ފުޓްބޯޅަ އެސޯސިއޭޝަން އޮފް މޯލްޑިވްސް، އެފްއޭއެމްގެ ކުރީގެ ވެރިން، ނިއުރޭޑިއަންޓާމެދު އަމަލުކޮށްފައިވަނީ، ބޭއިންސާފުންކަމަށް ނިއުގެ އައު ޗެއާމަން އަހުމަދު މުބީން ވިދާޅުވެއްޖެއެވެ.

ނިއުރޭޑިއަންޓްގެ އައު މެނޭޖްމަންޓުން ބޭއްވި ފުރަތަމަ ނޫސްވެރިންގެ ބައްދަލުވުމުގައި ވާހަކަދައްކަވަމުން މުބީން ވިދާޅުވީ، ނިއުއިން އަމަލުކުރިގޮތަކުން ކަމަށް ބުނެ، އެފްއޭއެމްގެ ކުރީގެ ވެރިން ނިއުއާމެދު އަމަލުކޮށްފައިވަނީ، ވަރަށްބޮޑަށް ބޭއިންސާފުން އަދި އަދުލުވެރިކަމެއް ނެތިކަމަށެވެ. ފީފާ، އޭއެފްސީން ނިއުގެ ޓްރާންސްފަރ ބޭންއެއް ކޮށްފައިވަނިކޮށް އެފްއޭއެމުން ޒާތީގޮތުން އެ ކްލަބާ ދެކޮޅަށް އެޅި ފިޔަވަޅުތަކަކީ ބަލައިގަނެވޭނެ ކަންތައްތަކެއް ނޫންކަމަށް މުބީން ވިދާޅުވިއެވެ.

މުބީން ވިދާޅުވީ އެފްއޭއެމްގެ އެ އަމަލުތަކުގެ ސަބަބުން އެންމެފަހުން ގެއްލުން ލިބުނީ ހަމައެކަނި ނިއުރޭޑިއަންޓަށް ނޫންކަމަށާއި، އެފްއޭއެމްގެ އަމަލުތަކުގެ ސަބަބުން ނިއުރޭޑިއަންޓާއެކު، ވެލެންސިއާ އަދި ވިކްޓްރީގެ ހާލަތު ދަށްވެ، ޖުމްލަގޮތެއްގައި މުޅި ދިވެހި ފުޓްބޯޅައިގެ ރޫހުވެސް މިއަދު ގެއްލިފައިވާކަމަށެވެ.

މުބީން ވިދާޅުވީ ނިއުރޭޑިއަންޓް ނަގާ ކޮޅަށް ޖެހުމަށް ކުރަމުންގެންދާ މަސައްކަތްތަކުގެ ދަށުން މިދިޔަ ދުވަސްތަކުގައި ވަރަށް މުހިއްމު މަސައްކަތްތަކެއް ކުރެވިފައިވާކަމަށެވެ. މިގޮތުން ނިއުރޭޑިއަންޓްގެ ކުރީގެ ކޯޗުންނާއި އަދި އެނޫންވެސް އޮފިޝަލުންގެ ޓެކްނިކަލް ލަފާ ހޯދަމުންދިޔަކަން މުބީން ފާހަގަކުރެއްވިއެވެ. ނިއު ނަގާ ކޮޅަށް ޖެހުމުގެ މަސައްކަތްތަކުގެ ދަށުން ޓީމްގެ އެކަޑަމީ ފެށުމަށް ތައްޔާރުވަމުން އަންނަކަމަށާއި، މިގޮތުން ނިއުގެ އެކަޑަމީ ހުޅުމާލޭގައި ފެށުމަށް ތައްޔާރުވަމުންދާކަން މުބީން ވިދާޅުވިއެވެ. 

އަންނަ ޖެނުއަރީމަހުގެ ތެރޭގައި ނިއުގެ އެކަޑަމީގެ މަސައްކަތްތައް ފެށުމަށް ތައްޔާރުވަމުންދާކަމަށާއި، މިގޮތުން މާލެ އަދި ހުޅުމާލެ ސަރަހައްދުން މިހާރުވެސް ނިއުރޭޑިއަންޓްގެ އެކަޑަމީއާ ގުޅުމަށް 200 އަށްވުރެ ގިނަ ކުދިން ތައްޔާރަށްތިބިކަމަށް މުބީން ވިދާޅުވިއެވެ.

ނޮވެމްބަރުމަހުގެ 20 ވަނަ ދުވަހުގެ ރޭ ބޭއްވި ނިއުގެ ކޮންގްރެސްގައި ވަނީ އެޓީމުގެ އައު މެނޭޖްމަންޓް އެކުލަވާލާފައެވެ. ނިއުގެ އައު ޗެއާމަނަކަށް މުބީން އައްޔަނުކުރިއިރު، ސީނިއާ ވައިސް ޗެއާމަންގެ މަގާމަށް އައްޔަނުކޮށްފައިވަނީ، ހެންވޭރު ހުޅަނގު ދާއިރާގެ މެންބަރު އަލީ އިބްރާހީމް (ކައްޕި) އަދި ވެމްކޯގެ މެނޭޖިން ޑިރެކްޓަރު މުޖުތަބާ ޖަލީލް (މުޖޭ) އެވެ. އަދި ވައިސް ޗެއާމަނަކަށް އައްޔަނުކޮށްފައިވަނީ، އަލީ ރަޝީދެވެ.