ހައްޔަރުކޮށްފައިވާ ޕާކިސްތާނުގެ ކުރީގެ ބޮޑުވަޒީރު އިމްރާން ޚާން ދޫކޮށްލުމަށް އެދި ވެރިރަށް އިސްލާމާބާދުގައި ބޭއްވި ބޮޑު މުޒާހަރާގައި އިއްޔެ އެކަނިވެސް 1000 އަށްވުރެ ގިނަ މީހުން ޕާކިސްތާނު ފުލުހުން ހައްޔަރުކޮށްފިއެވެ.

2023 ވަނަ އަހަރުގެ އޯގަސްޓް މަހުން ފެށިގެން ޖަލުގައި ހުރި އިމްރާން ޚާނަށް ދެކޮޅަށް، ސިޔާސީ ބޭނުމަށް މައްސަލަތަކެއް އުފަންކުރުވާފައިވާކަމަށް އިމްރާން ޚާންއަށް ތާއީދުކުރާ ފަރާތްތަކުން ތުހުމަތުކުރެއެވެ.

މުޒާހަރާގައި ބައިވެރިވި 10،000 އަށްވުރެ ގިނަ މީހުންނާއި ސަލާމަތީ ބާރުތަކާ ދެމެދު ވަރުގަދަ ހަމަނުޖެހުންތަކެއް ހިނގައިފައިވެއެވެ. މި ހަމަނުޖެހުންތަކުގައި ސަލާމަތީ ބާރުތަކުގެ މަދުވެގެން 5 މީހުން މަރުވެފައިވާ އިރު، މުޒާހަރާކުރި މީހުންނާއި ދެކޮޅަށް ކަރުނަގޭހާއި މުގުރު ބޭނުންކޮށްފައިވެއެވެ.

Advertisement

އިމްރާން ޚާންގެ ޕާކިސްތާން ތަހްރީކް ތަހްރީކް-އެ-އިންސާފް (ޕީޓީއައި) ޕާޓީން ބުނާ ގޮތުގައި ފެބްރުއަރީ މަހު ބޭއްވުނު އިންތިޚާބުގައި ވަނީ އޮޅުވާލާފައެވެ. އިންތިޚާބަށްފަހު ހިތްހަމަނުޖެހުން ފާޅުކުރުމަށް މަގުތަކަށް ނިކުންނަން އުޅުމުން ފުލުހުން ވަނީ އެކަން ވިޔަ ނުދޭން މަސައްކަތްކޮށްފައެވެ. ނަމަވެސް ޕީޓީއައި އިން ވަނީ އެމީހުންގެ ހަރަކާތް ކުރިއަށް ގެންދާނެ ކަމަށް ބުނެފައެވެ. ޕާކިސްތާނުގެ ބޮޑުވަޒީރު ޝަހްބާޒް ޝަރީފް މި މުޒާހަރާތައް ސިފަކޮށްފައިވަނީ "ހައްދުފަހަނައަޅާ ދިއުމުގެ" އަމަލެއްގެ ގޮތުގައެވެ.

މުޒާހަރާކުރި މީހުން ހައްޔަރުކުރުމާއި، އިންޓަނެޓް ބްލެކްއައުޓްތަކާއި، ސްކޫލްތައް ބަންދުކުރުން ފަދަ ކަންކަމާ ގުޅިގެން އެމްނެސްޓީ އިންޓަނޭޝަނަލް ފަދަ ބައިނަލްއަގްވާމީ ޖަމްޢިއްޔާތަކުން ވަނީ ސަރުކާރުގެ މި ޢަމަލުތައް ކުށްވެރިކޮށްފައެވެ.

ޕީޓީއައި އިން އެންމެ ގިނަ ގޮނޑި ކާމިޔާބުކުރި ނަމަވެސް، އިމްރާން ޚާނާއި އޭނާގެ ޕާޓީ އެއްފަރާތްކުރުމަށް ސިފައިން ސިޔާސީ ކަންކަމުގައި ނުފޫޒު ފޯރުވާފައިވާ ކަމަށް އިމްރާން ޚާންގެ ސަޕޯޓަރުން ތުހުމަތުކުރެއެވެ. އަދި މިކަމާ ގުޅިގެން ސަރުކާރާއި ސިފައިންނާ ދެކޮޅަށް ރައްޔިތުންގެ ހިތުގައި އޮތް ރުޅިވެރިކަން އިތުރުވަމުންދާ ކަމަށް މަސްރަހު ދިރާސާކުރާ ފަރާތްތަކުން ބުނެއެވެ.