ބިދޭސީންނާ ގުޅޭ ބައެއް ކަންކަމުގައި މޯލްޑިވްސް އިމިގްރޭޝަނުގެ 5 މުއައްޒަފަކު ރިޝްވަތުނެގިކަމަށް ބުނާ މައްސަލައެއް ބަލަން ފަށާފައިވާަކަމަށް ދާހިލީ ވަޒީރު، އަލީ އިހްސާން ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން ވިދާޅުވީ، މޯލްޑިވްސް އިމިގްރޭޝަން ގެ 5 މުވައްޒަފުން ޤާނޫނާއި ޤަވާއިދުތަކާއި ޚިލާފަށް ބިދޭސީންނާއި ގުޅުންހުރި ބައެއްކަންކަންކޮށް، އެކި ފަރާތްތަކުން ނަހަމަގޮތުގައި ފައިސާ ހޯދަމުންދާކަމަށް ތުހުމަތުކުރެވޭ މައްސަލައެއްގެ މަޢުލޫމާތުލިބުމުން ފުލުހުންމެދުވެރިކޮށް އެ މައްސަލަ ބަަލަމުންދާކަމަށެވެ. ވަޒީރު ވިދާޅުވީ، ޔުނިފޯރމުއެޅި މުއައްސަސާތަކުގެ ތެރޭގައިތިބެ ޔުނިފޯރމުގެ ހުރުމަތްކަނޑާ، ރައްޔިތުންގެ ކުރިމަތީ މުއައްސަސާތަކުގެ އިތުބާރުގެއްލުވަމުންދާ ފަރާތްތަކާ ދޭތެރޭ ޤާނޫނީގޮތުން އެޅޭ އެއްމެ ހަރުކަށިފިޔަވަޅު އެޅުމަކީ ރައީސުލްޖުމްހޫރިއްޔާ އަންގަވާފައިވާކަމެއް ކަމަށެވެ. 

މިފަދަ ކަންކަމަކީ މިސަރުކާރުން އެއްވެސް ވަރަކަށް ތަހައްމަލު ކުރާނެކަންކަމެއްނޫންކަން ފާހަގަކުރައްވަމުން ވަޒީރު ވިދާޅުވީ، މި މައްސަލާގައި ހިއްސާވާކަމަށް ތުހުމަތުކުރެވޭ އޮފިސަރުން ބޭނުންކުރާ އިލެކްޓްރޯނިކް ސާމާނު ހިފަހައްޓައި ދިރިއުޅޭ ތަންތަން ބަލައި ފާސްކޮށްފައިވާކަމަށެވެ.

Advertisement

ގަވާއިދާހިލާފަށް ރާއްޖޭގައި އުޅޭ ބިދޭސީން ހޯދުމަށް އިމިގްރޭޝަނުން ދަނީ ހާއްސަ އޮޕަރޭޝަނެއް ހިންގަމުންނެވެ. މި އޮޕަރޭޝަނުގައި ގަވާއިދާ ހިލާފަށް ވިޔަފާރިކުރާ ފަރާތްތައް އަތުލައިގަނެ ބައެއް މީހުން ވަނީ ރާއްޖެ ނާދެވޭނެހެން ފޮނުވާލާފައެވެ. ބިދޭސީން ހޯދުމަށް ކުރިއަށްގެންދާ އޮޕަރޭޝަން މާލެ ސަރަހައްދުގެ އިތުރުން މުޅި ރާއްޖެއަށް ވަނީ ފުޅާކޮށްފައެވެ.

އިމިގްރޭޝަނުން މި އޮޕަރޭޝަން ކުރިއަށްގެންދަނީ، ފުލުހުންގެ އިތުރުން ސަރުކާރުގެ ކަމާބެހޭ މުއައްސަސާތަކާވެސް ގުޅިގެންނެވެ.