ ބައެއްކަމަށް ކަނޑައަޅާފައިވާކަމަށާއި، ދިވެހިރާއްޖެއިން ބައިވެރިވެފައިވާ އދ. ގެ ކުޑަކުދިންގެ ހައްގުތައް ރައްކާތެރިކަމާއި ބެހޭ މުއާހަދާގައި ނަފްސާނީ ގޮތުން އަދި ޖިސްމާނީ ގޮތުން ގެއްލުމެއް ލިބިދާނެ ހުރިހާކަމަކުން ކުއްޖާ ރައްކާތެރިކޮށް ދިނުމަކީ މި މުއާހަދާގައި ބައިވެރިވެފައިވާ ފަރާތެއްގެ ހައިސިއްޔަތުން ދިވެހި ދައުލަތުގެ ޒިންމާއެއް ކަމަށެވެ.
ހަމައެއާއިއެކު، ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުގެ 33 ވަނަ މާއްދާގައި ކުޑަކުދިންގެ ކަރާމާތަށް އުނިކަން އަންނާނެ ގޮތަށް ކުޑަކުދިންގެ ޒާތީ މައުލޫމާތު އެއްވެސް ފަރާތަކުން ހިއްސާކޮށްގެން ނުވާނެކަމަށް ބަޔާންކޮށްފައިވާކަން ފާހަގަކުރަމުން އެ އޮފީހުން ބުނީ، މިގޮތަށް ބަޔާންކޮށްފައިވާއިރު، ބައެއް މީޑިއާގެ ވަސީލަތްތަކުގައި ކުޑަކުދިންގެ މައުލޫމާތު އާއްމުކުރަމުންދާކަން ފާހަގަވެފައިވާކަމަށެވެ.
މިފަދަ ކަންކަމަކީ ކުއްޖާގެ ކަރާމާތާއި ރައްކާތެރިކަމަށް އުނިކަމެއް އަތުވެދާނެ ފަދަ ކަމެއް ކަމާއި މި ގޮތަށް މައުލޫމާތު އާއްމުކުރުމަކީ މިކަމުގެ ސަބަބުން ކުޑަކުދިންގެ މަސްލަހަތު ރައްކާތެރި ނުކުރެވި ކުއްޖާ އަނިޔާއަކަށް އަދި ނުރައްކަލަށް ނުވަތަ ގޯނާއަކަށް ހުށަހެޅިދާނެ ކަމެއްކަމުގައިދެކޭ ކަމަށް އެ އޮފީހުން ވަނީ ހާމަކޮށްފައެވެ.
އެހެންކަމުން، ސީދާ ގޮތުންނާއި ނުސީދާ ގޮތުން ނަމަވެސް، ކުޑަކުދިންގެ ޒާތީ މައުލޫމާތު އެއްވެސް މީޑިއާއަކުން އާއްމުކޮށްފިކަން އެ އޮފީހުގެ ސަމާލުކަމަށް އައިސްފިނަމަ، އެ ފަރާތަކަށް ފިޔަވަޅު އެޅޭނެކަމަށް ޗިލްޑްރެންސް އޮމްބަޑްސްޕާސަން އޮފީސް އިން ބުނެއެވެ.
މިއާއިއެކު، އެ އޮފީހުން ވަނީ، ކުޑަކުދިންގެ ހައްގުތަކާއި ރައްކާތެރިކަން ކަށަވަރުކޮށްދިނުމުގައި މީޑިއާތަކުން ވެސް ދެމިތިބުމަށާއި، މިކަންކަން ހާސިލްކުރުމަށް އެއްބާރުލުން ދިނުމަށް މީޑިއާތަކުގެ އިތުރުން މުއައްސަސާތަކަށް ގޮވާލައްވާފައެވެ.
Advertisement
This content is created and paid for by advertisers and does not involve Voice Journalists
